秘書姐姐Mandy已經喺公司做咗5年，平日會幫老細處理大小事務，濕碎如book枱食飯、買演唱會同波飛、拎西裝去乾洗、安排司機接載老闆娘出入，通通都會幫手handle，咁當然啦，呢啲係職責問題，佢兩個私人感情深唔深？平日仲有咩互動？又或者係咪百分百互信？其他同事始終唔係知得咁清楚。
由於公司喺深圳都有office，老細平均一至兩個星期會上去一次，有日老細先係去咗深圳，同日Mandy食晏時就收到WhatsApp，內容係老細指示佢入5萬蚊去一個戶口，仲強調好急，要盡快搞咗先，總之返到香港會畀返錢Mandy。
以上嘅WhatsApp內容我哋係之後先知，不過聽返同秘書一齊食晏嗰位同事講，Mandy當時係食到一半停咗，嗱嗱臨上online banking做，同日接近放工時間，老細返咗嚟香港office，秘書姐姐咪去claim返錢囉，點知老細問：「Claim咩錢？」
Mandy大驚，老細就一頭霧水，你一言我一語，搞到有啲同事都停晒手去了解，原來老細個WhatsApp畀人hack咗，據聞對方唔止假冒佢叫秘書姐姐入錢，同時亦WhatsApp咗老闆娘，仲有老細兩個朋友，不過呢班人全部冇入錢，得秘書姐姐一個中招……你話諷唔諷刺？
老闆娘同兩個friend冇入錢，究竟係知道有古惑，抑或睇唔到WhatsApp，咁真係無從稽考，因為老細冇向我哋交代得咁詳盡。點都好啦，最終老細拉埋Mandy去報警，我諗呢啲騙案年中真係唔少，全年365日都發生緊，人就唔係咁易拉到㗎喇，至少呢單到而家都未拉到，錢就更加拎唔返啦！
Mandy其實係敢怒不敢言，佢覺得自己有一半責任，不過老細WhatsApp畀人hack先會引發今次事件，加上佢係出於好心第一時間去幫，所以認為老細冇品同埋不近人情，出事後一啲行動都冇，連一毫子都唔打算承擔，要自己硬食呢5萬蚊，所以Mandy好唔開心。
套用連登仔常用嘅說話：「你同我講做咩呀？同佢講吖嘛！」Mandy只係將不忿同我哋班同事分享，又唔敢開門見山同老細傾，結果老細亦選擇以「不了了之」嘅方式去結束事件，畢竟，畀人hack嘅老細真係冇跌錢，一條毛都冇少到，只係傻更更走去過數嘅秘書有金錢損失啫！
結果Mandy同月辭職，佢直言係對老細失望，但我就覺得佢太傻同埋太懦弱，首先，你唔同老細傾，不外乎係怕影響形象同埋關係，講到尾就係驚影響份工啫！冇錯，你肯直接講，老細亦未必賠償你損失，咁你都試下吖，收收埋埋一個人嬲，再自己遞信辭職，請問係點解呢？
呢單嘢係上年10月尾至11月頭發生，換言之秘書姐姐係年尾流流辭職，咁就更加戇居，當你打定輸數，係咪應該過埋年，拎埋bonus當幫補呢？5皮嘢你又跌咗，工又冇埋（可能佢一早搵到工而我哋唔知啦），連bonus都放棄，真心覺得Mandy每一步都係行錯，唔通要啲唔關事嘅同事開口幫你叫老細「回水」咩？
不過Mandy遞完信之後的確有同事選擇以婉轉嘅方式，問老細會唔會考慮負責返一部分，嗰位同事仲向老細講，其實Mandy幾幫得手，而且5萬蚊對打工仔嚟講真係好肉赤。
然後老細咁樣回應……
「而家啲錢係咪入落我戶口吖？警都報埋啦！最後點？差佬都幫唔到佢拎返啲錢，我可以做咩？如果個個都話我畀人hack，然後代我入錢，跟住又問我拎返，幾千萬身家都唔掂喎！唔係話Mandy呃我，我知佢都係中網絡詐騙，咁調返轉喇，我中招，話幫佢入咗錢，唔通我又問佢拎返喇喎！」
明嘅，今日同事A畀人呃，問你拎返5萬，聽日同事B畀人呃，又問你拎幾萬，咁真係好唔掂，不過件事的確係老細個WhatsApp畀人hack，搞到一個仆住去幫你嘅人受騙，咁樣講會唔會太涼薄呢？（雖然老細唔係面對面同Mandy講呢番說話。）
其實公司班同事都分咗兩派，有人覺得Mandy自己蠢，好難怪人，正常一定係打個電話搵老細confirm先，日日咁多騙案，你做得秘書更加要打醒十二分精神。而另一班同事就撐Mandy，覺得佢仆心仆命為老細做嘢，跌咗錢都好似都冇人可憐，戥Mandy咁樣辭職好唔抵。
比起投稿派花生，我更加想將件事講出嚟，聽下大家認為老細無動於衷係合理，定係冇人情味？同時都想聽吓大家遇過咩最新呃錢手法，study定等自己唔好瀨嘢。