其實一直都覺得我Manager同老細嘅關係好微妙，唔好誤會，唔係男女曖昧嗰種，因為佢兩個都係麻甩佬，而我Manager表面係老細嘅愛將同埋頭馬，但另一方面又經常畀老細人身攻擊同辱罵，再粗俗啲講句，老細真係當我Manager係狗咁喝，打份工啫，需要咁低聲下氣？
記得有次幾個部門一齊開會，老細表達完自己想做啲咩之後，我Manager就答：「明白！」講真當時仲有幾個同事都有回答「明白」或者「清楚」呢啲字眼，偏偏老細只係針對我Manager，當住咁多人面前喝佢：「明明明！你明乜L嘢呀？明就做啦！」在場每一個人都呆晒。
有次運輸公司送咗幾箱嘢嚟，6個超大箱，我都唔知裡面係乜，因為唔關我哋Sales Department事，老細經過reception見到，跟住就行埋嚟叫我Manager出去將啲箱搬入倉，話擺喺門口唔好睇同埋阻住出入，啱呀！但你係咪應該叫啲細嘅做，又或者直接嗌倉務部嚟搬呢？
結果Manager只係「哦」一聲，隨即聽聽話話行出去搬，作為佢嘅下屬，我咪自告奮勇話幫拖囉！嗰幾箱嘢重到阿媽都唔認得，兩個人搬都身水身汗，Manager一個人點搞得掂呀？我一路搬一路問係咩嚟？Manager話佢都唔知，不過老細叫到就唯有頂硬上，嘩！你忠僕嚟㗎喎！
仲有一次係新秘書返工，我哋部門都有份去welcome lunch飲茶，咁我Manager就拎住張點心紙打算剔嘢食啦，老細坐佢旁邊一手就搶咗張點心紙，其實呢下已經好冇禮貌，老細仲要話：「你揀乜春嘢吖！你垃圾筒嚟㗎嘛！我哋嗌乜你就食乜，唔留啲冷飯菜汁畀你都算係咁喇，仲揀！」
跟住老細畀咗張點心紙新秘書，咩料呀？搞到新秘書都好尷尬。
最癲係有次CS嘅同事大肚，老細走去問人知道仔定女未？個女同事未嚟得切答，老細就當住咁多人面前話：「仔定女都無所謂啦！唔好生個好似Benson咁柒蠢同咁廢嘅就得喇！」Benson即係我Manager……
仲有好多例子，不過費事講得太詳細，免得公司有人睇到呢段投稿，總之正常人遇到上述情況應該反咗面，甚至係選擇默默辭職唔撈，但我Manager鑊鑊都笑笑口帶過，有時EQ太高就變懦夫㗎喇！
好多次想問Manager點解咁忍得？因為老細有時直頭用粗口問候佢，但我喺呢間公司嘅資歷仲好淺，費事問啲咁踩界嘅嘢令Manager難堪啦！可能佢出緊十萬九千七人工，為咗份糧死忍爛忍呢！
直至早排發生一件事，我終於知道Manager點解日日畀老細X交叉Y都唔嬲喇！
嗰次我突然約到個客出嚟食飯，因為Manager拎咗大假，而呢單生意又好有potential，所以老細陪我一齊出席飯局（老細係擔心我一個人搞唔掂個客啫），嗰晚我、老細，仲有個客都盡興而歸，大家飲咗好多酒，離開嗰陣老細問我：「你有冇車牌呀？我飲咗酒費事揸，你揸吖！」
我心諗，你都幾搞笑喎！你飲幾多我飲幾多，邊個揸都係醉駕，最重要係……
我：「老細，我冇車牌㗎！」
其實各自搭的士就搞掂啦，最多咪泊架車喺度一晚，第二朝先攞返囉！點知老細唔肯罷休，隨手打電話畀我Manager：「Benson！出嚟！而家即刻出嚟尖沙咀！快！」
咩都唔交代，仲要喝住咁叫人出嚟，試想像下你而家放緊大假，個老細夜晚11點用咁嘅語氣喝你出尖沙咀，你會有咩感受同反應吖！順帶一提，Benson住屯門。
咁我諗住Benson愚忠啫，都會醒目啩！求其話自己放假去咗旅行又好咩都好啦，夜媽媽唔會真係出尖沙咀接老細呀？
點知Benson真係飛的出嚟……我屋企隻八哥都冇咁聽話。
Benson嚟到就揸老細架車，送老細返屋企，我都有陪同，然後我同Benson再喺老細屋企樓下call uber，因為我都係住屯門，順路一齊搭。
膽粗粗喺呢程uber問Manager點解要出嚟？扮瞓咗都得啦！如果係我直頭一開始就唔會聽老細電話，夜晚11點呀！任達華都有教啦，I’m gonna bring the beat back！
Manager：「費事啦！唔聽佢電話，聽日咪又係打嚟鬧我，聽日唔打嚟，放完假返公司都畀佢鬧㗎啦！」
我：「好奇問下啫！你係咪好高人工㗎？因為我見老細對你都幾兇狠，你又好好火喎，超忍得！」
Manager：「唔忍都要忍啦，爭佢百幾萬㗎！老細把口賤啫，其實對我好好嘅！如果冇佢，我未必結得成婚。」
我：「百幾萬係你應承佢跑嘅數呀？KPI嗰啲？」
Manager：「Cash呀！」
無啦啦做咩爭老細百幾萬cash呀？
原來幾年前Manager結婚要買樓唔夠錢，老細借咗150萬首期畀佢買屯門V City瓏門……150萬首期？咁你唔係唔夠錢喎！你係冇錢喎！而其實Manager未買樓之前已經跟咗老細好多年，總之而家問老細借咗百幾萬首期，工又唔轉得，畀人鬧想還拖又唔得，難怪老細個個都唔鬧，淨係鬧你一個啦！
就算朋友同親人有錢銀轇轕都唔好啦，仲要係僱主同僱員？我唔知Manager同老細之間有咩deal，又或者有冇正式借據之類（都幾肯定有），凡係牽涉到錢銀就麻煩㗎喇，銀碼仲咁大。不過算啦，唔關我事，至少明白Manager點解任勞任怨，言詞間似乎仲對老細懷住感激之情，調轉係我就寧願唔買樓喇，咁樣做人真係精神崩潰。（完）