我公司係幫歐洲department store做女裝，亦有另外兩條line做手袋同鞋，員工每季都有免費衫、袋、鞋任攞，雖然全部屬於大路平實款，又唔係咩奢侈品名牌，不過唔使錢喎，仲有咩好投訴呀？何況話就話係貨辦同埋瑕疵品，其實頂盡只有輕微刮痕，所以大家都當係員工福利。
一般嚟講，公司會將呢啲sample丟去一間房，邊個同事想要就自己攞，唯一條件只係唔好拎出去轉賣，畢竟有brand name，部分款式甚至最後冇推出市場，如果拎去賣怕會影響聲譽，anyway我哋班同事呢幾年慳咗勁多買衫錢。
半年前有位新同事入職，呢條cheap精下下攞勁多，通常大家都係啱心水先攞之嘛，例如高跟鞋，佢一拎就拎十幾對，腳你就得一對，一個月又得30日，每星期拎成十幾廿對高跟鞋著唔著得晒呀？派畀friend都嫌多啦！
以為呢位新同事只係貪小便宜，原來佢拎出去轉賣，仲要擺晒上去Carousell同ebay，小姐你狼到咁，完全無視公司嘅內部規則，最終梗係被發現啦！
佢只係收咗封warning letter，冇炒，不過公司就宣布以後冇得再攞貨辦喇！！！呢啲咪一粒老鼠屎，整臭一鑊粥囉！
後來呢隻Cheap精辭職冇做（唔關呢單嘢事），人就走咗喇，但公司冇開放返畀同事攞免費sample，即係佢入嚟做短短幾個月，將公司由開業至今最吸引嘅員工福利推翻，真係多謝晒呀！