年頭失業，搵咗工3個月都冇著落，究竟係經濟差，定係我條件差呢？
因為屋企有啲負擔，已經唔容許我慢慢搵，所以馬死落地行去in某超市嘅顧客服務助理，佢嘅職位要求只需要中學程度，仲強調經驗不拘，咁我諗住自己大學畢業，上一份又係大公司，應該綽綽有餘啦～～
原來係我一廂情願，見工嗰陣不斷被對方質疑：
「驚你做唔長喎！」
「你都係搵唔到工做住先㗎啫！」
講真佢又錯唔晒，只係唔明點解先入為主，但仍然叫我嚟見工。
時間一日一日咁過，經求職網send出去嘅CV又好似入咗黑洞咁，我唯有再退一步，睇到間粥粉麵店貼住張紙喺門口請樓面，跟住就膽粗粗行入去話想見工，今次我報中學畢業，之前做炒散，得少少樓面經驗……其實我冇，但我知樓面一般冇reference letter，亦應該唔會reference check，當然唔會提自己曾經喺大公司做文職啦，結果佢哋真係請咗我。
有樣嘢幾悲哀，樓面份糧原來同我之前份文職差唔多（我之前份工都係junior level），我明白長遠嚟講，返文職嘅薪金增長會多好多，但目前最緊要係解決燃眉之急。
個人認為文職同樓面嘅分別係，文職精神勞累，樓面就係體力勞累，各有好壞，各有難度，擺喺我眼前嘅問題始終係金錢，所以我絕對唔覺屈就。
有時我會諗咁樣算唔算虛報學歷，不過又唔係吖，我呢啲最多叫「唔報學歷」啫！而且呢份樓面都做咗5個月，唔算過橋抽板啩！
最近慢慢pick up返再搵文職，希望年底前可以搵到，分享呢個經歷唔係鼓吹見工講大話，我只係覺得點都keep住有份工，keep住有做嘢，成個人就唔會咁頹，總好過日日等運到令自己愈嚟愈庸懶，愈嚟愈冇自信，多啲接觸下外面嘅人始終係好事。