同事之間有心病，又或者上司同下屬不和，喺職場上係最平凡不過嘅事，唔通好似啲膠劇咁，成班同事一齊去BBQ燒嘢食跳起Yeah咩！不過我親身經歷呢單又的確太誇張，鬧交鬧到話自己有白卡，真係太Over喇。
簡單啲講，我哋個阿姐確實係好情緒化，不過佢份人比較跳掣，心情唔好嘅時候講嘢好刻薄，平日冇事冇幹都有warm嘅一面，或者唔應該分男女，其實有啲男上司都係咁，即使係同輩一樣咁高咁大嘅同事，偶然都會喜怒無常，相信你同我都遇過。
話說我哋阿姐請咗個新仔返嚟，頭一兩個禮拜好正常，但唔知係咪阿姐覺得佢做耐咗，所以工作上嘅要求亦都相應提高，有次新仔跟一單嘢有甩漏，阿姐怒斥佢做嘢粗心大意，得過且過，自此之後就開始對新仔愈嚟愈苛刻，態度差咗好多。
呢個阿姐係非常先入為主，如果佢對你有偏見就會成日單單打打，就算對住隔籬部門啲人都係咁，而新仔可能年少氣盛，唔單止唔赦阿姐，受咗幾次氣之後仲還口，嘢嘢頂到行，久而久之就喺office對着幹，好多火花。
求其講個例子，某次阿姐話新仔份report打錯字：「其實你有冇心做㗎？唔係大學生咩？Expected都串錯？冇T㗎？」
新仔：「我係咪大學生你唔知咩？你請我㗎喎，大學生唔可以打錯字㗎？你人生係咪冇試過打錯字？」
阿姐：「你夠膽講多次！」
新仔：「原來你聾㗎？戴返個助聽器啦！」
我親眼睇住呀姐嬲到面都紅晒，新仔真係初生之犢不畏虎，加上佢兩個聲浪好大，其他department嘅人都望晒過嚟。
同類型事件發生咗兩三次，阿姐直情捉咗新仔入房單獨傾，不過佢哋入到房鬧得仲大聲，全層樓都聽到，所以情況並冇改善。
後來有一次唔記得咗因為乜嘢事又鬧交，阿姐發晒癲怒吼：「你唔好再激我呀！咪以為我唔夠膽炒你！」
新仔：「係炒就快呀！我白卡㗎！你唔好惹我呀！」
當時我隔籬位個師奶壓低咗把聲問我：「咩係白卡？移民嗰啲？」
我：「移民嗰啲叫綠卡，其實白卡正解係政府向殘疾人士發出嘅殘疾人士登記證，不過而家好多人會解做精神失常或者好癲。」其實我上網仲睇到白卡係取自日語「ばか」，都係解笨蛋或者傻咁上下，但係對住師奶同事就唔使解釋得咁詳細啦！
師奶同事：「即係佢話自己精神失常同好癲呀？咁又似喎，句句頂到咁行。」
阿姐同新仔真係日日都咁樣鬧嚟鬧去，情況一早就失控，不過自從新仔話自己係白卡之後，阿姐唔知係太攰唔想再嘈，抑或相信呢個係事實，緊接落嚟竟然採取放棄態度，完全架空新仔，咩都唔畀佢做，要人每日返工數手指。
其實我哋都分別搵阿姐同新仔傾過，希望佢兩個可以冷靜處理，因為其他部門當正我哋呢邊係小丑，日日食花生睇戲，大家返工都係搵錢啫，何必搞成咁呢？
以為將來嘅日子都要咁樣過啦，點知新仔失驚無神辭職，佢話抵受唔住呢種冷暴力，又話阿姐咩都唔畀嘢佢做之後，返工嘅時間過得好慢，認定阿姐係玩嘢公報私仇，咁我都覺得係嘅，反正份糧係公司出，阿姐唔會肉痛，等新仔自生自滅呢招係幾毒㗎，只係冇諗過新仔唔驚同阿姐正面衝突，反而係忍受唔到被投閒置散。
提議過新仔不如內部轉組，但佢話自己咁樣同阿姐鬧交，其他team見到都唔會收，要轉組唔容易，同時唔想留喺度見住阿姐篤眼篤鼻，仲話自己已經搵到新工，希望係真啦！
阿姐曾經叫我哋唔好同新仔farewell，不過大家冇理呀，lunch照同新仔飲茶，人哋都走啦，食餐飯無需要介意吖，有時覺得返工返到咁真係好無謂，上司下屬又好，同輩嘅同事都好，客客氣氣有商有量，日子都過得容易啲啦，何必互相為難呢，出嚟做嘢目的係搵錢啫，唔係搵氣受吖嘛！