搵唔到工，Send完CV見都冇得見，唔想賦閑在家坐食山崩，我搵咗份茶餐廳侍應做住先，幾日之內已經見過好多西客同埋奇怪人，喺香港做飲食業真係有種冤冤相報何時了嘅感覺。
我平時做食客嗰陣，都會覺得有啲餐廳嘅侍應西口西面，入去食嘢好似欠咗佢哋幾百萬咁，但係到自己換個角色做侍應嘅時候，其實都會明白點解香港啲侍應咁忟憎，佢哋未必想咁樣，而係因為西客比想像中多好多，唔好話做服務業吖，就算你返office做文職，有時畀西客激完心情都會差啦！
講下我自己遇過咩西客先，有次個客叫午餐茄汁豬扒飯，佢問有幾多塊豬扒，我哋係細size豬扒兩塊，跟住個客咁講：「一塊要煎，一塊要吉列，幫我切，要另上，唔好鋪埋上個飯度，仲有多汁吖。」
介紹返，我呢間係茶記，個午餐豬扒飯50幾蚊連一杯飲品。
我：「唔好意思，我哋唔會有兩種煮法，set好咗，吉列豬扒飯就要散嗌，但一碟飯兩塊豬扒都唔會有兩種整法。」
雖然個女人最後都死死地氣要返個午餐，即係普通煎，但全程喋喋不休鬧咗好耐，同埋普通煎都堅持要你切好晒畀佢。仲有另上。
西客得一個半個？食一餐要轉幾次位嘅客我都見過，入嚟嘅時候因為好full得一張枱，有一家人西住面咁無奈坐低，唔係唔畀你哋揀呀，當時成間茶記得返一張枱，咁唔願意咪等陣先囉，你哋又要怕執輸，又坐得唔順氣，然後落完單隔一陣有另一枱人走，佢哋成家問都唔問就自己轉枱，先唔計你落咗單搞到好麻煩，我哋侍應執生好小事，但可唔可以畀我哋執好張枱先呀？
再坐咗一陣，佢哋啲嘢食嚟晒，然後叫我埋去，話要再轉入啲嗰張，話嗰張大啲喎，OK，再轉，再幫佢搬晒4個餐4個湯4杯嘢飲過去，食食下見到又有另一枱走，嗰家人又話要轉過去，因為風口位冷氣太大。叫4個常餐轉幾次位，你地平時去米芝蓮餐廳係咪要侍應幫你奶埋鞋底？
講開冷氣，有次個阿姐入嚟食嘢，佢話冷氣太凍，叫我哋熄晒全間餐廳嘅冷氣，呢個世界得你一個咩，出面30幾度，大把客流緊汗呀！不如你包埸啦好唔好呀？
最經典係有個連廣東話都未講得正嘅大媽，佢三日唔埋兩日就會約人落嚟食嘢，醉翁之意在傳銷，我親眼見住佢係咁sell洗頭水護膚品，叫人join佢公司，又唔知點樣上線下線咁樣，嗰堆對白一星期聽咗佢講三次，啱啱嗰次佢約咗個女人過嚟又起勢咁sell。
大媽：「呢隻洗頭水好呀，我老公用咗之後頭髮多咗，白頭髮都冇晒，做會員有7折，好抵！」
女人：「哦，係呀。」
大媽：「做會員你可以拉下線，叫朋友買嘢入會，佢開單你又有錢分，愈多朋友入會，你就印印腳等收錢。」
女人：「哦，係呀。」
大媽：「我同你講呀，我而家個團隊都有十幾人。」
女人：「哦，係呀。」
大媽：「我個團隊呢一兩年賺好多呀，一通關就諗住成班人去北京旅行，去萬里長城呀！」
女人：「哦，係呀。」
大媽：「團隊入邊已經有人買咗樓買咗車，一年咋，一年就有咁好成績。」
女人：「哦，係呀。」
大媽：「人生要有目標嘛，你都唔甘心一世打工，係咪先吖？打工賺得幾多錢吖。」
女人：「哦，係呀。」
大媽：「我畀你睇下我老公同個仔張相，你睇下，嘩，用咗呢支洗頭水，頭髮幾多呀！嘩，幾濃密呀！好後生係咪？嗱，呢個係我個仔，佢食咗我公司隻維他命C，幾高呀！10歲咋！咁高呀！我買咗半打畀佢，驚之後加價嘛，成日斷貨㗎！」
我以為個女人受到疲勞轟炸，淨係識得講係呀係呀，點知經典一幕出現。
女人：「你老公好靚仔好後生喎，你個仔好得意，第日一定有好多女仔鍾意佢。」
大媽：「係呀，而家都話有女同學追佢。」
女人：「咁你有冇買保險呀？我之前有個朋友去照胃鏡，咁樣都用咗幾萬蚊，佢又冇買保險，我見到都肉痛，賺錢咁辛苦，少少病入醫院就冇咗幾萬蚊好唔抵！」
大媽：「咁貴？去政府醫院咪唔使囉！」
女人：「政府醫院排好耐，我有個朋友之前check到朱古力瘤，政府醫院排期做手術要一年後。」
大媽：「咁耐？」
女人：「買咗保險就唔驚，我個客之前有癌症，手術費幾十萬，我公司唔使一個月claim晒畀佢，快到呢！」
大媽：「我仲以為保險要搞好耐。」
女人：「第二間就係，我哋公司好快，最好買埋個至尊住院，政府醫院同咁多閑雜人一齊住，唔病都變有病啦！呢個至尊住院就唔同，有咩事唔使講嘢，直接入私家醫院。」
大媽：「咁幾好喎！」
女人：「係呀，特別係你賺咁多錢，冇理由辛辛苦苦搵錢返嚟醫病，你而家條命貴呀！醫療呀住院呀一定要有齊保障，你都唔想老公同個仔擔心你，上次咪問咗你幾多歲嘅，我設計咗張保單畀你，你睇睇吖。」
原來呢個女人都唔係省油的燈，sell佢做傳銷？佢一早準備sell返你保險。我最後見到嘅一幕係大媽簽咗好多個名，買咗兩份保險，我聽到一份係有儲蓄成份嘅危疾，另一份係住院醫療之類，話年繳有discount，total 四萬幾蚊，碌卡，我望到個女人拎住大媽張信用卡，用佢早有準備嘅一枝鉛筆係張單到掃掃掃，印咗個卡面出嚟，禮成，大媽就咁買咗幾萬蚊保險。
點解我咁清楚？因為我當時坐咗喺隔籬枱用膳，好好睇呀！正過煲劇！
講多個，有次個阿嬸行入嚟好大聲咁講：「畀個靜嘅位我，我要同朋友傾偈。」屌你老味全間茶餐廳啲人都好靜，你咪最撚嘈嗰個囉！當時有個corner特登留空，因為要清潔同埋畀員工用膳，唔係唔畀你坐嗰邊呀，一來其他位真係唔嘈，二來入咗個corner位見唔到你，部份員工食緊嘢樓面唔夠人。Anyway，阿嬸死要坐入去，然後話隔籬枱食嘢班員工講嘢大聲嘈到佢，又係咁叫食緊嘢班伙計幫佢拎呢樣拎嗰樣，人哋得嗰一陣食飯咋，阿嬸你唔好咁啦！
最近我終於搵返份文職喇，前後都係做咗茶記侍應兩個星期唔夠，估唔到做得個十日八日都見到咁多嘢。
投稿讀者：純粹伙記
茶餐廳其實好多故事，2019年我出過一段稿，講個肥佬不斷游說佢個friend去dup邪骨
《茶餐廳傷心方程式》