早排有個女會員非常難服侍，以下稱佢為Priscilla，每次安排佢同男會員見面之後都例必收到投訴，佢又投訴人，人哋又投訴佢，內容永遠圍繞個錢字，因為Priscilla次次出去連招呼都冇打，已經直接問對方有冇車有冇樓？如果有車，係咩車？如果有樓，係邊度？總之就係身家行先。
其實Priscilla嘅樣貌唔算突出，工作同收入亦只係普通，所以唔明白佢點解會咁高要求，擇偶睇條件當然冇錯，但就有啲離地，而且會白鴿眼，講金唔講feel，又成日打上嚟投訴我哋嘅男會員唔夠富貴，呢間係配對公司，唔係釣金龜公司喎！
我個女同事負責跟進，本來諗住好好地傾，試吓開導Priscilla，點知最後變咗得罪個客，佢哋嘅對話係咁：
Priscilla：「你介紹嗰啲人最起碼要有車有樓，唔係居屋，係私樓，如果冇就唔好幫我約見面，嘥大家時間。」
同事：「有個朋友有車有樓，佢唔係我哋會員，不過單身，揸Tesla，住觀塘凱滙，佢私底下同我講希望將來個老婆係處女。」
Priscilla：「好笑，咩年代呀而家？如果佢鍾意我，就應該鍾意我個人，邊會拘泥係咪處女。」
同事：「咁咪係囉，如果你鍾意一個人，邊會拘泥對方揸咩車，住咩樓。」
Priscilla：「冇車冇樓點嫁呀？咁我想問下喇，你朋友係咪處男吖？」
同事：「唔係。」
Priscilla：「咁仲好笑，佢唔係處男，有咩資格要求我係處女？」
同事：「咁你有冇車有冇樓？」
Priscilla：「我就係冇，先至希望另一半有。男人同女人唔同，佢係男人，就一定要有車同樓，呢啲係最基本要求。」
同事：「啱呀，男女大不同，正如你冇車冇樓都要求佢有，咁佢唔係處男，又要求你係處女，道理咪一樣。」
結果Priscilla一怒之下決定唔再join我哋任何plan，唔再經我哋公司做matching，後來我將呢個經歷同另一位女member分享，本來係想當笑話講，順便灌輸下正確嘅交友配對心態，點知我呢位女member聽完之後心事重重，喃喃自言咁講咗句：「乜而家處女嘅value值一層樓咁貴？」
我話同事只係比喻啫，冇話處女就值一層樓嘅，點知我個女member又講咗句：「死啦，我有車有樓，但仲係處女，咁點算？」
……
其實兩個人一齊，最緊要係睇夾唔夾？開唔開心？理念係咪相同？有車有樓係附加上去嘅快樂（其實供樓都未必快樂），搵到適合嘅人，自然就有推動力驅使自己進步。
學渣渣輝話齋，有啲嘢你而家無，但係將來會有……處女膜另計。