地點：中上環區一間扒房；時間：放工後晚飯；人物：Manager+我+兩個客；其實以我呢個做咗3個月唔夠嘅新人嚟講，係未需要跟埋一齊去同客食飯，不過有同事請病假，另外又有人清緊假去咗旅行，蜀中無大將，Manager嗰晚就叫埋我去。
以上都唔係重點，直接跳到關鍵位，食到尾聲嘅時候我去toilet，個Manager又跟埋嚟，原來係有嘢想同我講：「我有啲事要走先，你一陣幫我埋咗張單先吖，記得keep單喎，返到office交畀我幫你claim，OK？」
我：「唔ok呀！」我真係本能就咁樣答咗，因為呢度啲嘢食唔平，頭先order嗰陣已經見到menu，佢哋嗌到一枱都係，仲要有最恐怖嗰樣嘢 —– 開酒！呢啲地方開枝酒可大可小，佢哋仲要唔止開咗一枝。
Manager：「點解唔ok呀？」
我：「唔係呀，我帶唔夠錢呀！」
Manager：「咁你碌卡囉！」
其實想反問佢一句：「咁你唔碌？」不過我冇，最終只係答：「我張卡得萬幾蚊limit㗎咋！」
唔係想借故推塘，而係我張卡真係得萬幾蚊，我新人嚟咋！
Manager：「萬幾蚊咪夠囉！我計過㗎喇，頭先啲嘢食再加埋啲酒，頂盡萬二三蚊可以落到樓。」
我：「因為我未找晒卡數，而家應該只可以碌到五千蚊左右。」
Manager：「有冇搞錯呀，唔找卡數！Cash呢？你而家出去撳啦，我等埋你返嚟先走。」
係咪痴線㗎！已經講咗張卡唔夠limit，咁都仲未放棄？叫得我撳點解你唔去撳呀？其實講到咁揚，傻嘅都知佢應該係冇錢埋單，卡又碌唔到，連Cash都冇，唔怪得叫埋我去食飯啦，原來有叫我出住先嘅打算。
我：「Cash都唔夠，我戶口都係得千幾二千蚊。」其實我戶口有，但唔知點解意識到有「危險」，講唔出係咩事，總之覺得我出住先就好難收得返，加上呢場飯局裡面我嘅職位同年紀都係最細，你哋幾條友唔係好意思等我埋單啩？我咪睇戲囉！
Manager：「一萬幾千都冇 ？點搞呀你？」
我：「不如你出去撳埋先走啦，我同啲客吹住水先。」
Manager：「我點行得開呀！」
食屎啦你！你行唔開又話要走先？擺明係同冇錢埋單有關啦！
我：「咁而家即係點？」
Manager：「我打畀阿和，叫佢出嚟埋咗張單先。」
阿和係我哋另一個同事，不過唔係同team，好樣衰囉！食飯食到要叫其他同事出嚟埋單。結果Manager真係喺toilet打電話畀阿和，點知冇人聽，呢個時候其中一個客都入嚟小解……
客：「喂！搞咩呀你兩個，去咁耐嘅！我老細埋咗單走咗喇，佢趕住走。」個客一路講一路去尿兜小解，我見到Manager個樣直頭鬆咗一口氣。
Manager對住屙緊尿嘅客人講：「埋咗單？喂！我哋請吖嘛！唔得唔得！你哋係客嚟㗎！梗係我公司畀啦！」
得些好意須回手啦！人哋都話埋咗單，你仲走去執個尾彩做咩啫？
客：「有乜所謂吖，公司數之嘛，上次先畀個會計師話我哋太少飯單出數，扣唔到幾多稅，下次飲嘢咪你請囉，好小事啫！」
Manager：「吖！你哋真係好客氣，好！下次我哋直頭落老蘭飲嘢，我請！你老細跳唔跳舞㗎……」
之後嗰啲虛假說話我已經聽唔落去，嗰晚嘅飯局就係喺咁嘅情況下結束。
好似咩都冇發生過一樣，第日如常返工，我只係知道下次Manager再叫我出席飯局就一定要推，不過我相信佢都唔會叫埋我再去，仲好！我唔想返工返到有金錢損失。
咁橋我喺pantry撞到阿和斟水（都唔係好橋，公司有幾大吖），跟住我就問佢：「Hello，噚晚我ger係咪打畀你呀？」開場白係咁上下啦！
阿和：「係呀，你又知嘅？」
我：「我喺側邊吖嘛！」
阿和：「哦，你哋一齊？我特登唔聽㗎，佢搵我咩事？我都費事問返佢。」
聽到阿和嘅語氣同埋咁樣答，我就知道一定有故事聽。
我先確認Manager仲喺位冇行出pantry，然後我就同阿和講：「噚晚勁樣衰囉，食完飯佢話走先，叫我幫手埋咗張單，我話冇錢，佢就話打畀你出嚟幫手找數。」
以為阿和會好驚訝，點知佢只係嘴角一戚冷笑咗聲：「哈，又係咁，佢唔係第一次㗎喇，呢度好多同事都中過招，我都係特登唔聽佢電話，不過我唔知你喺度，其實知道都唔會聽，因為佢打親嚟都冇好嘢，最後張單幾多錢？」
我：「唔知呀，因為係個客找數，阿ger話開咗幾枝酒，四個人又四個set，應該萬鬆啲喎！」
阿和：「佢真係short short哋，萬鬆啲想搵我出去埋單，幾嚿水我都唔會幫佢啦！仲好意思叫個細嘅埋單，叻仔呀你，千祈唔好幫佢畀錢。」
個故事原來係，我個Manager周身債，大家都唔知佢點解成日冇錢，有問其他同事借（有啲冇還，有啲還咗部分就冇下文），另外我公司如果出去同客食飯係有得claim，佢試過叫有出席飯局嘅同事出住先，但就自己拎張單走去claim（因為要對應邊一條team同客食），claim完錢又唔畀返同事……好在我張卡真係唔夠limit，呢單嘢簡直逃過一劫。