好多年前，我拎咗幾個避孕套返公司，已經好快手收埋喺櫃桶，點知都係畀一個八卦同事見到，跟住成個部門起哄，話我背住老婆偷食之類，我都費事解釋咁多，總之啲避孕套一擺就擺咗半年。
咁我公司就喺灣仔夏愨道，一落樓行過隔籬街已經有好多酒吧，如果你去過嗰頭應該唔使多解釋，而嗰年嘅萬聖節係閒日嚟嘅，放咗工成班同事貪方便去公司對面間酒吧飲嘢，叫做感受下啲人扮鬼扮馬嘅氣氛咁啦！
好似我呢種有家室嘅人飲咗一兩杯已經走先，留低嘅人之後點玩就唔知喇，淨係知其中一個男同事「搵到食」，成晚都有個鬼妹痴住佢玩，個鬼妹係哥倫比亞人。
第二日返工，呢個同事無啦啦多謝我，仲話會畀返錢我，初初聽到一頭霧水，後來佢解釋因為貪方便，帶咗哥倫比亞妹返office親熱，我問佢點解唔去附近啲時鐘酒店，要鋌而走險返公司呢？佢話灣仔盧押道嗰啲時所謂「別墅」望落已經覺得污糟，最似樣係過幾條街有間維多利亞定唔知百佳（唔係超市），但係個地點搭的士又太近，行路又太遠，去到真係咩火都熄晒，反正當時已經好夜，又肯定office冇晒人，所以先玩到咁刺激喎！
咁又點解要多謝我呢？原來返到office之後，哥倫比亞妹堅持冇condom唔做，我同事本來想keep住團火㗎嘛，又要落街買condom，咁已經違反咗原意啦，而佢忽然醒起我擺咗啲避孕套喺櫃桶，結果就順手拎嚟用，就係咁樣同哥倫比亞妹一夜風流。
隔咗一排，呢位同事話要結婚，因為哥倫比亞妹有咗，當時我個心已經怯一怯㗎喇，其他人又係咁叫佢驗DNA，始終係one night stand，覺得哥倫比亞妹有機會質佢食死貓。
我唔知呢個同事經歷咗咩內心交戰啦，總之最後佢都結咗婚，同哥倫比亞妹生咗個混血兒，個仔仲好鬼死得意，可能係mix嘅緣故，輪廓好靚，大個之後一定溝死女。
我好錫佢個仔，經常都買禮物送畀佢，差在未上契，因為我有個秘密一直都冇講出嚟，當年我收喺櫃桶嘅避孕套係畀人桔晒窿，嗰陣出席咗個朋友嘅party，唔記得點解會有個交換禮物環節，講明每份禮物嘅budget只係$100，結果成班friend喺度互送垃圾，唔係水杯就係相架，最有創意已經係一條女人街買嘅男裝大笨象底褲，而我係收到幾個桔晒窿嘅condom，由於我隨手袋咗落公事包，第二日返到公司先記得，拎返屋企又驚老婆懷疑，所以就求其擺喺櫃桶先，擺擺下仲要唔記得丟。
記得同事宣布同哥倫比亞妹奉子成婚嘅時候仲講過：「我哋嗰晚之後都冇再咩咩喇，估唔到一次就中，啲性教育成日話避孕套唔係100%安全，原來係真㗎！上網睇過有機會係我射完之後太耐都冇拎返出嚟，因為我同佢仲攬住傾咗陣，又可能係我反轉咗戴。」
唔知上網有冇提及如果避孕套畀人篤穿咗，成功懷孕嘅機會又有幾多呢……
其實只要佢細心啲睇，係唔難發現嗰幾個避孕套中間有個窿，如無意外，當晚佢喺Office應該係冇開燈搞嘢，又或者喉擒到完全冇留意。
所以我一直以嚟對萬聖節都冇乜好感，仲覺得同事個仔係我有份，無啦啦將個小朋友帶嚟呢個世界，其實我都有責任，好在佢同哥倫比亞妹結婚後幾開心，我嘅罪疚感先冇咁大。
投稿讀者：Andrew