父親節正日，畀個headhunt舊同事叫咗去黃金海岸食Tea，佢仲帶埋四歲半嘅仔出嚟。
我：「你兩父子撐枱腳做咩叫我做電燈膽？」
舊同事：「幫我分擔下啦，我個仔有用唔完嘅精力，又每事問，我一個人招架唔住，老婆又約咗朋友，今晚先同我會合。」
結果呢個晏晝，我講下我老竇，佢講下佢個仔，同時都講下佢老竇。
舊同事：「我老竇好搞笑，唔識肚餓，我曾經懷疑過佢有厭食症。」
我：「以前見過你post老竇嘅合照，唔似有厭食症啦！」
舊同事：「但佢真係唔食嘢，喺屋企又唔夾餸，佢話唔肚餓，淨係爬白飯，食埋啲蔥呀、蒜頭呀、豆豉呀，永遠唔食肉，唔知仲以為佢食齋，同佢飲茶仲搞笑，山竹牛肉咪有層好薄嘅腐皮嘅，我老竇淨係食嗰層皮，啲牛肉永遠隊晒畀我食，好似練仙咁。」
正當我若有所思嘅時候，舊同事又再分享另一單嘢：「我第一次出糧請佢出去食晚飯，好記得嗌咗龍蝦伊麵，我老竇上菜先話唔食龍蝦，全程淨係食伊麵，真係畀佢激死，搞到我好似搵個藉口請返自己食嘢咁，佢人生對我講得最多嘅一句說話就係～～我唔肚餓，你食啦！」
我由得呢位舊同事繼續講。
舊同事指指佢個仔：「我個仔大個之後開始識得揀嘢食，有次呢隻塞豆窿話要食薯條，咁我咪帶佢去食囉，佢食得好滋味，食食下突然問我～～爹哋，你做咩唔食呀？我都唔知點解諗都冇諗，本能反應就即刻答個仔～～爹哋唔肚餓，你食啦！嗰一刻我突然諗返起自己老竇。」
傾傾下，舊同事叫嘅芝士蛋糕嚟咗，佢個仔頭先明明扭計話唔食，但係見到芝士蛋糕擺喺面前嘅時候，突然又話要食，舊同事餵咗佢兩啖，索性成個cake畀咗個仔，而佢個仔食咗一大半先問：「爹哋，你做咩唔食呀？」
舊同事望住佢個仔講：「爹哋唔肚餓，你食啦！」
雖然我老竇淨係識問我攞錢，不過聽到舊同事同佢老竇嘅故事，我仍然覺得好感動，佢有一個好老竇，所以而家都成為一個好老竇，而我冇一個好老竇，亦提醒咗自己將來要做一個好老竇。
下次老竇老母話佢哋唔肚餓，係咁質晒啲嘢俾你食，自己淨係食伴碟嘅嘢，記得唔好信佢哋，直接隊嚿雞，隊嚿魚，隊條菜，甚至隊隻龍蝦去佢哋個碗度……雖然佢哋好大機會隊返俾你，然後又同你講：「我唔肚餓，你食啦！」
===
我有個不一樣的老竇
https://hkofficedaily.com/?p=10532