「Herman，多謝晒，本來想WhatsApp你冇咁老土，諗諗下都係覺得親自打嚟比較有誠意，你最近點呀？工作順利吖嘛？」由於有save到呢個number，所以即使3年冇聯絡，我仍然見到係舊下屬Tony打嚟。
我：「幾好呀，有心，做咩無端端打嚟講多謝？」其實我當時真係摸不著頭腦，然後Tony就話係關於個reference check，而且係3年前嘅reference check，2022年先走嚟講返2019年嘅事？會唔會隔得耐咗啲呀？
Tony：「冇呀，最近升咗職，同阿ger（Manager）傾開計，佢突然話3年前差啲冇請我，因為當時本來想揀另一個靚女candidate，但係打畀我前上司reference check嘅時候，佢話你係咁推薦我，你知唔知我當時幾需要份工？你救咗我一命。」
我：「救人一命勝造七級浮屠喎，咁我都算做返件好事！其實我有少少印象，你而家個阿ger嗰陣都問咗幾多嘢㗎，初頭係個HR send張reference check嚟先嘅，點知reply完冇幾耐，又有個男人打嚟問長問短，應該係你口中個阿ger啦！」
嗰陣時Tony新公司個HR send張form嚟，個reference check成5頁紙，真係睇到呆咗，我計過要答20條問題，另外有個欄目係要畀分或者答Yes or No，嗰度又5至6條左右，你個reference check咁擾民，唔止趕客，相信冇咩舊公司同舊上司會認真地逐條答晒。
我好似學生做試卷咁樣填完，基本上都冇咗半條人命，點知有個男人又打嚟問長問短，好記得有個位好搞笑，個男人話：「有條問題問你會唔會請返佢，你答會，咁點解當時唔留住佢嘅？究竟佢係咩原因辭職㗎？你唔怕講喎！」
痴孖根！嗰條題目係問“Would you rehire this person? yes or no? If no why not? ” 你set到個問題咁樣，唔通我答No再寫篇作文咩？斷人衣食之餘，你到時咪又係要我解畫，除非好憎個舊下屬㗎啫，正常梗係答Yes啦，得你係Manager呀？我都係Manager嚟㗎，公司好多嘢做㗎唔該！
我記得有幾條問題都make sense嘅，例如“How long did you work with each other?” 因為Tony做幾耐，又唔等於我一樣做咁耐，上司可能係中途空降㗎嘛，大家work得好短時間又唔定，佢咁樣問先至知道我畀嘅評價係咪中肯。
不過reference check裡面有啲問題就不敢恭維：
“Does The Applicant Have Any Children?”
個人認為呢一題除咗R晒頭，仲係好大嘅冒犯，個求職者有冇小朋友，同你決定請唔請佢，或者認唔認同佢嘅工作能力係唔應該掛勾，而且你咁問嘅心態係點先？如果有小朋友會唔會專畀啲豬頭骨佢？因為你覺得有家庭同經濟包袱就冇咁易劈炮唔撈？
唔係陰謀論呀，因為我而家都成40幾歲人，喺職場都20幾年，真係遇過啲公司係用呢種心態去對待員工，知你供緊樓仲大鑊，惡頂嘅嘢交晒畀你，睇死你唔敢quit吖嘛！
另一條問題係 “What Is The Applicant’s Religious Affiliation?”
呢條同有冇小朋友嗰題一樣，信佛又好，基督徒又好，同你聘用佢有咩直接關係呢？再者，你夠薑咪見工嗰陣直接問佢囉，兜個大圈問我把鬼咩！你都係淆底驚自己出面問隨時畀人告啫！
以上問題我一律冇答，個男人喺電話度亦都冇追問返，不過無論係2019年又好，今時今日都好，我亦冇將成件事同Tony講，一來係過咗去，佢而家都入咗去做，二來係講返盞尷尬，隨時佢唔識得點面對個阿ger，一時間調節唔到心態，三來係有啲人嘅性格好得意，可能最初對你好多懷疑，work落覺得你冇乜嘢又會變咗委以重任，即係同拍拖一樣，初初條女一定唔會信晒你，實係好重戒心，拍落之後成個人都畀晒你，同你生隊足球隊都仲得。
而家Tony同我講自己升咗職，佢阿ger又肯重提當日我reference check咁幫手，好在我幫Tony冇變成害佢。
仲有兩個原因驅使我當時幫Tony講盡好說話，推薦新僱主要請佢，因為2019年嘅時候，Tony屋企發生咗啲事，佢媽媽因病離開咗，然後佢爸爸嘅老人痴呆愈嚟愈嚴重，作為同事我冇問咁多，唔知兩件事有冇直接或間接關係，不過對Tony嚟講點都係難過嘅一年。
Tony辭職係要照顧爸爸，嗰陣佢已經心力交瘁，所以我出聲挽留不果之後，就覺得唔勉強佢會比較合適，Tony真係需要抖抖，跟住過咗7至8個月咁上下，我就收到佢呢間公司嘅reference check喇，證明Tony準備好再返新工，咁我作為前上司，梗係盡幫個舊下屬啦！我當時嘅考慮就係咁多，至於新工係唔係啱佢，我交咗畀Tony自己體會。
至於另一個幫忙做好reference check嘅原因，其實同自身經歷有關，因為我曾經畀一位舊僱主玩死。
回帶去返10年前，我太太因為小產，情緒變得好唔穩定，最嚴重嘅時候幾乎晚晚爆喊，喺呢個艱難時期，個老細竟然調我去中山，講真就算唔係因為家事，我都唔願意長駐中山啦，何況已經講到明太太需要照顧，老細仍然充耳不聞，咁我咪唔制囉，最後佢迫到我唔撈。
嗰次就係典型嘅例子，公司知我有家庭負擔，硬係要我配合一項好反感嘅工作，睇死我唔敢quit，但係件事仲未完，我辭職後出去搵工，個舊老細就利用reference check玩嘢，仲要一次又一次。（未完待續）