愈窮愈見鬼 大耳窿騷擾同事同埋老細

「急聘大量兼職點贊評論員,無需學歷經驗,可在家工作,日薪…….」多唔多人收到呢啲msg?我自己同埋身邊朋友都收好多,平均隔兩三日就有一個,WhatsApp又有,Message又有,TG又有,block完一個,又會有一個,永遠都唔完。

早排我又收到個陌生人send嚟嘅WhatsApp msg,以為又係呢啲呃人嘢,點知個內容無比震撼,係一張相加一段文字,張相係我一位同事嘅身份證,而文字就係:「XXX爭我哋錢唔還,你最好通知佢即刻打比我,如果唔係我哋會有進一步行動。」

完全唔知咩事,不過真係嚇親,十五十六想打畀呢位涉事嘅同事,但係內心有好多疑問同顧慮,另外有個問題都令我好在意,正常借錢唔還都係搵屋企人或者擔保人,點解追債條友會有我電話?呢位同事唔會填咗我個名做擔保人咁大鑊啩?

百思不得其解之際,其他同事已經陸續互send msg探聽,原來唔止我一個收到,係人人都收到,同team嘅同事,我個AM,仲有Manager都收到,Manager仲話老細一樣收到,乜搞到咁大件事呀,欠債會搵到老細㗎咩?定係惡作劇?

然後有同事開咗個新嘅group討論,Manager話:「你哋有冇人收到追數msg,我同老細都收到,老細仲直接打嚟問我個下屬搞邊科?」

「收到呀,不過Glen(當事人)唔似會爭人錢喎,據我所知佢冇不良嗜好,平時就算食飯夾錢都好爽,佢有冇問過大家借錢?」

「冇呀,從來未聽過佢唔掂,其實會唔會係得罪人畀人玩咋?追數會追到公開債仔身份證㗎咩?」

我:「Glen有冇搵你哋,係咪需要同佢傾傾?」

Manager:「我諗緊點講呀,好尷尬,又驚佢真係唔掂問返我借錢。」

妖!咁你Manager就要處理呢啲嘢㗎啦,結果我打去搵阿Glen,了解下發生咩事。

慶幸阿Glen都好坦白咁講返事情始末,原來佢啲屋企人同埋朋友已經收到msg,一直諗緊我哋班同事有冇被騷擾。

Glen:「真係唔好意思,搞到大家,我一陣會逐個同佢哋Say Sorry㗎喇。」

我:「咁究竟咩事啫?點解爭人錢?」

Glen:「一日都係自己蠢,之前做嗰啲咩兼職點讚員,諗住搵啲額外收入,初時真係收到錢,兩嚿水,跟住再做落去,佢哋就話個account如果太多錢同埋新人會lock住,要另外入錢先可以解鎖。」

我:「你唔係真係入錢呀?新聞都有講呢啲係呃人㗎喎!咁你畀人呃咗幾多?」

Glen:「新聞講嘅時候已經太遲,我諗我係最早被騙嗰班,總之冇咗十幾廿萬。真係愈窮愈見鬼。」

我:「乜呢啲唔係呃完錢就逃之夭夭㗎咩?仲咁惡周圍公開你身份證追債?」

原來做兼職被呃錢同埋借錢係兩件事,就係因為被呃錢,所以Glen之後搵咗財仔借貸,唔係正當嘅借錢公司,係類似大耳窿嗰種黑財,而家追債呢班就係財仔,唔係嗰個假兼職集團。

Glen:「嗰時上到去呢間細嘅財務公司,佢其實要兩個擔保人資料㗎啫,但就要睇我WhatsApp,話要睇下啲朋友對話,證明兩個擔保人資料唔係亂填,要知我真係同個擔保人係有聯繫,然後佢叫我show同事對話,仲影埋相,要知我真係喺呢間公司做嘢,所以咪抄低晒你哋嘅資料囉!」

我:「咁真係好惡同埋好唔正規喎,check公司咪最多打去問有冇呢個人喺度做,使唔使抄起晒其他同事contact呀?好唔合理囉!」

Glen:「呢啲大耳窿唔同正常財務公司,係我衰係我蠢,總之而家好麻煩啦!」

聽返阿Glen講,如果正常財務公司,佢可能就咁申請破產就搞掂,而家對住啲大耳窿,破產都冇用,因為對方根本唔按章法出牌,淨係騷擾晒佢身邊所有嘅人已經係一個例子。

Glen冇問我借錢,佢話已經搵緊方法搞掂,希望佢快啲冇事啦,同埋想告誡一下,如果真係有需要,最好同家人開心見誠商量,絕路都唔好借大耳窿,否則情況只會愈嚟愈惡劣同埋一發不可收拾。


今日情侶座都有新文章
《兩公婆容許各有各玩底線係唔准帶返屋企》
https://hkofficedaily.com/?p=21290

error: