「唔好意思，我想反映下，阿Joe每日朝早返嚟都唔做嘢，我留意咗佢好耐，基本上係晏晝3點先開工，平均做半日嘢都冇，另外Holly同Yuki都係咁樣。」作為上司，我真係聽到呆咗，呢位新請返嚟嘅同事竟然對份工咁上心，臨放工衝入房向我舉報其他人偷懶。
我對住呢位新人有一種好複雜嘅心情， 一來慶幸自己請到個咁盡責同埋咁有要求嘅員工，二來又諗緊佢做乜勁，返咗工兩個星期唔夠就向我打小報告？
隔咗兩日，呢位新人又嚟料，下下都直奔我間房，一嘢就閂門坐低投訴。
「我mark低咗，阿Joe每朝9:30先返到office，然後食早餐食半個鐘，去到10點又去pantry沖咖啡同埋打牙骹，沖杯啡都搞20分鐘，跟住上一上網就去廁所，我唔知佢開大定咩啦，11點先出返嚟，但都唔係做嘢㗎，郁下個mouse，執下枱，搞呢搞路就11:30，再跟住就幫自己個位嘅盆栽淋水，又同其他人吹水，咁就到lunch time喇，食完晏返嚟就遊魂，直至3:00有隔籬部門同事叫佢幫手check嘢先開工，6:00就準時收工。」
呢位新人真係mark咗喺張紙度，我一路安撫佢，一路對佢提高警惕，因為有少少懷疑佢係老細啲親戚，派入嚟監管同事啲工作，又考驗下我呢個上司有冇盡責，不過又唔似吖，佢係我請返嚟，如果老細要插條針喺我department，應該係欽點入嚟做吖，點會咁正式send cv嚟見工呀？
可能你會覺得我呢個上司好廢，點解下屬唔做嘢都唔管，仲要調返轉頭由一位新人去提醒，其實我唔係唔理，只係我想忠於自己一直以嚟嘅管理模式。
我對待阿Joe，Holly，仲有Yuki嘅方式，就係下放落去嘅工作由得佢哋自由發揮，例如我話咗份report要星期五交，咁就唔會理佢哋星期一至四係點做，總之你星期五交到貨就得，過程我唔會問，更加唔會篤住佢哋做。
同樣地，阿Joe佢哋係甚少甩漏，每次都可以準時交到功課，做出嚟嘅嘢亦唔馬虎，我相信佢哋嘅能力之餘，更加相信佢哋會珍惜呢份自由度，只要你唔打破呢份默契同埋和諧，咁咪大家好做囉，junior同senior都係打份工啫，有分別咩？
我都唔係第一日出嚟做嘢，我做細嘅時候最憎畀人管，最緊要我做好啲嘢咪得囉，所以好了解下屬嘅心態，再者，你覺得我未遇過嗰種未到9點就返到公司，唔OT就好似唔安樂嘅下屬咩？Working hour愈長唔代表效率最高，如果你日做12個鐘，星期六日都返埋office做嘢，結果都係交pat屎畀我，咁其實又有咩意思呢？
我都有同新人解釋過自己嘅要求，不過佢仲係keep住每隔兩三日就同我打小報告，最後……我留唔住佢。
「呢封係我辭職信，我覺得公司唔適合我，班同事太懶散。」
我：「咪住先，其實你覺得佢哋懶散，咁有冇加重咗你工作量吖，例如你話阿Joe每日晏晝先開工，佢有冇點你做埋佢嗰份先？」
「阿Joe冇叫我做埋佢啲嘢，不過見到佢哋做其他嘢，我好難專心工作，同埋覺得自己咁勤力好唔抵。」
我好想同新人講，如果覺得唔抵，你應該學下佢哋吖嘛，當然啦，我冇講出口。
基於新人對呢間公司咁多不滿，所以我簡單叫佢諗清楚之後，亦決定唔好強人所難喇，可能佢真係比較適合嗰種全人類忘我工作嘅公司，同埋佢遞信嘅時候……我都一路睇緊YouTube，就係咁啱睇緊你《辦公室日報》講性騷擾條片，好驚佢發現我原來都唔係做緊嘢……
話分兩頭，我係幾欣賞呢位新人咁有鬥心，留唔到佢係我唔夠福氣，但同時覺得一個咁有鬥心嘅人，喺我department有啲氹仔浸蛟龍，衷心祝佢未來有更好嘅發展。
我並冇將新人投訴嘅事向阿Joe佢哋講，唔係包庇，我只係想一班下屬繼續做好本份，準時交貨就夠喇，唔需要做戲，最緊要唔好令我難做，然後我行出去望住Holly同Yuki傾計冇做嘢嗰陣，亦都冇打算走去話佢哋，因為我個心裡面默默講咗句：「有冇一種可能，返工就係應該咁呀！」
心裡面講完呢句，我又走返入房睇YouTube喇🙈 （完）
你哋又睇咗《辦公室日報》最新嗰集YouTube未先？
【辦公室性騷擾】配匙入女下屬屋企偷底褲 趁公司冇人聞高踭鞋
