好多公司裁員或者炒人嘅時候都會搞到好唔開心，又或者係滿城風雨，但係我間公司嘅善後工作真係做得好好，基本上雖然走嘅同事都冇怨言，我哋成班人仲話簡直係「笑喪」，冇計啦，苦中作樂，大家算好睇得開㗎喇！
裁員消息約莫4月傳出，老細交由每組department head各自宣布，首先佢哋會畀你覺得就算裁員，並唔代表你特別廢或者冇用，只係有其他考慮先至會作出呢個決定，舉個例，有位做咗超過10年嘅Admin叫Maggie，佢唔止走得好開心（講到好似死咗咁🙈），仲搵到人生第二個事業。
Maggie 50幾歲，佢平時好好人，成日煮定啲嘢拎返嚟請公司同事食，幾年前仲叫晒我哋去佢屋企拜年，順便試下佢嘅手勢，有一味「齒留香雞翼」食到所有人回味無窮，到今時今日仲講緊，原來Maggie個爸爸以前係大廚，去過日本做廚師，高級中華料理嗰種餐廳。
Maggie成日話自己煮嘢食唔及爸爸5成，但係我哋已經覺得好好食喇！
老細話裁員名單包括Maggie嘅原因係，一來薪高，二來私底下雙方傾過，不如將budget留畀幾個後生仔，而原來老細都鋪定一條後路。
老細有個富貴friend開私房菜，由於生意喺疫情後期比想像中好，一直想請多個人幫手煮，老細就問Maggie有冇興趣試下，佢個friend開嘅價係人工加埋訂枱分紅（詳細當然唔知佢哋點計），得出嚟嘅人工仲高過之前喺office😅
Maggie曾經講過好想學爸爸一樣做飲食，但係平時喺屋企煮就冇壓力，出去做就唔同玩法，加埋做咗文職幾廿年，揸鑊鏟搵食怕唔適應，所以私房菜地方細細人少少，對方仲要係老細個friend，所以態度好nice，結果就答應咗去做。
由office轉去做私房菜，究竟係咪真係適應同開心呢？我哋班同事有分批去探Maggie兼順便食飯，「齒留香雞翼」都有加入菜單，水準繼續保持，佢又做得好愉快，仲話估唔到50幾歲先搵到第二個事業，因為係轉行唔係轉工，其實咁都唔錯吖！
老細唔止幫Maggie搵新工，仲有幾個同事佢都介紹咗畀行家同朋友，因為啲人係畀面老細，基本上全部唔使interview就請（當然都要上人哋公司見下，不過就冇做test同埋過程好easy），我自己就係其中一個受益者。
我被介紹去老細以前一個大客嘅公司，見工過程我懷疑連3分鐘都冇。
「你使唔使抖下先返工？」
我：「都唔使，我隨時ok㗎！」
「咁你下星期一返啦！到時搵HR幫你搞啲手續就ok！」
我：「多謝你……你使唔使問下我工作經驗或者聽下我介紹自己？」
「唔使啦！大學畢業，仲叻過我，工作經驗就曾經幫過棠哥（即係老細），咁你又識講嘢唔係十問九唔應嗰種，咁咪得囉，仲有咩好問呀？下星期返工啦！！」
無可否認，對方係因為我老細先至開晒綠燈，不過佢呢個請人嘅思維都唔錯吖，如果我哋平時去interview都係咁順利就好喇。
仲有一個年紀比Maggie更大嘅同事話想休息下再算，佢喺度做得比Maggie更耐，不過就經常話冇信心同啲後生仔爭，因為佢慣咗公司啲模式同system，自言有啲電腦應用技巧同埋認識都麻麻，老細竟然幫佢畀晒錢報咗個course，類似係嗰啲再就業培訓，係私人機構搞，叫佢讀完再睇下有咩需要幫忙。
其實老細又未致於勁到可以安排晒全部被裁同事嘅後路，但係仲有啲department head好有心，主動搵啲vendor推薦，據了解有幾個已經順利過檔，so far好似得兩個被裁嘅人係未有嘢做，而嗰兩個只係分別因為考慮移民同埋想幫屋企手，所以先至未決定去向。
講真每間公司裁員都有自己嘅原因，問題係態度同埋善後工作做成點，希望呢個累死好多人嘅疫情過咗之後（記住，係啲政策累死人，唔係病死），我老細嘅生意可以有好轉啦，職場好細，話唔定將來有緣同佢做生意或者再做佢員工。