公司有一對孿生姊妹同埋孿生兄弟，我唔知呢個機率係幾難先會出現，反正我真係遇到，而家當然講得輕鬆，但最初入嚟做唔知頭唔知路係嚇親，首先我係同孿生阿哥同team，唔畀名喇，以下直接叫佢做阿哥，咁樣聽起嚟會冇咁亂。
第一日返工係阿哥帶住我做嘢，呢頭佢講完公事，我就去個廁所先啦，一打開男廁度門又見到佢，我好唔爭氣咁原地輕微彈咗一下，頂你個肺呢條友係咪「神行步」，我行出office嗰陣佢仲喺個位，轉個頭佢快過我入嚟廁所？
一度懷疑公司有第二條路可以直達廁所，不過冇理咁多啦，仲同佢講咗句：「我出返去會試下入幾份資料㗎喇！」
佢冇應我，只係望咗我一眼，呢個係我喺不知情底下第一次見晒孿生阿哥同細佬。
然後輪到孿生姊妹，其實我到而家都唔知第一日返工喺pantry撞見嘅係家姐定個妹，只知係一個好nice嘅女同事，大家打咗個招呼，當時我斟緊水，然後先輪到佢，一出pantry行咗幾步又見到「佢」出現，不過坦白講，呢pair孿生姊妹就未去到餅印一樣，但我都嚇咗嚇，心諗呢間公司啲女仔個個咁似樣嘅。
同日又係孿生兄弟嚇我，隔籬位個「阿哥」仲生勾勾坐咗喺度，無啦啦前面有個同事行埋嚟遞隻mouse畀我，因為我第一日返工發現隻mouse係虧嘅，HR幫我叫咗IT換。
我：「唔該晒！」仲以為係「阿哥」咁好拎埋畀我，即刻望一望側邊，「阿哥」仲坐喺度，遞mouse畀我嘅「細佬」今次有自我介紹。
細佬：「我哋孿生兄弟嚟。」
個大哥望住佢細佬講：「返入去啦，咪嚇親我新同事呀！」
其實佢兩個係互相講緊笑，睇得出兩兄弟感情好好，我亦都自認頭先柒咗，喺廁所認錯人仲打招呼交代工作。
阿哥：「唔緊要，你新嚟一定認唔到，睇真啲，我靚仔過佢好多㗎！」
細佬：「食屎啦你！」
我：「原來你哋係孿生，唔怪得啦，頭先我以為撞鬼，另外仲見到兩個女同事差唔多樣，心諗，呢間公司請人係咪有乜嘢喜好呢？因為好似人人嘅style同外型都好相似，仲煩緊第日要點樣認到同事，而家睇返你兩個著嘅衫都唔一樣，真係要睇清楚先發覺。」
阿哥：「你係咪講Sharon同Venus呀，佢哋都係孿生姊妹嚟㗎！呢間公司有兩對Twins！」
嗰陣我未識邊個係Sharon同Venus，但照計就係講緊pantry入面同出面嗰兩個好似樣嘅女仔。
細佬：「你第一日返工唔認得好正常，呢度好多同事到今時今日都會搞錯。」
阿哥：「我老婆就易認啲，個樣惡好多。」
細佬：「嗱，你自己講咋！」
阿哥：「係講佢又點呀！」
咪住先，你老婆又係邊位呀？
原來Sharon同Venus孿生姊妹之餘，Sharon亦係阿哥個老婆，不過咁樣未算經典，最正係細佬都娶埋另一個孿生阿妹Venus，即係孿生兄弟娶孿生姊妹，仲要係同一個office裡面發生。
唔好喺辦公室談戀愛？佢哋打孖再打孖上呀！
究竟公司點樣請到兩pair孿生嘅員工呢？聽返佢哋講，始祖其實係阿哥入嚟先，佢同IT啲人好熟，會一齊打機，後來知道IT想請人，細佬又係做呢瓣，跟住就介紹咗入嚟做，兩兄弟同一個office不過唔同部門。
細佬入咗嚟，跟住就介紹Venus入嚟，未做同事之前佢哋已經拍緊拖，好似話係一啲Twins嘅群組認識，然後Venus又介紹家姐Sharon入嚟。
孿生阿哥之前就唔識Sharon嘅，係大家做晒同事之後，放工兩pair孿生成日約埋一齊食嘢，因為Venus想照顧家姐，而孿生阿哥就夾硬死跟，結果溝埋人哋家姐，變咗孿生兄弟同孿生姊妹同時間拍拖，佢哋畀過結婚相我睇，原來兩pair人仲要一齊搞婚禮，呢度好多同事都有出席，不過咁樣未算究極。
孿生姊妹同孿生兄弟唔止一齊做嘢，一齊擺酒，佢哋4個人更加一齊住，其實我曾經衰衰咁想問一個問題，就係喺間屋裡面，究竟會唔會搞錯……死，我個腦諗埋啲淫亂嘢。
基本上所有職場禁忌都畀佢哋犯晒，同同事拍拖、介紹屋企人入公司做、搞同事女朋友家姐🙈仲未計私生活方面兩兄弟兩公婆一齊住，呢啲全部都係反面吵大鑊嘅前奏😅但係孿生兄弟又真係幾好人幾nice，平時都好多交流，希望佢哋繼續幸福，同埋返到屋企唔好認錯人入錯房上演啲咩近親相姦啦🤣