做做下嘢，資深同事Simon走埋嚟問我有冇回鄉卡，又話冇都唔緊要，留港消費一樣大把嘢玩，當我循例拒絕之後，Simon就同我講：「未揼過邪骨學人做Sales？有冇搞錯呀？行啦！請你呀！」其實短短兩個星期內，Simon已經同我講咗呢句對白3次，就算對住IT同事，佢一樣會話：「未揼過邪骨學人做IT？有冇搞錯呀？」
所以佢又唔淨止撩我去滾，其他男同事佢都有撩，雖然我唔明白點解要揼過邪骨先有資格做Sales同IT，不過唔緊要啦，相信都係開場白嚟啫！Simon係好公開嗌同事去嫖，雖然我自己冇呢個嗜好，但正常都知道叫雞應該唔平，因咩原因會有人肯請同事去呢？
就住呢件事，我問過另一位資深嘅Sales，對方話畀我知，Simon好多年前入嚟做都係青澀小生一名，呢間公司係佢畢業後第一份正職，所以Simon未轉過工，一直做到而家，不過當時公司有兩位大滾友，一個係老細，一個係採購部經理張生，就係佢哋將Simon帶入呢個深淵。
當年老細同張生兩大咸濕佬都係周圍嗌同事去滾，無論你已婚又好，單身又好，只要係男人，佢哋都會走嚟問你，可能係嗌10次都唔去1次實在太唔畀面，所以Simon後來答應一齊去，原來只要你陪玩，張單就一定由老細負責埋，真係完全免費，唔知咁樣算唔算員工福利呢？
可能係去完一次覺得好爽啦，Simon後尾唔再抗拒喇，香港、深圳、東莞，全部有佢哋嘅足跡，平均每星期去一次，香港又去，深圳又去，東莞又去，最誇張試過夾假期一齊去泰國同越南，聽講老細連機票酒店都包埋，唔知真定假啦，聽返嚟咋，始終當年我未入嚟呢間公司做。
公司班同事幫老細、採購部經理張生，仲有Simon佢哋起咗個朵叫「風塵三俠」……叫雞叫到佢哋有綽號咁威，真係欽敬欽敬！
只係隨住時間流逝，風塵三俠逐漸瓦解，張生呢條大滾友竟然結婚，但原來個老婆係喺上面啲邪骨場認識，咁又合理返少少，申請埋落嚟香港住喇。
或者係知己知彼啦，張生個老婆之前做邪骨場，梗有自己一套方法去管個老公嘅，而且云云骨女當中得佢可以俘虜張生個心，相信都唔簡單。
張生婚後修心養性，風塵三俠變成三缺，而老細大約4年前做咗個通波仔手術，據聞個心係塞得好緊要，再遲啲做手術直頭有生命危險嗰隻，死過返生識得珍惜生命，所以老細呢幾年都絕跡風月場所喇，仲學人早睡早起去跑步，又去耍太極，健康人生由佢創，咁點都好過去滾嘅！
有冇見過啲人畀損友「導」食煙呀？Simon嘅情況差唔多係咁，班損友後來戒晒煙喇，得佢一個仲食緊，老細同張生冇再滾喇，得Simon一個仲滾緊，相信去嫖已經變咗習慣，除非生活裡面有好大衝擊同變化，否則都好難改。
睇得出Simon好想再培育「風塵組合2.0」，所以佢而家成日嗌其他同事「陪滾」，當年嘅青澀小生變咗大滾友喇，今時今日人工又比起以前多咗好多，有財力請人去嫖添！總之你肯去，Simon就肯畀埋你嗰份，仲有一樣嘢好得意，例如個同事係點都唔肯去，佢就更加會出盡力落嘴頭叫你去，究竟呢種係咩心態呢？
免費去嫖咁好嘅「offer」點會冇男同事take吖，問題係Simon去滾實在太光明正大喇，去完會返公司周圍同人講，其實佢主要唔係唱同事，最終目的只想講邊個場好玩，炫耀下，順便引下人下次一齊去，早兩日Simon先自爆同隔籬team個Jacky去咗間新嘢，又猛咁讚啲女好正，強調Jacky樂而忘返……
Simon：「玩得好開心呀！今晚有冇約人呀？一齊去啦！放工食個飯先，跟住上去同啲女唱K，睇啱就帶出街，個場樓下已經係時鐘酒店喇，去完再約埋喺茶記飲杯嘢，互相講下賽後報告，係咪好過癮先？去啦！我請呀！」
聽完你咁講，幾想免費去滾都驚啦！全公司男同事都知就梗㗎喇，我就唔信啲男同事唔會同女同事講，take offer變相成個office知你係雞蟲，好大犧牲啫！所以有啲人跟Simon去咗一兩次就唔去，靜靜地滾唔得嘅！正正因為咁，Simon直至而家仲係周圍叫人陪滾，特別係新同事，佢一定會叫！
風塵三俠散band多年，老細同張生都回晒塘喇，Simon仲自己一個喺歡場東征西討，有句說話叫做「十個男人九個滾，淨返一個仲諗緊」，而Simon嘅情況應該係「九個男人戒咗滾，得你一個未斷癮」，當然啦，牛唔飲水唔撳得牛頭低，Simon變成今日嘅大滾友，都唔可以怪晒老細同張生。
有次幾個同事食lunch，我隨口講咗句：「咁樣滾法，有冇性病㗎？」
另一個同事回答：「有冇性病？你不如估下佢有幾多種性病仲好啦！」
希望Simon有時間去body check啦，高危呀！