從未試過請人係會泛起咁大漣漪，部門其他下屬有微言，隔籬department有是非聽，再驚動高層同埋老細，一個月薪$16,000嘅junior staff啫，搞到office好似七級大地震咁，我作為主管都始料所不及。
其實最始料不及嘅係……我本來並唔係想請呢位新人，初初in咗個女仔唔錯㗎，人又靚，英文又好，好可惜臨返工前一日個女仔打嚟同我講：「唔好意思呀，我有第二個offer，嗰間公司比較近我屋企，所以我聽日唔返喇。」
好想同個女仔講：「近屋企啲？不如實際啲，我offer畀你嘅人工再添啲啦！」不過我冇講出口，因為老細set咗呢個position嘅上限係$16,000，senior可能有得傾，junior一定唔會讓步，所以都係算啦，唯有祝福呢位女求職者新工作順順利利。
本身想再出招聘廣告請人，但係我遇到兩大難題，首先人事部話JobsDB嘅招聘廣告package剛剛好用完，等緊會計部批budget先可以再買job ad，呢度起碼等兩個星期，叫我等得就等……係呀，我哋會計部出數不嬲好慢，平時claim錢已經領教得多。
另一個難題係，呢個position因為有人走先至要再請返人，遞咗信嗰位同事當時仲有唔夠兩星期就last day，就算有quota出招聘廣告再請再in，呢度都要嘥唔少時間，我想個新人有舊人帶住嚟交接吖嘛，咁算啦，我決定喺之前見過嘅求職者裡面搵一個補上。
拎住堆application form搵後補人選，打咗畀一男一女都話已經搵到新工，乜個市真係咁好咩？嗰陣時算係疫情爆得最勁嘅階段，咁冇辦法啦，繼續打電話，拎起下一份，係Hanson…..我對呢個男仔印象好深刻，問唔問下佢好呢……等人用呀，問啦！
我：「Hello Hanson，我係XXX嘅Clement，記唔記得？」
「記得呀。」
我：「你返咗新工未？如果我哋公司出offer你會唔會考慮？」
「會，都未搵到嘢做，我聽日可以返工喎，你想唔想吖？」
我：「想，梗係想啦，愈快愈好，咁聽日9點見，人工$16,000，其他福利嗰啲等HR同你簽約再詳細講一次。」
「好呀，聽日見。」
點解唔叫HR幫手contact求職者？因為呢度做嘢慢手慢腳嘅唔止會計部，其實人事部都差無幾，所以我一般鍾意自己聯絡，同埋如果搵HR call Hanson怕會節外生枝，因為HR姐姐曾經告誡過：「呢個男仔你in唔in？學歷係ok呀，對答都醒目，不過就寸寸地，請咗返嚟隨時日日頂撞你。」
我：「點樣寸寸地？」
HR姐姐：「我同佢講，呢度多OT，問佢接唔接受到？佢答我如果OT有錢，O到你公司破產都得呀！」
咁呢個Hanson又講得冇錯喎，你interview咁樣問就預咗畀人寸啦！
人不寸嘴枉少年，必經階段啫，有咩咁大不了吖！更何況我哋公司又唔係咩「身屍蘿蔔皮」，人工又唔係特別高，有人肯做都唔錯啦，你揀人，人揀你㗎啫，不過老老實實，Hanson又確實幾突出嘅……啲言論，因為喺我同佢second in期間，Hanson仲分享咗早前去第二間公司見工嘅事。
Hanson：「頭先in咗份工，我同另一個求職者一齊入房in，可能個經理想慳時間啩，不過對方問啲嘢九唔搭八，咩情境題喎，問如果見到老細冇拉褲鏈，我哋會點樣提醒？」
我真係有興趣知呢啲咁低B嘅題目係邊間公司出，所以我先問咗公司名，再問佢點樣答。
Hanson：「我咪答照直同老細講囉，冇拉褲鏈啫，又唔係姦淫擄掠，點解唔光明正大講？點知另一個求職者就拎部手提電話出嚟，打咗喺備忘錄度，話可以扮有嘢畀老細過目，再遞部手提電話埋去提醒，等老細唔使咁尷尬喎！」
我：「跟住呢？」
Hanson：「跟住個經理聽完好滿意，淨係留嗰位求職者，叫我返去等消息，其實你唔叫我都會走啦，問埋啲咁嘅嘢，間公司肯定勁奇怪。」
嗰次同Hanson仲討論到佢上一份工點解辭職，原因又係好特別。
Hanson：「舊老細防疫防到上晒頭，要我哋喺office戴兩個口罩，每朝全部同事一齊排隊入房撩鼻，確保冇人中招先可以開工，驚死班同事會呃佢咁，喂你咁驚青不如全人類work from home啦，返嚟咁多人聚集，仲要排隊入會議室即場驗，唔中招都變中招啦，邊有得迫人戴兩個口罩㗎！咁嘅智商都可以做老細簡直冇天理。」
我聽完笑到gap gap聲，所以對Hanson印象好深刻，無奈當時另一個女求職者更標青，結果就冇揀到Hanson，點知而家兜兜轉轉又係請咗呢個男仔，睇嚟唔止家人，朋友，拖友要講緣份，大家做唔做到同事都係一種緣份嚟嘅。
Hanson返咗一星期之後，我班下屬已經有幾個麻麻地鍾意佢，因為呢個男仔完全唔埋堆，唔止冇參與平時傾計，就連食lunch都好少join，有個下屬話Hanson好掃興同埋唔識做人。
「個Hanson都幾獨家村㗎喎，上次叫佢一齊食重慶嘢又唔去，今日嗌埋佢lunch buffet又唔去，話太貴喎，我話我請啦，點知都係唔去，幾唔俾面呀！」
我同返呢位下屬講：「咁唔係人人聽到有免費餐都仆住去食嘅，有種人真係唔鍾意受人恩惠，會食得唔安樂，又或者佢唔like buffet呢！」
「咁重慶嘢嗰次呢？嗰間唔貴啦，呢啲職場新人真係麻煩，懶係我行我素咁。」
其實Hanson唔係「懶係我行我素」，後來我先知道佢根本唔食得辣，所以不將就，亦唔使人哋將就，lunch啱食就食，太貴就唔食，佢都係用自己最喜歡同埋最舒服嘅方式喺職場生存啫，唔通下下要屈就先叫俾面咩？
我哋呢度就有個同事叫Bowie，佢性格同Hanson相反，唔食辣都照跟嚟，嗰間重慶嘢就算少辣都好大鑊，所以次次都見到Bowie 食到身水身汗，我叫過佢咁辛苦下次唔好跟嚟，不過Bowie 唔肯，慌死唔出席就會聽少咗啲嘢或者被標籤為唔合群。
為咗埋堆，Bowie唔止勉強自己食辣，仲勉強自己食二手煙，因為我同個別幾個同事都係smoker，唔明點解有時落街煲煙會見到Bowie跟埋嚟，佢又唔食煙㗎喎，淨係聽我哋講嘢，搞乜鬼呀？唔食煙就返上office啦，貪二手煙健康咩，我哋煲煙通常講鳩嘢，唔會講公司機密㗎！
所以如果你問我，個人會比較喜歡Hanson嘅性格，做返自己啦，唔好畀職場扭曲埋本性，打份工啫，唔需要咁㗎！再者，Hanson雖然講嘢少，唔埋堆，但係要佢做嘅工作都會完成，咁樣咪夠囉，唔通我會因為一個員工唔跟埋嚟食辣嘢同埋唔食煙炒咗佢咩！
被HR姐姐形容為寸寸地，又被同事形容為唔識做人，咁Hanson有冇頂撞我呢？冇呀！不過我寧願佢頂撞我，因為Hanson返咗工個幾月就兜口兜面寸一個叫Alan嘅高層，喂！呢條友唔寸得㗎，小器過女人，最叻就係擦鞋，最慘係老細又buy喎，頭馬嚟㗎！
嗰次Hanson做完嘢收工，其實都7:30㗎喇，點知Alan啱啱去完廁所返入office見到佢孭袋，一句就ban埋嚟：「呀新人，咁早走？其他人都未走，你唔會覺得唔好意思㗎咩？」
Hanson：「點解我要覺得唔好意思呀？」
（未完待續）