新年到處人山人海，間間茶記都座無虛席，牆上個牌寫住「繁忙時間，四人座位，請坐一邊」，結果我被安排同另外兩個男人坐卡位。
對面嘅一肥一瘦男人講緊今晚去邊，肥嗰個話：「去dup邪骨啦！」
瘦嗰個答：「唔喇，今晚約咗女朋友行花市。」
肥：「妖，行咩花市吖咁多人，邪骨啦！」
瘦：「唔玩呢啲嘢！」
肥：「次次叫你都唔去，我都唔明你點計數，拍拖都係為咩啫，去個邪骨幾嚿水，你媾女又要行街又要睇戲又要食飯，仲要唔知佢畀唔畀，就算畀，你爆房又要錢，好冇成本效益，我計畀你睇。」
叫人去邪骨可以講到成本效益，犀利！肥佬隨口講咗條方程式出嚟，我嘗試將佢point form列出
邪骨
成本：＄500
時間：你話事
房錢：已包
最終目的：啪啪啪（一定得）
Total：＄500
媾女
睇戲：＄200
食飯：佢話當幾百，無三不成幾就當佢＄300
行街：隨時大出血，食個Tea都要都幾十蚊
房錢：幾百，無三不成幾又當佢＄300啦
最終目的：啪啪啪（未必得）
Total：＄800至＄1000走唔甩，可能唔止
肥：「係咪有數得計呀？價錢最少差一倍，一定有得啪啪啪，時間你話事，仲行乜鬼花市吖！係喎，行花市隨時又跌幾嚿。」
瘦：「唔係咁計㗎，除咗啪啪啪仲有其他嘢。」
肥：「仲有咩吖，你講！你講畀我聽！」
瘦：「唔去喇唔去喇。」
肥：「頂！你真係好掃興！」
瘦仔所講嘅其他嘢係指愛情呀！個人認為肥佬可能曾經痴心錯付，又或者做過水魚，再唔係就百戰百敗受過傷害，所以先會領悟出呢條驚天地泣鬼神嘅「傷心方程式」，希望瘦仔可以堅持到底，唔好動搖啦！