Post，係找數；讚，係真心。
任何國籍都會有好人、壞人、麻煩人，對住香港人讚港女會有人鬧，對住台灣人讚台灣女仔會有人唔認同，對住日本人讚日本女人都一樣有人唔滿意，所以我只係用自身經歷同感受去講，畢竟每個人際遇唔同，我好幸運，拍過拖嘅香港女仔都好好，但我亦好唔夠運，拍過拖嘅台灣女仔同日本女仔都令我有少少陰影，不得不承認自己係對港女偏心。
《5個愛港女的理由》
1）爽直／做自己：
港女係好mean，有時真係冇句好嘢，不過佢做緊自己呀！你唔會結咗婚先發現佢變咗另一個人，因為最樣衰最口賤嘅嘢一早show晒畀你睇，而佢對你有咩唔滿意，亦都會show晒出嚟，直接向你發牢騷，係咪覺得好煩？但係你知道嗎？粉飾太平，淨係同你講好聽嘅說話係冇用㗎，兩個人喺埋一齊，最忌就係有咩唔開心都唔講，然後喺心裡面默默扣分，咁先至最可悲。
2）義氣／捱得：
香港女仔如果真係愛你，佢好肯同你捱，當年流行講「搵個肯同你食M記嘅女友好難」，其實我冇咩感覺，我識親嘅女友都可以食普通嘢，最難反而係氹佢去食貴嘢，食得好少少就會話：咁貴、好唔抵呀、呃錢囉……作為男朋友梗係掃興啦！如果你女友／老婆同你講過呢啲嘢，恭喜你！係好掃興，不過佢真心愛你。
不為讚而讚，講得負面啲，港女有時係幾戇居，為另一半去借錢嘅case我都聽過幾個，雖然唔明智，但港女好有義氣，公一份婆一份，齊齊孭起成頭家嘅例子就更加多，你勸佢結婚後唔好做嘢係一件相當困難嘅事，佢哋基本上係冇意識嫁完人就咩都唔做等老公養。
3）同根、同背景、同文化：
有次日本女友同我講，佢最欣賞嘅香港明星係成龍，我話：「你知唔知成龍喺香港做過咩？好多香港人唔鍾意佢。」佢覺得好驚訝，解釋完，佢只係覺得私生活就係私生活。
另一次我同台灣女友一齊時，另一個friend剛好send張相畀我，係佢有一個女仔friend個樣勁似安德尊，唔係要貶低大王，只係我覺得女仔個樣好似安德尊似乎唔多好，當台灣女友見到我笑之後，佢問我咩事？我答：「喂你睇下，個女仔好似安德尊。」佢問我：「誰是安德尊？」係喎，佢唔識係好正常，但點解釋呢？解釋完又係咪仲覺得有趣呢？
我有時好想同佢哋講430穿梭機，呀唔係，閃電傳真機，oh，sorry，應該係放學ICU，我細細個睇放學ICU大嘅，但係我講唔到呀，究竟要用幾多時間解釋？我希望另一半係有共同語言同埋共同回憶，一生人太長，我想下次講安德尊講成龍講開心舞講放學ICU嘅時候，雙方可以即刻吹落去，有啲位識笑就識笑，唔識笑，就只能獨樂樂。
4）文化水平高：
呢樣我唔知點解釋，不如簡單啲，大家最唔鍾意嘅「女上司」同「女老闆」，喺香港係幾多㗎，遇到嘅頻率都好高，乞唔乞人憎就見仁見智，但佢哋真係靠學識同能力而做到呢個位，當中更加會發現呢啲港女抗壓力好強，可能係巧合啦，我身邊好多女性朋友嘅英文都係「勒勒聲」，唔知你身邊有冇呢？
5）適應力強：
呢樣其實港女都唔想㗎！環境迫成，大家有冇聽過日本人間屋點細都好，一定要有浴缸，基本嘢。而台灣女友嚟香港搵我時，佢覺得我香港間屋好細（500幾呎），唔怪得佢，對方喺高雄住緊「透天厝」，返房要行樓梯，我都要幫佢講返好說話，佢唔係嫌，只係不解，呢個係社會問題。
香港女仔住劏房我識幾個，自己住又有，同男友老公住都有。當然啦，你有間千呎豪宅，港女一定鍾意，不過你要佢住劏房，住200至300尺冇浴缸嘅細單位，港女一樣得，適應力強，能屈能伸。
－－－分界線－－－
有時我會覺得，如果一個男人好嚮往同台灣女仔，或者同日本女仔拍拖，一直話港女唔好，原因通常係～～～講呢句嘢嘅人未同過台灣或者日本女仔拍拖。
人好得意，最容易令人感到sweet、溫暖、浪漫，同埋驚喜嘅，永遠都係陌生人，因為你對佢冇期望，表面嘅嬌嗲同溫柔一定人人受落，因為當中冇包括人生高低潮，冇包括現實嘅柴米油鹽醬醋茶。
另一半係台灣人或者日本人嘅男士，唔好嬲我，因為你哋係幸運兒，飄洋過海都搵到一生中最愛，文章一開頭已經講咗，人好睇際遇，呢個係我嘅際遇，所以我特別鍾意港女，同時見到佢哋好多優點，而呢啲優點並唔係霎眼嬌，全部都係可以陪你漫步人生路嘅元素。