開緊會個電話猛咁震，初時以為係傳銷所以冇理，但係number嘅頭4個字又似曾相識，搞到成個meeting都坐立不安，對方仲要短短一個鐘之內打咗13次！結果一開完會我就打返過去，唔怪得咁熟啦，係我舊公司打嚟：「Ophelia？你終於打返畀我喇！唔好意思呀，你應該記得XX（我舊公司名）啦，之前你喺度做咗5年㗎呢！」
梗係記得舊公司啦，係唔知你乜水啫，對方自稱係我舊公司HR，我對佢冇印象，相信係換咗人，但我唔止做咗5年，時至今日亦都走咗超過5年，你咩事搵我呢：「嘩！唔知以為畀人追數，你打咗十幾次嚟喎，又冇留言，咩事呀？」
「真係唔好意思呀！係咁嘅，我哋而家轉咗新老闆，佢想做返個調查統計，希望知道之前離職員工嘅最新發展，就係咁㗎啫，絕對冇其他嘢，你可以放心。」
我：「放心？聽完我更加唔放心喎！你都識講我係離職員工，仲要走咗咁多年，你打得畀我應該睇到資料啦！點解要向你交代最新動向呀？」
Sorry，我知自己語氣唔好兼且有啲串，但呢個係充滿詐騙嘅年代，再加上成件事就算係真，我都認為好唔合理。
「我明呀，頭先打咗畀其他離職嘅舊人，佢哋都有同樣嘅顧慮，不過真係新老闆叫我咁做，唔使好深入，約略講下得㗎喇，麻煩你幫幫手吖！」
嗰一刻我仍然偏向係詐騙電話，雖然唔知你點樣得到我資料，不過叫得詐騙，不法之徒梗有方法啦！
我：「你叫咩名？一係我親自打去舊公司總機，搵到你先再講。」
無論答唔答佢問題都好，如果唔check下係咪真事，我點都唔會放心，對方好順攤講咗個名，我唔打去佢直線，堅持打去總機再駁過去，又真係有呢個人喎！呢位新HR講得出佢打咗畀邊幾位舊同事，呢啲人我全部都識，有幾個當年仲好熟，所以我就放下咗戒心。
問多兩句，我又得知舊公司原來半年前易手，而家係新老闆進駐，有一系列新動作，包括「調查舊員工最新發展」……究竟點諗出嚟㗎？
我：「唔係唔想同你講，但你哋知嚟做咩呢？」
「新老闆話公司離職率太高，不斷請人唔符合經濟效益，又拖慢公司發展進度，好想知大家走咗之後嘅career path究竟好咗定係差咗？包括職位有冇提升？人工有冇多到？最重要係有冇後悔當年辭職，唔想講新公司名絕對冇問題，講下而家嘅發展同埋薪酬待遇就夠㗎喇！」
我：「答咗你先，我唔後悔當日resign，其實之後我都轉咗兩間公司㗎喇，而家呢間無論職位同薪酬都高過當年，你新老闆問呢啲都多餘啦，咁多年點會冇進步呀？就當我平手轉工，新公司一年加500蚊好未？條數一定多過我離開舊公司嗰陣，你呢啲調查冇意思㗎！」
真心feel到呢位HR係「被迫」要做個九唔搭八嘅調查，聽得出佢語氣嘅無奈，算啦！大家都係打份工啫！除咗新公司名之外，其餘我都有答，費事佢搞唔掂呢份調查報告應付新老闆，最終自己都變埋離職員工。
收線之後，我WhatsApp幾位舊同事，全部都係頭先個HR提到嘅人，估唔到佢哋係咁樣回應……
舊同事A：「佢都有打畀你呀？咁戇居認真答？我同佢講中咗六合彩頭獎，而家唔使返工，日日周遊列國，臨尾話自己喺馬爾代夫，呢個電話變咗漫遊，跟手cut咗佢線喇！」
另一位舊同事B話：「我話自己好唔掂呀，4年前離職之後一直搵唔到工，叫佢幫手問問新老闆可唔可以請返我？玩到佢陀陀擰，快啲執柒咗佢啦，當年我就係做得唔開心先至走，你而家叫我幫手統計？老奉要幫㗎？」
以為B夠晒勞氣啦！點知有個舊同事C仲猛。
阿C：「冇答佢啦，問候完佢老母咪收線囉！舊公司打嚟？你講就信呀？點知係咪套我啲料呀？」比佢講多兩句，我又重新擔心係詐騙。
舊同事D最喪心病狂：「我話自己喺KK園做咗兩年嘢，啱啱先畀香港政府同中國領事嗰邊營救出嚟，聽日去睇心理醫生，可以順便上嚟舊公司坐下，妖！個HR又話唔使我上去，淆晒底咁！」
其實舊公司呢個行為真係好反智，離咗職嘅同事過得好又點？你哋真係會檢討？過得差你又係咪請返人先？最重要嘅一點其實舊同事ABCD都提過，就係點解要幫你完成呢份調查？
除咗多此一舉，亦都令到個HR好難做，換轉係我未必有勇氣逐個舊同事打去問近況，我估應該唔止一個人問候佢娘親。而家幾個舊同事都笑我答得太認真，我諗住幫下人啫，希望冇後續，唔會變咗揦屎上身啦！（完）