喺Ritz Carlton又鋸扒又食甜品，埋單要四千幾蚊，你梗係以為我溝緊女哩，唔係呀，係同老細食，佢埋單，兩條麻甩佬喺五星級酒店嘅浪漫環境之下共進晚餐，真心覺得周圍啲人會以為我哋兩個係hehe，食完就上房啪啪啪！
我老細半年前離咗婚，佢話唔想返屋企對住四面牆，個人會好down好頹，不過佢抵受唔住一個人出街飲嘢食飯嗰種可憐同孤單嘅感覺，所以剛離婚時係猛咁捉住成班同事陪佢放工食飯，只係一星期五日，有時連假期都call人出嚟，啲同事就開始吃不消，搞搞下而家得我同佢食。
如果你問我係咪為咗擦鞋先會陪老細食飯，我好老實咁答你係都有啲，特別係開頭嘅時候，始終想份工穩陣啲吖嘛，麻煩你升職第一個人諗起我，加人工第一個人諗起我，咁就夠㗎喇。
後來仲有兩個原因令我keep住應約同佢放工食飯，其一係覺得老細都幾慘，接近50歲人，除咗做嘢嘅時候就孤伶伶，其次就係佢同親我去食飯都係食到好貴好豪好高級，自己根本唔會去嗰啲地方，食幾餐已經係我一個月人工咁滯，咁當係見識下都好吖。
大家可以放心，雖然老細離咗婚，但佢100%鍾意女人，有時會講下鹹濕嘢，肯肯定佢係直嘅，而我都有女朋友，有次膽粗粗問老細可唔可以叫埋女朋友出嚟食，老細居然話無任歡迎，嗰次仲要食omakase，三千幾銀一位，三個人連埋嗌酒成萬蚊落樓。
不過我女朋友出過一次就唔去喇，佢話：「頂唔順你老細，成餐飯喺度放負，係咁安慰佢好似做咗社工，同佢食完一餐飯都發覺自己有自殺傾向。」
女朋友形容得誇張啫，如果食餐飯都搞到有自殺傾向，我晚晚同老細食，食足半年，咁樣應該死咗幾廿次啦！不過老細一路食一路放負就係真嘅，其實都唔係太安慰到。
字裡行間聽得出老細都唔係太鍾意個老婆，因為啲問題累積咗好多，離婚對佢嚟講某程度上係解脫，只係佢習慣咗有個人喺身邊十幾年，忽然間冇咗，嗰種空虛失落好難調整，而佢嘅心路歷程我都明白嘅。
老細：「你知唔知我試過搵ptgf食飯？」
其實我知，因為佢已經講過起碼5次，懷疑佢曾經中過招所以有腦霧，不過我冇咁講，仲好識做咁答：「係？ptgf？邊度搵㗎？」畀下面佢啦，你唔畀佢從頭講起，可能就要講其他新話題，新話題又要畀新意見，我寧願專心食飯，然後咁上下就應佢兩句。
老細：「喺tg搵咋！」
我：「tg你都識玩呀？好潮喎，我都冇用tg呀！」
老細：「好易咋，不過你唔好玩喇，你有女朋友，嗰啲ptgf感覺好差。」
雖然我已經知點解佢覺得差，不過嗰餐叫咗個和牛未上，求其搵啲嘢問住先，撐一撐時間。
我：「點差呀？啲女好樣衰？」
老細：「唔係，樣衰我唔介意，佢哋真係為錢出嚟，都冇心聽我講嘢，有個仲好笑，問我想唔想更進一步，加錢就得喎，我同佢講：妹妹仔，我唔係為咗咩咩先搵你㗎，我真係想搵人陪我食飯，聽下我講心事！點知個ptgf夠鐘就雞咁腳走，所以話呢，有錢唔係大晒，有錢都唔一定搵到個真心會聽你講嘢嘅人。」
大佬呀，ptgf都係一份工，人哋梗係為錢啦，唔通為興趣咩！
咁我老細外型又的確唔討好，典型中坑一名，你係型佬就話啫，佢算好好彩啦，大把人四十幾歲失婚但係冇錢，連搵人出嚟食飯嘅能力都冇呀！
老細仲話：「有時都幾心酸，你搵客食飯，佢以為你傾生意，搵身邊啲friend食飯，正常食一次半次，約都難，有啲肯同你食呀，但就不懷好意，因為佢哋知我有錢吖嘛，有個friend同我食完兩次飯就叫我投資，我話我咁大間公司都夠晒煩，唔需要再投資，跟住佢就問我借20萬，我唔借，呢個friend直情消失埋，唉！搵男同事好似你咁就好啲，如果女同事始終要避嫌。」
聽到佢咁講，又突然覺得佢好慘，所以呢個都係我肯陪佢食飯嘅原因之一。
究竟呢半年同老細食過啲咩好西呢？Ritz Carlton食過，三千幾蚊位omakase食過，壽喜燒食過、爐端燒食過、咩福臨門、天龍軒，乜軒物軒嗰啲甚麼米芝蓮都食過晒，有時星期六日佢仲會約我去酒店食嗰啲貴夾唔飽嘅港女tea，總之就唔貴唔食，呢份工抵做呀，雖然唔計OT，不過全香港最貴嘅食肆都去過晒。
認同我女朋友所講，食好西當然爽啦，但係孖住個成餐飯放負嘅人的確好攰，嚟緊我都會慢慢減少，可能一個星期先會同老細去一兩次，最近我條女都詐型喇，希望佢第日可以適應一個人食飯，又或者搵到多隻後備飯腳攝下啦！
今日情侶座仲有另一篇新稿
男朋友送CELINE A貨：「Sorry！真係原諒唔到！」
https://hkofficedaily.com/?p=22524