自己洗牙 適可宜止免損琺瑯質

最近有朋友返新工想執正自己,本身打算book洗牙搞搞啲茶漬煙漬咖啡漬,但由於牙醫嗰邊有限度接受預約,所以佢等唔切,唯有去藥房買3蚊木賊自己搞掂!

木賊,亦可以稱為木賊草,係中藥嘅一種,普通藥房就買到㗎喇,記住係有得執藥,有百子櫃嗰啲藥房喎,淨係賣奶粉同埋成藥嗰堆藥房係冇㗎!你同職員講要木賊,基本上佢都知你用嚟洗牙,2至3蚊一包,呢幅相係我用咗兩年之後剩落嚟,因為幾蚊已經好大包,無須買太多。

用木賊自己洗牙係冇秘訣,真係就咁拎起,見到有漬嘅地方就擺埋去刷,除非你係千年煙屎牙,否則捽十幾秒就咩漬都甩晒㗎喇,而其實千年煙屎牙都可以捽到淺色咗,效果係明顯而且即時,肉眼就睇得到,捽完用清水漱一漱口會睇得更清楚。

有台灣醫師解釋過木賊點解可以洗牙同埋清除牙漬,原因係木賊本身有「節」,擦完後可以令牙齒變光滑,同埋佢本身有豐富植物纖維,會將牙齒表面嘅牙菌膜刷走。

醫師仲話用熱水浸木賊5至10分鐘係最好,因為變軟嘅木賊可以緊貼牙齒,更易清潔,但我自己一直以嚟都冇浸軟,拎起折斷一半就直接擦(因為太長好難控制),下次我都試試浸軟先。

另外,醫師提到每星期最多用一次木賊嚟「洗牙」,否則會損害琺瑯質 ,個人認為每星期一次都太多喇,你見我兩年都未用完,就知道唔需要成日刷,我諗自己大約半年左右先用一次,但同意用得多會損害琺瑯質,所以想清除牙漬除咗靠平時勤力刷牙之外,最正確嘅方法梗係搵牙醫洗牙啦!

講講下好似木賊專用嚟洗牙咁,其實佢喺中藥用途上係散風熱,例如喉嚨痛同埋個口長期感覺好苦,另外亦可降壓、消炎,同埋利尿。

細細個用木賊係因為洗牙好貴,當時公司又冇牙醫津貼,同埋有時發現啲牙有漬,真係等唔切約洗牙,所以屋企有包木賊傍身都係必須嘅。

error: