睇新聞見到有人被呃咗去柬埔寨 ，再轉移到緬甸，除咗覺得好唔人道之外，仲有一種這麼近那麼遠嘅感覺，柬埔寨緬甸呢啲地方喺亞洲，被呃去嘅又係華人（連香港人都有），但係個犯罪集團咁冇人性，好難想像真實中係幾咁煉獄，我估啲報道都未揭示晒最深入嘅一面。
最最最估唔到係咁恐怖同埋殘忍嘅事，竟然會有識得嘅人捲入其中，上星期有個舊同事打畀我求救，因為冇來電顯示，起初仲唔知係邊個，然後佢用好慌張嘅聲線同我講：「我係阿滿，而家好慘呀，喺柬埔寨畀人捉咗，佢哋要挖我啲器官去賣，救命呀！」
因為成班同事日日都討論柬埔寨同KK園區事件，我聽到之後都好驚，其實阿滿已經離開咗我哋公司一年有多，坦白講，唔止我，其他同事對佢印象都麻麻，佢當時嘅直屬上司甚至話借過幾千蚊畀阿滿但最後冇還，msg又唔覆。
話雖如此，但人命關天，呢頭睇到啲咁恐怖嘅新聞，嗰頭就話有識得嘅人係其中一位受害者，試問內心又點會好過，正常人又點可以冷靜吖，結果我把聲仲慌張過佢：「你點呀？點解會搞成咁㗎？係咪報唔到警？」因為好慌，我都唔知自己問緊乜。
阿滿喺電話裡面答：「報唔到警㗎！佢哋搶咗我本護照，而家畀我打電話畀外面嘅人求救咋，有條友一直企喺隔籬，我呢次真係好大鑊呀！」
我：「咁點算呀？你同屋企人講咗未？」
阿滿：「講咗喇，佢哋都冇辦法，所以我先至打畀你，可唔可以幫幫手籌兩萬呀？救命㗎！如果唔畀贖款，佢哋就會送我去緬甸，到時就會割晒我啲器官拎出去賣，今次我死梗喇，得你可以幫我咋！我已經冇時間喇！」
或者真係太擔心，我衝口而出咁講：「兩萬？得！冇問題，點入畀你呀？」
阿滿：「兩萬美金喎，唔係港紙，你係咪真係幫我㗎？多謝你呀！我返到香港慢慢還返啲錢畀你吖！」
我：「兩萬美金？即係幾多錢呀？乘7？14萬呀？」
阿滿：「總之我要兩萬美金啦，好急㗎，如果聽日都收唔到錢，佢哋真係會劏咗我㗎，求求你，幫下我！」
聽到佢咁淒涼，我個心好難受，阿滿話晏啲再打嚟，到時畀個戶口號碼我。
我計一計，原來而家美金兌港紙，兩萬美金係等於15萬幾，唔係唔想幫，但我真係冇咁多cash，當時身在office，最簡單直接嘅方法就係同成班同事傾，一來大家都識阿滿，好應該知道發生緊咩事，二來大嗱嗱15萬港紙，我唔敢逞英雄，唯有叫各人籌旗。
Office裡面嘅聲音兩極，有幾個同事都同我一樣咁慌張，大家都驚訝呢件事會發生喺一位舊同事身上，有個女仔仲好眼淺咁喊咗出嚟，另一位男同事就好踴躍幫忙，話自己戶口有9萬蚊，隨時可以拎出嚟救人，叫我哋籌埋嗰六萬幾七萬蚊就ok。
不過另外有幾位同事就偏向唔相信，特別係阿滿嘅前上司：「冷靜啲先，你同阿滿好熟咩？屋企人又唔搵，朋友又唔搵，打畀你呢個冇見成年嘅舊同事？」
嗰位喊咗出嚟嘅女同事走嚟幫我搶答：「救咗人先啦！佢會死㗎！一齊夾錢啦！」
阿滿嘅前上司：「我冇話唔救，如果係真嘅，我畀晒呢十幾萬，唔使你哋籌旗，話晒阿滿係我舊下屬，不過我覺得搵一搵阿滿屋企人先都好正路吖，大家從長計議好喎！」
我哋籌錢計數嘅時候，阿滿前上司就去搵咗疊file出嚟，裡面有阿滿當年嚟見工嘅application form，裡面有寫到緊急聯絡人，據了解係寫咗阿爸個名，仲有一個2字頭嘅屋企電話。
阿滿前上司直接就打去，一直開住speaker，似乎係有心想其他同事都聽埋一份：「喂，你好呀，請問你係咪XX滿嘅爸爸？」
對方粗聲粗氣回應：「你邊位呀？」
阿滿前上司：「我係阿滿前上司，請問你知唔知道你個仔喺柬埔寨出咗事？而家要畀贖金救人？」
當我哋屏息靜氣聽緊嘅時候，speaker裡面阿滿爸爸忽然扯火：「你個仆街又呃人錢呀？想點L樣呀你？借大耳窿仲唔夠，仲要呃邊個錢呀你，DLLM你幾時先捨得生性呀仆街！」
我哋仲聽到speaker裡面有把聲喺比較遠傳埋嚟：「冇呀，關你L事咩！」呢把聲係阿滿。
阿滿爸爸：「畀乜L嘢贖金呀？你聽到啦，條仆街而家喺我隔籬，你哋唔好咁on9啦，柬埔寨！佢而家喺黃大仙東頭邨呀，唔信就上嚟啦！我同你講，呢啲仆街就算畀人捉咗都唔L使救，佢冇L得救！」
同時間，我哋都聽到阿滿把聲愈嚟愈近，佢鬧自己阿爸「講乜L嘢」，然後兩父子就不斷用粗口對罵，聽到呢度，阿滿嘅前上司就直接收線。
阿滿前上司：「你哋聽到啦！」
成班同事冇出聲，我嬲到即刻打畀阿滿，有響，不過冇人聽，我再去WhatsApp留咗個voice msg，同佢講：「你真係一個仆街，呢啲大話都作得出，因住狼來了。」
阿滿前上司：「呢啲人你鬧佢都嘥氣啦，你哋聽到啦，阿滿根本唔喺柬埔寨，呢個人唔止問過我借錢，淨係呢間office都有幾個債主，名我就唔開喇，臨走前一個月仲叫我幫幫手同老細講借糧，我唔係冷血，不過對佢嘅人格有保留。」
唔使有保留，我直情覺得阿滿係冇人格可言，真實中有人喺柬埔寨同緬甸受到生命威脅，而佢竟然利用嚟套喺自己身上，借題發揮搏取別人嘅同情心，從而希望呃到一筆錢，喺我眼中根本同嗰班犯罪集團係一樣，都係咁冇人性。
呢一兩年香港好似掀起咗籌錢風，每逢大是大非或者有大事件發生，梗有啲人走出嚟話要籌旗，例如早排Mirror演唱會咁，竟然有人趁火打劫，巧立名目要幫受傷嘅dancer籌醫藥費，點解可以咁冇血性㗎？真實中有人受緊苦，仲要藉此呃錢？
香港人其實好有善心，好多人會一呼百應，但係遇得多呢類騙徒，大家對人嘅信心就會愈嚟愈少，戒心亦都愈嚟愈重，將來真係有大事需要幫忙時，自然會多咗人猶豫同卻步，所以好似阿滿呢一類人渣，絕對要落地獄。