做做下嘢，Kelvin走嚟派散水餅，我問：「你唔做呀？點解呀？做得好地地。」
Kelvin：「我都想繼續做呀，但係啱啱Martin同我講過唔到試用期。」
喺我眼中嘅Kelvin雖然係新人，不過做嘢好盡責，好勤力，亦好少甩漏，態度謙虛完全冇問題，咁都過唔到試用期？衰咩？
為咗呢件事，我私底下搵Manager傾，即係Martin，得到個答案竟然係：「佢有紋身。」
我：「吓？」
Martin：「佢見工嘅時候我走漏眼，早排見佢喺個位捲起咗隻袖，我先見到Kelvin右手前臂有紋身。」
我：「但Kelvin嘅工作表現好好喎。」
Martin：「一回事啦，有紋身都係唔正經，正常人點會紋身？身體髮膚受諸父母，而家返文職呀，唔係出嚟行撈黑，古惑仔咩！」
我：「但佢見客嗰陣唔會褶起隻袖啦，會唔會考慮下畀Kelvin過試用期呀？」
Martin：「唔會，我哋出隻廣告大把人send CV嚟啦，求職者排隊排到出尖沙咀，講開尖沙咀，過兩日有個meeting我想你一齊去，你知邊個Carrie啦，好難先同佢schedule到個meeting。」
我：「得，冇問題，到時一齊去啦，有冇嘢要準備？」
由於Carrie係大客，做嘢出名專業同埋嚴謹，所以Martin如臨大敵，Kelvin件事亦不了了之。話時話，我記得半年前同佢sit in齊齊見一個candidate，對方條件唔差，應對更加一流，點知Martin冇揀到，覺得奇怪之餘亦印象深刻，因為嗰位candidate嘅手腕位置有個小紋身，我細佬都有一個差唔多，所以好記得。
兩日後出發去見客嘅時候，我再同Martin確認呢件事。
我：「記唔記得好耐之前同你in過一個男仔，名就唔記得喇，好smart嘅，當時你冇揀佢，其實我覺得好奇怪，而家諗返係咪同佢個紋身有關。」
Martin：「唔記得喇，可能係啩，總之我見到有紋身就唔會請，你代表緊公司，公司係有形象㗎！你會唔會見到誠哥有紋身？會唔會見到李兆基有紋身？你會唔會見到彤叔有紋身吖？出嚟社會做嘢，做生意做實事，旺角砵蘭街就好多黑社會紋身喇，叻人，成功嘅人係唔會搞呢啲。」
我：「外國大把名人同埋富豪紋身喎！」
Martin：「呢度香港吖嘛！」
去到個客樓下，話題亦都結束，我哋等咗一陣就已經入房見Carrie，Martin好似fans見到偶像一樣，不過……著短袖恤衫嘅Carrie，隻手有紋身，Martin握手嗰陣都呆一呆，我就食住個勢講：「個tattoo好靚好特別，係咪有咩意思㗎？」
Carrie：「係呀，係一個聖經故事，個tattoo好多年㗎喇，我最近想紋個新嘅。」
一直都睇唔起紋身，一直都覺得紋身就係撈黑，一直認為成功人士唔會紋身嘅Martin，當然唔夠膽challenge啦，佢好清楚Carrie間公司幾大，每年可以畀幾多生意我哋，只係冇諗過一個人可以假得咁離譜。
Martin：「好靚喎，紋身最緊要有意思。」我想嘔呀！
Carrie：「而家好多紋身都有意思㗎喇，有時係紀念一啲嘢，又或者提醒自己某一啲事。」
我：「我都想紋呀，不過驚公司唔鍾意。」
Carrie：「Come on，咩年代呀，我哋美國總公司大老細Richard同James仲犀利，兩隻手臂都炸晒，好似Prison Break個Michael Scofield咁㗎！」
我：「呢套Prison Break正呀，不過Season 1之後就開始爛，我最鍾意係T-Bag個角色。」
Carrie：「我都係鍾意靚仔，雖然Wentworth Miller唔識做戲，不過我都係睇佢，Martin你有冇睇過？」
Martin：「呀…呢套未睇。」
Carrie：「得閒睇下吖，主角紋咗成個監獄嘅地圖上個身度。」
Martin：「咁咪好型？唔怪得你咁鍾意啦！」
Carrie：「唔係型呀，佢要幫阿哥逃獄先至紋。」
Martin：「好有意義喎！」
後來講返正經野，開完會臨走嗰陣，Carrie同我哋講：「可能下次meeting你哋會見到我嘅新tattoo都唔定。」
Martin：「拭目以待，拭目以待，你而家個紋身已經好正，真係估唔到你哋大老細Richard同James都有，有機會想親眼睇下。」
Carrie：「鬼佬好正常啦，我哋美國總公司應該有三分二staff有紋身。」
Martin：「嘩，好正喎。」
正你個頭咩，如果係正你就唔會搞到Kelvin過唔到試用期啦！又假，又雙重標準，企喺你隔籬真係想作嘔！
紋身故事嚟講呢，點都唔及老細紋咗英格蘭捧盃咁癲㗎喇🙈
《老細係英格蘭狂迷，決賽對意大利之前已紋身》
https://hkofficedaily.com/?p=17973