記得啱啱入嚟呢間公司做唔夠一個月，我已經畀老細用粗口問候，佢當時嘅一字一句我到而家仲記得好清楚：「屌你老味，用下個屎忽腦啦！Make appointment揀晏晝吖嘛，有邊日見我朝早10點返工㗎？你約個客10點，我自己都冇把握起身呀！」
大哥，我嗰陣做得一個月咋，點知你嘅習慣同喜好呀？你有咩要求一早講吖嘛，同埋使唔使一開口就屌我老味呀？仲講咩屎忽腦，講到底我都係新人嚟啫，而且佢講呢番說話唔係平和語氣，係咆哮式扯火。
搵到呢份工嘅時候係疫情最嚴峻嗰期，個市真係好差，身邊有幾個朋友都失業，有個friend仲好笑，本身有間公司約咗interview，點知對方臨見工前一日話有職員中咗招所以要押後，一押就押到2027，時至今日都冇再打返畀佢約時間，等開飯真係餓死咗十世。
咁嘅市想轉工都唔易，所以我嘅計劃係3個月試用期之前走，反正個老細咁仆街，間公司又唔係大，得13個人，賺得幾多得幾多囉， 總之唔好做過試用期，咁我就唔需要一個月通知期可以離職。
因為個老細有躁狂症，期間我仲畀佢用粗口問候咗幾次，所以做咗兩個半月嘅時候雖然仲未搵到新工，但我仍然向佢提出辭職，估唔到老細咁直接問我：「點解呀？做得好地地，我見你都搵咗幾個新客，有啲potential，係咪因為我平時鬧你呀？」
我：「其實我接受唔到畀老細用粗口鬧。」
「唉，你喺度做冇理由唔知我性格，個個我都係咁鬧㗎啦，粗口係我口頭禪啫，即係人哋say hello同埋講good morning咁之嘛！你搵到新工未先？」
為咗唔想糾纏落去，我隨口話自己已經有新offer：「搵到喇。」
「嗰邊幾錢人工呀？」
我：「$28,000！」我當時人工$25,000，作高3,000純粹想大佢。
「哦，$28,000，都唔係多好多咋喎，我加夠你1萬，下個月出$35,000，咁都多過嗰邊$7,000啦！打工為錢啫，你幾多歲呀？我記得好似35啦係咪？」
我：「33。」
「咪係囉，33都唔細啦，呢個年紀要搵多啲錢，嗱，下個月出$35,000，你考慮一晚，聽日先答我，好冇？」
如果佢唔叫我考慮，礙於面子我一定當場拒絕，但係我返去同女朋友講呢件事嗰陣，女朋友竟然叫我忍……
女朋友：「你諗下喎，$28,000份工係你作咋喎！如果你而家走就係失業，係zero，你咁樣辭一辭職就加你1萬，忍下囉，做多一個月得一個月吖嘛。」
其實之前我同女朋友呻日日畀老細屌老母嘅時候，佢係支持我未夠試用期就辭職，點知而家完全轉晒風向，不過佢又唔係講得冇道理，當時好難搵工，我根本就冇offer，做住先囉，繼續搵應該會有著落啩！
老細嘅躁狂表現並冇收斂，但人性真係好賤，畀人屌得多會麻木，日日畀老細屌老母，我竟然滿足於嗰$35,000月薪而冇再積極搵新工，直至有一次佢講咗句畀粗口更過份嘅說話。
「我真係未見過人咁L蠢，屌你老味！喂你打開個窗自己跳落去啦！咁L廢嘅你！」強調下先，唔係講笑語氣。
佢平時屌老母通常得自己公司同事聽到，但嗰次叫我打開個窗跳落去係有客喺度，我條氣下唔到，即刻走咗出meeting room，跟住拎返個背囊就離開公司。
因為我知道女友實叫我睇錢份上忍咗佢，所以嗰次搵咗另一個朋友呻，個friend聽完仲勞氣過我：「你覺得$35,000好多呀？好心你咪咁冇骨氣啦！唔怕老實同你講，我人工4皮，老細都唔會咁樣屌我。」
啱！當晚我就send message同老細講辭職，我英呀！直頭話賠一個月即走，我豪返$35,000出嚟呀！
可能見我好勞氣，今次女朋友聽我講完都軟化，佢話：「如果你真係做得唔開心咪唔好做囉！我都明嘅，你老細係好過份。」Ok啦，連女朋友都支持，我賠錢辭職都安樂啲。
誰不知老細收到我message之後，隔咗一個鐘頭覆我呢番說話：「咁樣啦，一人讓一步，你都做咗一段日子，我啱啱想加你人工，$45,000好唔好？你仲有commission，你keep返而家個數，每個月一定有5字頭，我唔想再搵人又重新教過，你諗諗啦，無論點都好，我都唔使你賠一個月人工，聽日返到公司我希望見到你。」
我上一份工係嚴重underpaid，而且我得中五學歷，自己知自己事，有好多工都要大學畢業呢張入場劵，唔好話人工5字頭，我連搵過份兩萬幾三萬嘅工都冇把握。
然後我第二日又如常返工，老細冇再提，人工亦真係有加，嗰個月薪4皮嘅friend繼續話我冇骨氣，但女朋友就話我叻仔，識得忍，仲叫我當老細講粗口係唱歌，梗係啦，我哋plan緊呢一兩年結婚，樣樣都係錢，女朋友梗係唔想我辭職，當然，我自己係冇骨氣嘅，我認。
而家個老細仲係日日會同我講：「屌你老味！」間唔中會話我係屎忽腦，佢冇叫我打開個窗跳落去喇，但上個月就嗌過我食屎。
想問下大家意見，換轉你係我，會唔會為咗呢份糧默默忍受個老細？我係咪特別冇骨氣呢？（完）
面對職場嘅怨氣同委屈，有人選擇默默承受，亦有人選擇自己喺個位爆粗發洩，你哋仲記唔記得2021年呢兩段投稿？
商場客戶服務員被鬧抹完眼淚繼續做
https://hkofficedaily.com/?p=15034
對面同事怨氣重不斷爆粗鬧空氣
https://hkofficedaily.com/?p=17853