早幾日放工搭車有感，因為我同另一位同事Bryan同路，雖然個人唔太鍾意佢，但無可避免有時會喺小巴站撞到，最慘仲要一齊坐，嗰日我哋上到車之後，駛前少少就有個鬼仔企路邊截車，對方一上小巴就問：How much？
小巴司機大約50幾歲啦，佢口快快就答咗10 o’clock，其實個鬼仔已經get到，亦準備坐低，不過我同事Bryan就瘋狂大笑，係笑到全架小巴嘅人都聽到，個司機好尷尬，細細聲低吟返句正確嘅10 dollars，當時成車人當中，係得Bryan一個人不斷大笑。
鬼仔坐喺我哋前一行嘅單丁位，擰過嚟望一望Bryan，眼神有啲厭惡，可能嗰種恥笑聲實在太乞人憎，連前面座位另一個OL都擰過嚟睥住，不過Bryan仲要向住我講：「10 dollars講咗10 o’clock，唔怪得揸小巴啦！」（呢句嘅聲浪細返，佢只係向我講）
我：「你唔好咁衰啦，小巴司機唔係講開英文，同埋一時口誤好平常啫。」
Bryan：「咁好笑唔係唔笑呀？」
我唔係話唔好笑，但Bryan嗰種係放大式嘅恥笑，令人非常唔舒服，喺公司已經犯眾憎，因為佢成日自認英文好叻，好鍾意笑人英文，而且係會因應你嘅職位同階級去笑，高層佢唔敢寸㗎，喺同事之間就會好扮嘢。
舉個例，有同事講嘢嘅時候講agreement，我聽落係完全冇問題，但Bryan就會一路望住對方反覆咁笑住講a－gi－文，a－gi－文，佢笑乜？唔知㗎，就係想捉人啲音唔準，笑人唔正宗，模仿人哋講得唔啱嘅音，又唔講咩事，淨係a－gi－文、a－gi－文咁笑，你想唔想像到有幾討厭？個同事根本唔係講a－gi－文，佢又要扭曲同醜化人哋。
公司英文叻嘅同事好多，但如果佢哋真心想糾正你嘅英文，係唔會用咁樣嘅方式，Bryan嗰種係不斷捉你讀音然後放大去笑，呢個都唔係重點，假設對方係高層或者外籍人士，Bryan就唔敢咁樣做。
因為office裡面有個印度同事同埋一個葡萄牙籍嘅同事，英文文法冇問題，但係你知道佢哋原本語言嘅讀音啦，講英文咬字一定唔會咁純正，例如個葡萄牙同事都係好重葡文口音，不過Bryan唔敢笑對方，淨係針對香港同事。
再講一個例子，其實Bryan唔係錯，但就好討厭，每次有同事講開Jumpy，佢就會專家上身衝出嚟指正，態度權威，係咁話：「轉工密英文唔係叫Jumpy呀！識唔識英文㗎你？係香港人咁戇鳩！」然後周圍搵啲link同片出嚟支持佢講嘅嘢。
喺度要強調同埋重申，轉工密嘅英文的確唔係Jumpy，技術上佢係講得啱，不過我哋慣咗用呢個字眼去話人轉工頻繁，用返你噚日「白卡」個投稿做例子，白卡正確唔係解癲，而係一張畀殘障人士嘅證件，但而家已經泛指為白卡＝條友係癲，咁你當然可以大大聲話人戇鳩，點會將白卡解做癲，問題係大家嘅習慣同共識，唔係唔知正確意思，而係用慣咗一個共通嘅詞語。
都唔緊要喇，Jumpy英文正解唔係轉工密呢樣ok，問題係呢度個老細，甚至有個外籍同事都會用Jumpy形容人轉工密，佢哋知道Jumpy唔係正宗意思，只係知道呢個地方慣咗咁樣形容，但Bryan係唔會出聲指正高層同外籍人士，如果香港同事講呢，Bryan就會衝出嚟：「轉工密英文唔係叫Jumpy呀！識唔識英文㗎你？」
我哋識英文，只係有啲字眼係共識啫，唔係要同你學術研究，唔使急住出嚟扮專家，再突顯自己英文好叻、好有見地、好有學識、好正宗、不落俗套、唔跟大隊，得㗎喇，知你勁㗎喇，大家都知呀，不過大家慣咗咁樣用呀，得唔得呀？
絕對唔否認Bryan英文好，但佢心地唔好，就以小巴司機呢單嘢為例，司機將10 dollars講成10 o’clock，錯就係錯，但如果你真係想幫人，咪幫司機同個鬼仔直接更正囉，唔使笑到咁大聲，意圖想全車人一齊同你恥笑個司機，坦白講，係好笑，不過司機已經好努力同埋有作出嘗試㗎喇。
其他同事知道我投稿，有段說話想登出嚟同Bryan講，係粗俗啲，不過希望你唔好刪：
「Bryan，我哋知道轉工密嘅正統英文唔係Jumpy，但我哋用開Jumpy呀，唔需要你批准㗎，等於我哋私底下叫你傻閪一樣，唔正宗㗎，父母改你個名都冇傻閪兩個字，過主啦屌你老母！」