同事嘅故事。

大半個月之前，佢有隻job已經幫個客請到人，噚日個客私底下打畀求職者講：「老細話個position hold起咗，要cut budget，你下星期唔好過嚟返工住，我哋有消息再contact返agency嗰邊吖。」

你係個求職者都嬲啦！人哋原本份工都辭埋，而家咪變咗失業？佢即刻打嚟同我同事理論，而我同事係完全唔知情，聽完即刻call個HR了解，然後個HR就話係未通知我地headhunt公司啫，唔係唔通知喎，嘩！咁即係將我同事擺上枱啫！

要注意係個HR從無半點歉意，我同事嬲到著晒火，直接打畀個Line Manager，個Line Manager仲過份：「都冇辦法㗎！老細話要hold住個position，我少個人幫手做嘢都好慘㗎，但始終都係老細話事啦！」

我同事：「但係人哋工都辭埋喎！返工前一個星期你先叫人唔好返，你有冇諗過佢點算呀？如果真係唔請，你唔使畀佣我，但至少都有個賠償畀佢啦！」

Line Manager：「賠咩啫，佢見完工都冇同我哋簽contract，HR都係打去叫佢返工之嘛，未簽任何嘢㗎喎，佢辭咗工我真係幫唔到，就算畀佢夾硬嚟做，我哋老細一定半日就炒咗佢，求其補半日糧了事，頭一個星期只係一日通知之嘛，你係咪想咁吖？」

從HR，到Line Manager，再去到老細，呢間公司唔係一個人無恥，而係一班人都咁無恥。我有提出過開名，但同事唔想，好似有啲嘢交涉中，所以我亦要尊重佢。

最近香港嘅事，令我知道好多界別都有無恥嘅人，而且唔係一個人無恥，而係一班人，一整個機構，一整個組織，全部都係咁無恥。

一陣間4點，又會有幾個無恥之徒，走出嚟幫一大班無恥嘅同事去圓謊。