姨甥女因為同男朋友分手而走去𠝹手傷害自己，佢阿媽好擔心，叫我幫忙留意同埋開解，其實好驚介入別人嘅感情問題，不過呢個係我姨甥女，所以幾唔想都要盡力。
唔鍾意傾人哋嘅感情事，除咗局外人好難畀意見之外，亦因為好多年前嘅一段經歷，我決定直接同姨甥女講。
「呢個係我舊同事個女呀，得唔得意呀？兩歲喇！我舊同事以前都好靚女㗎，畀你睇下佢後生啲相吖，幾年前佢結婚都有請我去飲。」
心情低落嘅姨甥女顯然冇興趣聽，所以我決定講重點。
「佢以前個男朋友都係我舊同事，當年佢哋分手，個男仔喺個女仔面前跳樓死咗。」
姨甥女終於正面望過嚟，聽我繼續講埋落去。
我冇作故仔呃佢，呢件係真人真事，照片中嘅女仔叫Cindy，跳樓輕生嘅男仔叫阿豪，佢兩個都係我N年前一份工嘅舊同事，Cindy同阿豪亦因為工作而認識，繼而發展成情侶關係。
嗰陣時大家都好後生，年輕情侶今日甜甜蜜蜜，過一排又情海翻波，本身就係好平常嘅事，只係當局者迷，置身其中就會無限放大，將對方嘅離開睇到好似天崩地陷咁嚴重，有人可以一笑而過，有人需要時間復原，亦有人走唔返出嚟，呢樣嘢或多或少同自身性格有關。
Cindy同阿豪當年因咩事而搞到分手，老實講我並唔知詳細，只肯定唔涉及金錢，至於係咪第三者，我哋幾個同事都唔知，即使係，亦覺得阿豪唔需要咁衝動，喺感情世界當中，我哋每一個都曾經係別人嘅過客，莫講話情侶，就算係親人同朋友，離離合合亦只係生命中嘅一小部分。
阿豪本身性格係衝動派，當年佢走去Cindy屋企要求復合，聽講又踢門又踢閘，Cindy唔肯畀佢入屋，亦堅拒再喺埋一齊，阿豪揚言會跳樓死畀Cindy睇。
Cindy當時同屋企人一齊住公屋，如果你有睇電影《幻愛》的話，應該會知道係邊種，Cindy見到阿豪咁樣都好驚，加上屋企裡面有個細佬同埋爺爺，所以佢只敢打開度木門，唔敢開鐵閘，阿豪大吵大鬧一輪之後，突然跳出欄杆，縱身一躍由十幾樓跳咗落去……
由於阿豪吵鬧期間已經引嚟好多街坊行出走廊圍觀，加上跳樓傳嚟巨響，當時好多人都喺度大叫，Cindy直情嚇到癲咗咁滯，以上都係我哋一班同事之後聽返佢細佬描述。
但更難捱嘅係，當時Cindy喺醫院，自然會同趕到嚟嘅阿豪屋企人相遇，聽Cindy細佬講，對方父母激動地指住Cindy嚟鬧，話佢係殺人兇手害死個仔，Cindy又驚又傷心，一直喺度狂喊。
呢件事之後，Cindy情緒好唔穩定，當時個老細甚至畀佢停薪留職，不過Cindy唔想留喺認識阿豪嘅傷心地，所以冇幾耐亦自動辭職，公司一次過失去Cindy同阿豪兩位員工。
我哋幾個舊同事之後耐唔耐都會結伴探Cindy，每次望到佢門口嘅欄杆都會心寒，難為Cindy每日都要喺呢個環境居住，每次打開門都要諗起前男友喺佢面前跳樓嘅畫面，究竟佢係點捱過呢段日子？我哋一個月去探佢一次都覺得好大壓迫感。
喺呢度特別要讚下Cindy細佬，佢嗰陣只係F.4，年紀輕輕已經幫手照顧家姐，係一個好懂事嘅男仔。
嗰陣時個老細好好，特別拎咗筆錢出嚟畀阿豪家人做恩恤金，我哋幾個同事亦都有夾錢，仲特登拎去畀阿豪媽咪，邊個啱邊個錯都好，只見到阿豪媽咪成個人好憔悴，佢哋得一粒仔，之後嘅日子又點樣捱過呢？一念天堂一念地獄，最痛苦其實唔係離去嘅人，而係留下來的人。
再幾年之後，唔止Cindy，我哋幾個同事亦先後離開呢間公司，尋求更好嘅發展，不過同事間感情唔錯，同舊老細都係，彼此keep住contact，每年都會出嚟食一至兩次飯。包括我在內，當年嘅同事而家已經結晒婚，Cindy亦唔例外，我唔知阿豪走咗之後嗰幾年佢係點樣撐住，我哋之間亦冇人再提起，但我有份出席Cindy嘅婚禮，見到佢走出陰霾，搵到一個愛佢嘅人，心裏面都戥佢開心。
Cindy嘅小朋友已經兩歲，早排見佢喺fb貼咗一張切蛋糕嘅相，由衷覺得佢而家生活美滿，但係你問我心入面有冇閃過阿豪呢個人……其實係有。
唔知阿豪喺天上會唔會祝福Cindy，亦唔知阿豪如果睇到而家嘅一切，會唔會覺得自己當時好傻好衝動。
我希望姨甥女明白，世界真係好大，感情、工作、友情，仲有好多好多嘅關係裡面，其實我哋每一個人都只係過客，有時塞翁失馬焉知非福，失去一樣嘢，意味你會得到另一樣嘢，每一個經歷無論係好與壞，都會教識你新事物，所以唔好將一時嘅唔開心無限放大，因為將來望返轉頭，你一定會覺得自己好傻。
投稿讀者：唔好意思，要匿名