新同事住同一座 每朝返工痴住我

「早晨呀,你係Candy呀呵?原來我哋住同一座㗎?哈,又會咁橋嘅!」出門口返工,人都未瞓醒,一入電梯已經有個男人向我講早晨,電梯裡面唔計我同佢仲有3個人,而家全部都知我叫Candy,定下神發覺對方好熟口面,load咗陣,好似邊度見過。

「早晨早晨!」最穩陣係咁答啦,然後佢讚我好叻,噚日喺公司見過一面就認得佢……哦!記得喇,HR帶住佢嚟我個department打招呼,雖然唔記得佢個名,不過印象中有呢個人,新同事,住同一個屋苑,同一座樓,乜HR咁大整蠱呀!

嗰日我哋一齊搭邨巴,全程車佢都冇停過口,講咗好多佢以前份工嘅嘢,仲有返咗一日工嘅感受,我一定好想知啦!!!最重要係我搭邨巴慣咗瞓覺,而家冇得瞓仲要聽演講同埋畀反應,簡直係痛苦double up,難捱過返工。

呢個朝早冇得喺邨巴補眠,我真係好攰,好在新同事冇考我講唔講得出佢個名,返到公司即刻了解下,原來叫Raymond,唔需要諗咩緣份㗎喇,我28歲,佢唔知幾多歲,不過一定做得我老豆,好似話仲有兩個女,如果係兩個仔都好啲吖,兩個女唔通介紹畀我做朋友咩,我已經好多朋友㗎喇。

一切都只係故事嘅開始,緊接落嚟幾日,我搭電梯冇再撞到Raymond喇,不過就會喺邨巴個站相遇,呢啲返工嘅班次,你呢程miss咗,下一程相隔20分鐘,所以大家搭埋同一班車可以話係梗局。

以前我搭邨巴會希望有個乾乾淨淨嘅人坐側邊,最好大家都係女仔啦,但係嗰段時間我已經冇所謂喇,求其阿伯又好,肥佬又好,求下大家坐我隨隔籬啦唔該!次次Raymond都會遲過我落樓,然後睇住我坐邊度,一上車就坐我隔籬,真係需要咁咩?

「Candy你幾多歲呀?」點解要喺車度問呢啲嘢呀?問女仔幾多歲本來就唔應該咁公開,同埋架車都幾靜,Raymond叔叔又聲如洪鐘,我真係覺得全部人等住我答呀!

我:「做咩咁問呀?」

「冇呀,你應該同我大女差唔多年紀,係喎,我哋逢星期日都會去紅綠燈位嗰間酒樓飲茶,今個禮拜一齊吖,介紹你哋識。」

我:「哦,唔使客氣啦,通常放假我都會瞓得晏啲。」

「咁又係,後生女瞓多啲好,對皮膚好呀!點解我哋住埋同一座,以前又好似冇咩見過你嘅。」

我:「我個樣咁普通,見過唔記得都好正常吖。」

「點會呀,你對眼咁靚,戴住口罩我都認得你喎,如果見過一定記得啦,計我話可能係以前唔戴口罩,呢兩年大家都慣咗戴,所以個印象咪唔同咗囉,一定係咁!我喺呢個屋苑住咗6年喇,你搬咗嚟幾耐呀?」

我:「我都係咁上下。」

「世界真細小呀!可能我見過你阿爸阿媽都唔奇,嗰間酒樓你知唔知轉過幾次手㗎喇,以前好食好多!」

我真係唔想知呀Raymond叔叔!

Raymond每日都會遲過我到車站,所以個格局係佢會見到我上車坐咩位,跟住後發先至坐我隔籬,如是者,我就每朝聽佢想當年,又或者講下政治同世界大事,有時佢會同我講施政報告,有時佢會同我講俄羅斯應該點樣攻烏克蘭,有時會講神州一號點樣升空,有時又無厘頭講胡楓。

其實我試過改搭其他交通工具,但係車程長咗又轉折咗,朝早起身返工已經好辛苦,真係唔想咁。搭早一班車就少咗休息時間,遲一班車又會好趕,救命呀!

後來我又試過照落街,不過唔埋去車站,行遠啲觀察,見到Raymond排緊隊,仲四處張望「搜索」我,個心的確離一離,我特登等到條隊開始郁,跟住就施施然喺遠處行過去跟住隊尾上,上到車即刻低頭,揀個最前嘅位坐,因為唔想經過Raymond身邊畀佢叫住,點知……

「Candy,今日咁遲嘅,幾驚你遲到呀,你畀個手提電話我好喎,使唔使平時叫醒你?」

唔係啩叔叔,你咪坐咗喺後面囉,做咩見到我又行上前坐隔籬呀!阻住其他人上車咁樣好咩?邨巴得一層,空間已經夠晒細㗎啦!

呢種生活過咗幾個月,我已經變到慣咗喇,點知Raymond叔叔有朝突然同我講:「其實我今日last day喇,本身想請你食lunch,不過要同自己部門啲人食,你嗰餐有拖冇欠,反正我哋住咁近。」

有冇嚇親?當然有啦!不過心裡面更加滾動!嗱,我唔係黑心呀,有慰問佢㗎。

我:「又會咁突然既?」

「有headhunt撬我,新公司仲畀埋錢我提早走,提早去返工。」

Good!Raymond叔叔最緊要有好發展呀!冇時間同我食farewell lunch唔緊要,我自己都會食餐好嘅慶祝慶祝。

嗰一刻我面上冇流露出任何喜悅,不過內心就勁yeah!之前嘅困擾一掃而空,終於等到佢辭職喇!

第二日出門口返工簡直神采飛揚,我化咗個靚妝,換咗隻新嘅香水,孭咗個新袋,寓意重新出發,終於可以聽住我最愛嘅林家謙,鍾意喺邨巴小睡片刻又得,放空望下街景又得,突然間覺得個天都特別藍特別靚。

一上車我就開Spotify入去play《特倫斯夢遊仙境》,仲未趕得切聽林家謙唱第一句嘅時候,身邊突然有個人坐低,仲拍一拍我膊頭。

「Candy,幾時同我食飯啫,同你做咗幾個月同事都未食過飯。」

我:「Raymond?你唔係last day咩?」

「係呀,噚日最後一日喇,不過新公司都係同一區,都係搭返呢架邨巴,都係呢個鐘數,幾好呀,搭車有個伴。」

冇喇,講完喇,我嘅人生都玩完喇。

error: