「Janice，我哋而家有乜嘢位請緊人？」正當我埋頭苦幹嘅時候，今朝明明返咗嚟，但又突然消失咗兩三個鐘嘅老細，失驚無神行咗去我個位，佢身後仲有個女仔，好生面口唔知乜水，表情有啲錯愕。
咁我作為一個HR，當然要嗱嗱聲回答老細嘅提問：「而家請緊一個Solution Architect，一個Business Analyst，一個IT Support Analyst，一個E-Commerce Specialist，另外有個Data Engineer已經final round，應該呢個禮拜confirm㗎喇。」
老細聽完皺眉，轉身問佢後面個女仔：「你係咪未做過呢啲？」
個女仔面有難色，但仍然微笑回應：「唔好意思，我未做過，唔緊要啦，真係唔使勉強。」
老細望一望我斜對面前排個空位，好似有道耶穌光打落去魂精咁：「Janice，呢度本來係咪有個女仔？我記得好似辭咗職。」
我：「係呀，Eunice吖嘛，早幾日last day，不過我哋未出job ad請人，等緊Account嗰邊。」
並非刻意隱瞞，而係嗰個月嘅招聘廣告credit啱啱用晒，要同Account攞budget再買package，係要請返個HR Officer，不過未出稿。
老細：「咁得喇。」然後佢示意身後個女仔坐落去個空位：「你就喺人事部做啦！」
喂喂喂喂喂，咩事先得㗎？咩叫你就喺人事部做？雖然你係老細，但個人事部係我in charge喎，擺個皇親國戚入嚟做都早啲單聲吖，而家霸王硬上弓呀？個女仔咩背景我都未知。
緊接落嚟老細叫咗我入房，原來呢個女仔唔係皇親國戚，仲要係啱啱先識。
老細：「我阿媽有腦退化症，今朝走失咗，賓妹帶佢落公園散步但自己顧住玩電話，我知道之後又嬲又擔心，嗰陣阿媽已經唔見咗超過一個鐘，後尾有個人打嚟，話我阿媽蕩失路，走咗出馬路企喺正中心，差啲畀車車親。」
我：「就係頭先個女仔搵返？」
老細：「係呀，好在阿媽有部老人手提電話，set晒屋企人number做快捷鍵，個女仔先可以搵到我，仲講埋當時地址叫我去接阿媽。」
我：「好在咋！」
老細：「我見阿媽隻手已經整損咗，又講唔出點解整親，如果唔係呢個女仔咁幫忙，事後仲不斷安撫我阿媽，後果真係唔敢諗。」
我：「不過唔好意思呀老細，你頭先話叫佢喺人事部做……即係點？」
老細：「哦，件事係咁嘅，個女仔頭先為咗等我去接返阿媽，差唔多等咗成個鐘都唔敢行開，原來佢本身係去緊見工，結果過晒鐘去唔到，我覺得自己要為佢做返啲嘢，你當我報恩啦！」
我：「原來係咁，佢做過HR？」
老細：「唔知喎，聽佢講好似去見Sales，其他就冇問喇，不過頭先車佢嚟公司嗰陣傾咗幾句，個女仔搵咗工幾個月都冇回音，總之你幫幫佢啦！」
咁即係搵著我嚟搞啫……
我：「O…K…請問佢叫咩名？」
老細：「我冇問呀。」
我：「介唔介意我係咁易in下佢？」
老細：「唔介意，不過in成點都好，你一定要請佢，我唔想失信於人，唔同你講住喇，我要炒咗個賓妹先！」
聽到我公司啲空缺，好明顯係做IT同E-Commerce嘅範疇啦，唔識就係唔識，冇得夾硬請㗎喎，唔係阻住老細報恩，不過basic knowledge都要啩！
循例同個女仔做interview，終於知道眼前人叫阿Yen，同時知道佢原本係去見某化妝品牌嘅Retail Sales，之前嘅工作經驗就係售貨員、 售貨員，同埋售貨員，而且學歷程度係F.5，我冇歧視，不過公司嘅HR Officer要求大學程度，最重要係相關經驗，老細你咁樣即係為難我啫。
雖然一定要請，但為咗清楚阿Yen嘅能力，我都叫佢簡單用英文介紹自己，講下之前嘅工作經驗，亦細心地講解HR Officer要做啲乜嘢，始終阿Yen臨時臨急嚟見工，呀唔係，應該係臨時臨急嚟返工，應該完全唔知工作內容㗎啦！
英文自我介紹嗰part，睇得出阿Yen有盡力，不過就甩甩咳咳，佢有say sorry話好緊張同埋冇準備，正常嘅，都係十幾分鐘前先知道要in呢份工啫。
阿Yen：「其實呢……我知道自己做唔掂，因為完全唔識，不如唔好勉強啦，頭先幫個婆婆唔係要換份工，因為我爺爺都有腦退化，或者幫我同你老細講，我ok㗎喇，唔打擾你咁耐。」
唔好啦！聖旨嚟㗎！老細啱啱先炒咗個賓妹，唔想佢手起刀落順勢炒埋我呢個HR Manager呀！
我：「傻啦，老細請你一定有佢嘅原因，邊做邊學囉，睇下自己適唔適應先啦。」
阿Yen：「真係可以邊做邊學？」
我：「係呀！」
你做唔掂自己辭職，同我未畀機會就踢你走，兩者係好唔同㗎！畀個面我，試一試份工好冇？最多每次in人畀你sit in一齊聽，聽住嚟學，未學識之前就做啲簡單paperwork，女仔做文書嘢應該好快上手嘅。
阿Yen：「多謝你哋，其實我一直想做文職，但係F.5畢業……我會畀心機學。」
話雖如此，阿Yen返咗一個星期工已經好吃力，佢仲同我講，跟我入房學in人雖然唔使出聲，但係齋旁觀已經好緊張，幫手出email通知candidate見工時間地點嘅時候，頭頭尾尾嘅英文怕寫錯文法，驚會影響公司形象。
第二個星期，我收到阿Yen嘅辭職信。（未完待續）