「出嚟出嚟出嚟！分咗手！今晚叫晒佢哋出嚟打邊爐，我請！可唔可以幫我搵阿Ta、阿Dee、Chris、Joyce、Yuki，仲有Alan佢哋呀？」
我：「靜啲啦！限聚令你叫咁多人出嚟托呀？我哋圍內都成8、9個，點打邊爐呀？」
呢條友叫Kevin，佢女朋友性格非常暴躁，極度神經質，而且事無大小都會用自殺嚟威脅，所以你明佢點解分手會咁亢奮啦！
佢女友一向視Kevin所有朋友為眼中釘，包括阿Ta、Joyce，同埋Yuki，原因好簡單，因為佢哋都係女仔，Kevin女友認為世界上所有女都想搶佢男朋友，痴孖根！吳彥祖咩！Kevin每次出嚟同我哋食飯都要偷偷摸摸，成班friend識咗10年啦，食個飯啫，都要咁坎坷？
阿Dee、Chris、Alan，仲有我，同樣無一倖免，佢女友話我哋搵唔到錢，成日掛住打機，係正宗損友，群得多會冇益，仲會教壞佢男友喎，睇嚟Kevin要搵啲傑青做friend先得喇。
我懷疑過Kevin女友直情係憎晒所有人類，因為佢連Kevin阿媽、阿爸、家姐、細妹，全部都唔鍾意，成日幻想Kevin屋企人講佢壞話，簡直有被害妄想症。
呢啲都係小事，佢女友最興就係話要自殺，Kevin約咗我哋成班朋友食飯，佢女友唔畀，Kevin想唔理咁多照出，佢女友威脅要吞晒成樽安眠藥；Staycation，Kevin願意去但唔想住咁貴，佢女友指定要半島，Ok，Kevin已經打算拎$5000至$6000 budget出嚟，夠book一間半島普通房有餘，不過佢女友一定要住$18000一晚嘅特級豪華海景房，就係因為個浴缸同個view可以打卡，唔book呢間房又話生不如死。
以上係近兩三個月嘅事，過往三年唔啱心水就用自殺嚟威脅嘅例子多不勝數，每個月梗有幾次，吞安眠藥聽得最多，話要跳樓都七、八次。
我份人比較衰，有次Kevin同女友嘈交所以打嚟呻，明明朝早先話女友唔畀佢買game，用吞安眠藥自殺嚟威脅，夜晚佢迫Kevin學車，Kevin唔鍾意揸車唔想學，佢女友又話要跳樓，我當時本能反應問咗句：「又死？你女友羅樂林嚟㗎？一日死幾次嘅。有冇諗過佢次次都係大你？試下唔好就範啦！」
Kevin嘅回答順便話埋畀你聽，點解拍拖三年過住咁嘅生活都唔分手：「我已經明示暗示過想分開，但係佢次次都用自殺嚟威脅，始終人係感情動物，我都擔心佢出事，一次嚟真就搞出人命㗎喇。」
我唔肯定佢女友係咪會尋死，不過Kevin對我嚟講已經係死咗㗎喇。
有句說話係：當上帝關了一扇門，必打開另一扇窗，Kevin女友日前竟然主動提分手，原因係識咗第二個男仔。
我：「你有冇同佢講要自殺，報返呢幾年嘅一箭之仇？」
Kevin：「冇講到要反自殺咁誇張，我加咗少少演技，扮到好激動，聲嘶力竭鬧咗佢一個鐘，佢猛咁同我講對唔住，話對方條件好啲，次次出街都同佢食好嘢，出入會揸車接佢，最後我喊住叫佢走，成功攞返屋企鎖匙。」
Kevin話呢一刻唔係最想請我哋成班friend食飯，佢最想請接收佢女朋友嗰條仔食飯，自言個感覺好似欠緊百幾萬街數，日日畀收數佬搞，突然有個白武士現身幫你還晒條數：「我想親口同嗰條仔講聲，大恩大德，沒齒難忘。」
一直知道Kevin嘅遭遇，以前好多人都唔信，我女友Kelly都話誇張，但呢排睇完「姊弟戀性虐案」單新聞之後，Kelly轉咗口風：「比起熱風吹陰莖，嫌做愛太快完事咬男友上半身至流血，Kevin女友原來都係碎料。」