老細叫我搵獵頭公司請人，咁好啦，獵頭安排咗3個人嚟見工，2男1女，其實老細不嬲唔參與interview，但好衰唔衰佢行出行入見到個女求職者幾靚，等我做完interview之後，老細就衝埋我個位講：「頭先條女，請佢！」（
勁似狗公）
我：「你定啲嚟，仲有兩個男仔未上嚟見。」
晏晝見埋另外兩位求職者，無論臨場應對、background、實戰經驗，各方面都喺個女仔之上，不過老細唔要，佢一定要請嗰位靚女，仲笑住同我講：「你唔請嗰條女我就炒鳩你！」
老細平時都係粗口爛舌，所以我哋班同事慣晒，而佢呢句雖然半講笑，但我聽得出係認真，結果無奈要跟老細指示請咗個女仔。
加插一句，大家有時見工衰咗，唔好咁負面認定係自己問題，有時背後嘅原因的確可以好無稽。
入返正題，請咗個女仔，老細好開心，話係視覺嘅享受喎！連粗口都講少咗……
不過條女做嘢真心唔掂，頭兩個星期已經遲到早退樣樣齊，都唔緊要喇，個半月之後條女竟然辭職！
辭職都唔得？得！問題係獵頭公司嘅條款－－－介紹嚟嘅求職者如果喺一個月內唔做或者畀我哋炒，佢哋會免費再搵replacement，而家過咗期限就冇喇！而佣金一早找咗畀獵頭公司！
老細：「你叫獵頭再搵人啦！」
我：「過咗Guarantee Period喇！要再畀錢！」
老細：「搞L錯呀！啱啱過咋喎！你問佢想唔想再做我哋生意？想就免費幫我哋補返個人啦！」
獵頭公司當然冇屈服啦！咁點呀？咪唔用獵頭，改為就咁出招聘廣告囉，條女已經走咗兩個月喇，仲未請到呀！佣金就畀咗幾萬蚊出去，你話係咪On9！