同事車逆線行駛 差啲見唔到老婆同個仔

話說我有個同事Gabriel最近買新車,印象中佢兩至三年前已經考咗車牌,因為記得當時Gabriel係請咗幾日假去學車同考車。

新車落地,Gabriel好慷慨咁話放工可以畀大家搭順風車,第一日我同其他兄弟唔得閒,不過隔籬Team有個女仔話約咗男朋友趕時間,所以就叫Gabriel送佢一程。

第二日終於輪到我哋部門幾個手足坐Gabriel順風車,離開公司嗰陣,隔籬Team嗰個女仔嗌住我,叫我記得戴安全帶,當時我仲諗女仔果然細心啲,冇諗過呢句說話背後嘅意義。

行到落停車場,其中一個兄弟話醒起有嘢要做,決定唔坐Gabriel車,咁唔緊要啦,得返我同另一位同事Ivan仲好,坐得闊落啲,唔使迫迫夾夾。

上車之際Gabriel叫我坐前面,話費事搞到佢好似Uber司機載客咁喎,哦!冇問題啦,咁我咪坐前座囉!Ivan一條友坐後座,好得戚咁話好爽,安全帶都冇用,攤喺度成個大爺咁,不過Gabriel出車之後唔夠一分鐘我哋已經知錯,出公司停車場嗰下佢冇睇,已經畀人怒砵一嘢,以為佢唔小心啦,再出到路口又係冇停,小路出大路差啲撞,連隨畀個的士司機粗口問候,呢個時候我留意到有「咔察」一聲,擰轉頭睇睇,原來係Ivan戴返安全帶,成個人收起笑容坐得好直,我下意識都摸一摸自己條安全帶,make sure真係戴穩。

全程車不斷被唔同嘅司機砵砵砵砵砵砵砵,有一度我忍唔住同Gabriel講:「你唔好係咁踩煞車啦,我哋又窒下窒下,後面啲車見到都驚㗎!」

Gabriel:「哦,知道……我驚撞到前面架車。」

我:「你同前面架車已經有五個車位,定啲嚟啦!」

後座嘅Ivan都忍唔住:「喂你開得咁慢唔好霸住條快線啦!後面架車推我哋呀!」

慌失失嘅Gabriel:「哦,知道……而家打燈轉線。」

跟住我就見到車窗嘅水撥郁緊,喂,冇落雨喎!你搞掂邊個掣打燈邊個掣水撥未啊?一個要扭,一個係剔一剔,手勢都差好遠啦!然後佢開住個水撥轉線又差啲撞…

我:「Gabriel你過埋呢段放低我。」

Gabriel:「唔好啦,我ok㗎!」

我:「唔係講笑,我有老婆同仔,我個仔兩歲咋,驚返唔到去見佢哋呀!總之過埋呢段路你放低我啦!求下你。」

雖然Gabriel好冇癮,不過冇辦法喇,冇同事做又好,冇朋友做都好,命仔緊要,以為捱埋呢段路可以脫苦海,點知轉出去搵位停車嘅時候仲未驚完,Gabriel喺一條路入錯線都唔知,有一個畫面係逆線同對面個小巴司機眼望眼,好在對面紅燈,架小巴冇郁,但見到小巴司機呆撚晒。

終於搵到位泊埋一邊,我又擰轉頭望一望Ivan,條友仔坐得好撚直,直過平時開會,郁都唔敢郁,我問Ivan落唔落車,Gabriel話唔好,想有人陪會定啲,唉,我唔理喇,落車轉的士。

隔咗幾分鐘收到Ivan電話問我喺邊,我話已經上咗的士,原來Ivan都忍唔住要落車,由得Gabriel自己開到蟻躝咁慢返屋企,明智吖!

第二日我哋狂勸Gabriel唔好再揸車,害死自己唔緊要,唔好害人吖嘛,呢啲簡直係馬路炸彈。

我:「你個車牌幾年喇喎,手車仲咁屎嘅。」

Gabriel:「考咗車牌幾年啫,但冇揸過吖嘛。」

Ivan:「你呢啲雪藏牌真係衰過P牌。」

Gabriel:「知啦,今日冇揸車返工喇,之後去補鐘先再敢再揸。」

我:「唔好揸,一次都唔好再揸,代全香港市民求你!」

見到噚晚臨放工先甩底唔上車嗰位同事,我即刻話佢夠運,好似避過死神嘅召喚一樣,點知個同事話:「唔係好彩㗎,噚晚搭電梯落停車場嗰陣,你同Ivan企前面,我同Gabriel平排企後面,我睇到佢Google煞車掣係左邊定右邊,當時已經知道有危險,電梯又冇訊號,見Gabriel Google完好似load唔到,思疑佢開車前都未搞得清煞車同油門。」

我:「DLLM呀!咁都唔提我同Ivan?」

「好大鑊咩真係?」

我:「差啲冇命返去見老婆同個仔呀!」

「我以為自己細膽咋,sorry囉!」

Sorry Sorry,講Sorry大晒呀?只見隔籬Team嗰個女仔見到我哋人齊返工,個樣好似鬆咗一口氣咁,我屌埋你呀真係,下次直接講吖嘛,講咩記得戴安全帶呀?人命嚟㗎!愈諗愈嬲,再嚴重警告多次Gabriel唔好再揸車先!

error: