關於利是嘅post最近已經出得太多，篇篇一千幾百字再睇就悶，不過Facebook inbox同埋IG DM仲有一啲好趣怪嘅遭遇，趁住長假期完結前嚟個大晒冷，新年事新年了！好唔好？（唔好都唔得啦，我輯晒出嚟……）
1 ) 我上司初四嗰日派利是，因為個利是封有佢嘅姓，仲要唔係大姓，所以唔使記住都認到。有同事靜雞雞拆咗，係$100，另外幾個同事都跟住拆，一樣係$100，點知到我拆嘅時候竟然係$20，連嗰位入職唔夠三個月嘅新人都係$100，你覺得上司係特別唔鍾意我，還是純粹派錯呢？
2) 今日返到公司，其實禮貌上都會見人就講恭喜發財，但係有個男同事突然好嬲咁話：「恭咩喜呀？離咗婚喇，冇利是派！有咩好恭喜呀？問第二個啦！」我當時嚇親，一來佢好惡，二來唔知佢係認真定點樣，因為事前冇聽過，可能佢心情真係好差啦，搞到我都好無奈，其他同事向佢講恭喜發財之後嘅遭遇都一樣。
我相信冇人為咗唔派利是而咒自己離婚，希望呢位同事嘅心情會平伏返啦！新年流流好難避免人哋講恭喜發財，大家都冇惡意，亦唔會清楚佢嘅私事，更加唔會斟酌咩離婚都要派一首等等嘅傳統。我自己都結咗婚，聽恭喜發財就好似聽人同你講早晨一樣，如果咁都躁底不如考慮下休息幾日，當係畀耳根清淨下囉，其他同事都無辜㗎嘛，唔通每次恭喜之前問一問人離婚未咩？
3) 公司個Admin想學人玩風趣，點知變咗派膠，佢出咗個email畀全部同事，標題係「利是等級指引」，內容詳列唔同職位嘅已婚同事，最低消費應該要派幾多錢利是：Department Head（min $100)、Project Manager (min $100）、一般Senior (min $50)、Clerk（min $20)，郵件最尾仲要話「記得唔好畀硬幣呀！唔收㗎！」結果呢封email冇人知個笑點喺邊，不過就激嬲咗好多人。
連單身嘅同事都識得講，派利是係一份心意，點解要分職位等級同埋指定派幾多呢？咁樣做真係好肉酸，呢啲嘢私底下可以當講笑，出email會唔會玩大咗呀？由於件事啱啱發生，又冇cc老細，所以大家都諗緊係Admin自己玩膠，抑或老細先係幕後軍師，無論如何，出呢啲「利是等級指引」都係極之唔恰當。
4) 我哋條team有8個人，1個係阿頭，一個係 Supervisor，另外嘅人都係普通Sales，話說 Supervisor派$100利是畀我哋，反而阿頭派$50，其實對大家嚟講冇咩所謂，都係咁收啫，點估到阿頭知道後嬲嬲豬，叫咗Supervisor入房傾足15分鐘。
聽返 Supervisor講，阿頭覺得佢係第二把交椅嘅角色，唔應該功高蓋主派$100，又話咁樣做壞規矩，自己派$50相比下唔夠大體喎！（咁你咪跟住派$100囉，全team得個幾個人，差幾遠吖，點解要控制人哋唔可以派得多過你）
Supervisor又係衰嘅，佢知道阿頭有個仔，所以畀咗兩封利是轉交小朋友，點知阿頭喺房拆開見到係$100，叫佢唔使咁客氣，Supervisor就話畀我哋都係$100，跟住阿頭就覺得自己畀$50好冇面……痴線！
5) 我有個同事派利是，返屋企拆開見到係海港城coupon，已經吹到啤一聲㗎喇，再睇清楚啲，coupon嘅有效日期係26.01.2022，有冇搞錯呀？我覺得你咁樣不如唔好派啦，好小家呀！唔係嬲你冇入真錢賺少咗利是，而係咁樣玩同事有乜謂呢？
其他人都係收到佢嘅海港城coupon，有50/100/200，不過全部都過晒期，我寧願你攝張紅紙寫住財神兩隻字，起碼係意頭吖，以免你話我誇張同老作，已經附上照片證明真有其事。
（編按：呢個post張相就係讀者提供嘅真實coupon原圖）