我本身唔係鍾意名牌嘅人，29歲女連一個名牌袋都未擁有過，買得起但覺得唔需要，而且買咗一定會覺得肉痛，亦唔會好恨有呢啲奢侈品，有次同男友行尖沙咀海港城經過CELINE門口，我講咗句：「公司有個女同事日日孭呢個袋返工，應該要幾萬蚊啦！」我係唔入流到連大約幾多錢都唔知。
我句說話就係咁多啫，冇任何明示暗示，只係想分享公司有女同事用緊我指住嗰一款CELINE袋，呢個經歷就咁完咗喇，點知相隔一個月之後男朋友送咗個CELINE袋比我，exactly係我上次指住嗰個款，仲話係生日禮物。
我：「咁貴？你痴線㗎？」
男朋友：「咁你上次話鍾意吖嘛！」
我：「我由頭到尾都冇講過鍾意呢兩個字喎，我係話公司有女同事日日孭返工咋！」
男朋友：「最緊要你鍾意，貴唔緊要，Happy Birthday!」
如果你問我有冇懷疑過係假，我會答你冇，另一半送嘢比自己，除非佢自己認係翻版㗎啫，否則好人好姐點會直接問佢：「真定假㗎？」咁樣係好唔尊重同埋侮辱對方。
男朋友冇買A貨比我嘅前科，我真係從來冇要求過，亦唔會同佢討論啲咩名牌，真真假假我更加唔識得驗證，因為我買名牌嘅經驗係零，唔計同事，淨係講身邊朋友都唔係用開名牌嘅人，所以完全冇呢方面嘅認識。
又隔咗一排，男朋友問我點解唔用佢送嘅袋。
我：「驚刮花吖嘛，日日迫車咁多人。」
男朋友：「唔使驚喎，買返嚟就係要用㗎啦！」
又有道理，咁我咪孭出街囉，之後仲孭埋返工，跟住就有同事兜口兜面同我講係A貨。
我話唔係啩，男朋友送嘅生日禮物嚟喎，然後幾個同事就圍埋討論，本身孭呢款CELINE袋嘅女同事仲拎佢嗰個嚟同我個「CELINE袋」比較，逐個細節位對比……結局唔使講啦！
講真我第一時間仍然冇質疑男朋友會買A貨，反而係諗個傻佬會唔會走去幫襯啲IG store然後比人呃，所以我即刻WhatsApp問佢：「同事話個CELINE袋係A貨，你係咪比人呃呀？買咗幾多錢？問過你幾次都唔肯同我講，邊度買㗎？」
男朋友：「我冇比人呃呀，托朋友買㗎，超A高仿！佢話冇分別，同真嘅一樣喎，你班同事係咪睇唔起你先至話你用A貨咋？我對過CELINE網站幅圖，完全係一模一樣㗎！」
我嗰刻真係著咗：「你買A貨出聲吖嘛！我而家好瘀呀！全公司都知我用A貨，點解你要呃我呀？」
男朋友：「我幾時有呃你呀？」
我：「冇呃我？咁你又話貴唔緊要？你認咗係貴，即係存心呃我係A貨啦！」
男朋友：「咁人人對貴同埋平嘅定義都唔同㗎啦！我托朋友買都要千幾蚊，千幾蚊唔貴呀？千幾蚊我哋兩個去食餐buffet都有找啦，咁千幾蚊可以去個staycation包埋三餐添喇，咁你話呢個袋千幾蚊係咪貴吖？」
聽完佢解釋仲嬲！
我絕對唔係貪慕虛榮要名牌嘅人，更加唔會亦都未試過要男朋友送名牌，冇咪唔用囉！但你點解要隱瞞個袋係A貨呢？仲要提我記得用，有冇諗過我會比同事拆穿㗎？呢份工我仲要返，呢班同事我仲要每日面對㗎！
呢件事已經發生咗成個月，我亦都嬲咗佢成個月，雖然未去到話要分手，不過我真係冇心情同佢去街，暫時都唔想見到佢，Sorry！原諒唔到！同人講仲會比人覺得我係港女，為咗個名牌同男朋友搞到冷戰。
其實根本唔係名唔名牌嘅問題，我一啲都唔稀罕，寧願佢堂堂正正送隻杯或者送個相架比我，都唔要一個A貨袋然後唔出聲，最後仲要話同真嘅冇分別，又話千幾蚊對佢嚟講已經算好貴，究竟有冇人明白我感受呀！