之前喺一間家族生意公司做嘢，真係麻煩到嘔，以後咪搞。
勁多皇親國戚喺度返工，有啲仲係「隱藏人物」，我作為一個新仔入到嚟鬼知咁多咩！
同部門就有個老女人唔做嘢，日日最遲返工，講嘢又冇尾音又冇禮貌，但佢明明唔係department head吖，咩事咁惡呢？嗰陣入嚟做冇耐，趁嗰個老女人冇join食晏，私下問其他同事咩料，點解冇貢獻仲可以咁臭串？成班同事反應好大，叫我唔好得罪佢。
我：「點解先得㗎？」
同事：「佢係老細個妹嚟㗎！你唔覺阿姐都唔敢畀嘢佢做咩？」
我：「嘩，原來老細個妹一直坐我後面……佢份糧幾易賺喎，咩都唔使做。」
同事：「妖，老細大把錢，應該係唔想個妹咁頹廢，叫佢返公司坐下，總之你唔好得罪佢，盡量同佢減少傾計同埋眼神接觸啦！」
我：「多謝提點，收到！」
靠人提點真係防唔到太多，因為公司裡面嘅皇親國戚多到數唔晒，我親眼睇住個同事食死貓都唔敢出聲，佢喺email裡面black and white寫晒出貨日期，但係負責嗰個人最終miss咗，有個高層嬲到噴火咁滯，嗰位同事依然獨力承擔，仲叫我唔好多事，原來做漏嘢嗰位係老細個親戚個舊同學。
老細介紹親戚，親戚又介紹舊同學，真係九唔搭八。
人哋嘅嘢最多咪唔理囉，你要做港豬做狗係你嘅事，換轉係我就一定出聲，總之人不犯我，我不犯人，好可惜我都係難逃一劫。
有次入茶水間想喺雪櫃拎返自己盒檸檬茶，有個同我一樣係廿幾歲（目測），一樣係咁高咁大（我指身型）嘅男仔企咗喺度唔郁，好生面口，咁我唔理佢啦，點知佢叫住我，點我去換水喎，原來水機冇晒水，我都意識到佢又係「嗰味嘢」㗎喇，不過我係唔會換，你又唔係女，我亦唔係你隻狗，你要飲水梗係自己換啦！
本身想唔理佢拎完檸檬茶轉身走，咁樣已經夠串喇啩，點知佢仲串，再加多句催我換水：「換嗰陣記得抺乾淨個樽口呀，好多塵㗎！」
咁你唔好彩喇，我唔係有錢仔，但又唔等錢使，所以一句回埋去：「你要換自己換啦！有手有腳，廢㗎你？」
廢人：「你講咩話？」
我：「廣東話。」
廢人：「你知唔知我老豆係邊個？」
我：「你老豆係邊個，返去問你阿媽吖嘛，我點知你家事呀！」
結果點？咪炒大鑊炒到全公司都知囉，阿姐叫我入房，我話唔使喇，嗰陣都未做夠一個月，勞工法例講明，試用期內第一個月唔做，無需通知期，無需代通知金，我連自己水杯都未有，直接走得喇，唔使送，Reference letter就算罷啦，當冇做過，填落CV仲煩。
你問我可唔可惜？喺呢間家族生意公司做落去就真係可惜喇。不過講開又講，我到而家都唔知個廢人嘅老豆係邊個？所以我真係唔知得罪咗邊個？唔緊要啦！完全冇興趣知。
投稿讀者：專治廢人