我公司下星期就會全面正常返office，坦白講係開心㗎，唔係因為我好鍾意返工，而係Work from Home嘅期間同老婆日日喺屋企對住，磨擦多咗好多，不過我哋嘈嚟嘈去都係一件事，就係生BB，兩個人之間始終冇共識。
老婆好想生小朋友，但我唔想，點解拍拖唔嘈，結婚唔嘈，係要去到呢一刻先嘈？因為老婆今年踏入35歲，雖然四十幾五十歲懷孕大有人在，林志玲已經係47歲高齡產婦啦，但你知傳統嘅講法係35歲之後生BB有較高風險，例如出現妊娠糖尿、高血壓、夭折，或者有唐氏症嘅機會率亦較高，所以老婆呢一兩年就好著緊想生。
我自己條路都唔平坦，不過見到公司班90後仲慘，科技進步只係多咗娛樂，80後70後60後肯學一樣享受到，但係呢一代嘅人淨係講搵工都難咗好多，時代又好，時勢又好，以前搵工相對上比較容易，而家無論你係junior定senior都好難，早排公司請咗個醒醒目目嘅後生仔，原來佢之前搵工都搵咗幾個月。
唔係想比較，我後生嘅時候真係多啲機會，而家呢個世代想出人頭地好難，資訊發達嘅好處係消息流通，壞處就係好容易被複製同偷橋，即使係做生意，你有條好橋，轉個頭大集團即刻照辦煮碗用銀彈造勢宣傳，然後各區開分店，咁你小店邊有得做，仲有貴租呢，大集團有錢，業主有得揀都唔會租畀小店。
講起租就一定要講埋買樓，當然十幾廿年前嘅樓一樣係貴，因為計返通脹，不過而家嘅樓價真係貴到離晒罩，有個同事喺大西北買咗層樓，400幾萬得200呎，細到喊但已經要孭一世，如果出返市區仲恐怖，動輒六七百萬，樣樣都加但人工其實冇咩大升幅，大學生都係搵緊一萬幾千，當你中中等等二三萬收入好唔好？點樣置業呀？買到樓又係咪贏吖，供完已經變咗舊樓，咁又一世，除非靠父母，否則我見唔到後生上車嘅希望。
你話我成日想當年都好啦，嗰一代嘅老細係有人情味好多，而家……唔講凍薪壓價諗縮數，淨係申請政府嗰個咩保就業資助都用盡蠱惑招，計晒幾時炒先係最抵，請一個人返嚟又要佢做幾個人嘅嘢，你知呢一代又多即時通訊軟件呢，一個msg就幾點都要覆，有幾何放工真係放工吖。
以上都係講一個人出世之後正正常常咋喎，未計個小朋友如果行差踏錯會點，生仔驚佢第時擔子重，壓力大，生女又驚佢唔識諗會蝕底，有時我會諗，自己辛辛苦苦捱咗半世，以為穩定啦，生完個小朋友之後，佢一路長大一路會遇到好多問題，到時作為父母又要陪佢經歷一次，因為你唔可以畀仔女獨自面對，咁就會變咗一個無窮無盡嘅循環。
身邊有啲朋友未生BB之前，實牙實齒講到唔會做怪獸家長，唔會幫啲仔女報乜course物course，最後點？你唔報course唔報playgroup，老婆個best friend對仔女報咗喎，隔籬陳師奶同張師奶嘅仔女都報晒喎，阿仔學校嘅同學仔又報喎，咁你作為父母多多少少就會緊張，到頭來身邊嗰幾個朋友咪又係幫小朋友報course報playgroup，細細個iPad又有電話又有，iPad我都冇呀！
其實我都鍾意小朋友，但係玩人哋嘅小朋友同埋自己生小朋友完全係兩回事，我冇信心呀，個世界愈嚟愈差，如果將個小生命帶嚟而家呢個世界，我驚佢大個咗會怨我，每日辛辛苦苦返工放工搵食，我咁大個人都會懷疑生活嘅意義，或者係自己過份悲觀啦！
公司裡面幾個90後都有啲迷失，佢哋已經好努力，但搵得唔多，未來係點亦都唔明朗，上位好似冇機會，創業亦唔容易，無形嘅競爭好多，社會嘅規範更多，雖然明白老婆點解會想生BB，不過我仲好猶豫，婚姻唔一定要有小朋友先美滿啫，唉，嚟緊返office唔使Work from Home，希望同老婆少啲磨擦啦！
有個90後同事同我一樣寧願快啲返公司，因為佢父母見到佢唔使出去，淨係對住部電腦，有時撳電話，成日覺得佢唔係做緊嘢，係咁叫呢位90後同事生性啲，著緊啲份工，喺呢度都想講講，上一代嘅攰通常係體力勞動，呢一代嘅攰就係心力交瘁同精神折磨，各有各難處，工作同生活壓力比起「舊陣時」其實有過之而無不及。