我係headhunt，有間大公司想請Strategic Account Manager，可以越洋請人，外國人都得，人工仲要好可觀，咁我就喺linkedin漁翁撒網啦，又真係有幾隻CV返，當中仲有兩份係來自Meta，即係Facebook，夠晒吸睛喇啩！
嗰間大公司雖然唔夠Facebook大名氣，不過都唔算差㗎，而且出手闊綽，人工、假期、Housing，同埋所有福利都齊晒，特別係Housing有成$40,000津貼，雖然話香港租貴啫，但呢個價錢已經大把好選擇㗎喇！
可能因為咁，所以我收嘅CV亦比預期多，奇就奇在個大老闆約咗5位candidate網上interview，反而最靚仔嗰兩份CV唔要，一個係而家做緊Facebook，一個係曾經做過Facebook，我明明對過啲job details幾乎一模一樣㗎喎！
我：「你好呀，點解做過Facebook嗰兩個唔in嘅？想了解下，驚自己搵錯方向。」
大老闆：「呢間公司嘅人全部都係垃圾，上次我同個客出去食飯，對方都係咁講。」
原來呢位老闆間公司近年吃盡Facebook嘅苦頭，平時啲post嘅「能見度」被壓到好低，跟住就有啲外判嘅Sales好似收數佬咁日日騷擾，目的就係要你畀錢落廣告做boosting，似足爛仔。
大老闆：「有次同個客傾緊生意，個電話係咁有線入，我咪忍唔住聽囉，對方講英文，話係Facebook打嚟，想傾下落廣告嘅方案，我話唔得閒跟住收線，幾個字之後又打嚟，今次講啲唔鹹唔淡嘅中文，又係sell咩廣告方案。」
我：「咁狼？通常啲Sell嘢嘅電話你cut線或者話冇興趣，跟住都唔會再即刻打嚟喎，Facebook會咁咩？」
大老闆：「親身經歷，我真係有一刻以為自己爭緊人錢，銀行追數都冇咁密集。」
呢個大老闆同客傾完電話，轉頭又有email到，原來係打嚟條友用email跟進，睇返個footer發現係另一間公司名，上網再查下先知係來自馬來西亞嗰頭，公司網頁仲大大個logo話係同Facebook合作，再查下send email嚟條友嘅linkedin profile，又係寫到明同Facebook做嘢，明查暗訪終於知道係類似外判同埋partnership形式。
大老闆：「沒落到搵呢啲爛仔公司合作，咁都唔緊要，Facebook愈做愈差，愈改愈衰，由Sales到IT都係，公司原地踏步我見得多，大倒退真係好少見，入面啲人全部都係呃飯食，你愈改愈好冇人話你吖，仲有改版，點會下下都好似未試完就推出嚟仲要迫人轉㗎！」
大老闆公司有個official嘅公司Facebook專頁，上年曾經被迫轉新version，不過轉完之後就有一堆post唔見咗，及後又容許佢哋轉返舊版，轉完又有另一啲post唔見埋。
大老闆：「平時淨係玩Facebook嘅人可能唔知，但如果你有自己嘅Facebook專頁或者幫公司處理商業性嘅account，你就會明佢哋後面嘅setting都係亂七八糟，好唔人性化，我感覺喺入面做嘢嘅人都好似玩泥沙咁兒戲。」
我：「佢哋有冇CS或者支援呀？你哋公司應該都用唔少錢做sponsor喎，真係冇人跟進？」
大老闆：「跟進？畀錢落廣告就有人認頭，幫手就冇喇，全部電腦回覆，一係就石沉大海，有時仲會無厘頭ban你啲嘢，完全冇理由，難怪最近股價插得咁勁，凡事必有因。」
我自己就冇用Facebook商業account，背後嘅嘢唔知咁多，不過股價插水就知，睇嚟真係有原因。
呢個老闆補充，由於業務關係，公司點都要用Facebook做一個入口位，而且係面向香港市場，暫時未有任何平台可以取代，所以處境好無奈，佢話FB由CS、Sales、IT，全部都令人大失所望。
而對我嚟講，最緊要係搵出老闆點解唔用Facebook嘅人，不過聽到佢話裡面嘅員工全部係垃圾，唔知點解第一時間諗起斷水流大師兄林國斌。
《情侶座》被FB當係spam跟住移除嘅文章……令人費解。
朋友送CELINE A貨 「Sorry！真係原諒唔到！」
https://hkofficedaily.com/?p=22524