呢份工我做咗兩個半月，啱啱先知道老細原來養緊鬼仔，其實諗返轉頭都覺得好奇怪，因為佢間房係長期唔開燈，不過就長期有紅色光滲出嚟，好似啲一樓一架步咁，而且耐唔耐就有怪聲傳出，一時係巨響，一時係笑聲。
初時不以為意，巨響到而家都唔知係咩聲，笑聲我開頭係估佢同人講電話之類，直至上個星期我阿head放假，佢叫我入房搵老細簽份嘢，咁我先至第一次行入去老細房，頂佢個肺竟然有個類似神主枱嘅物體（又唔係神主枱，總之就有個櫃擺咗個盒，有盞紅又紅唔晒，白又唔算白嘅燈，總之好詭異。
老細個樣都係有少少陰裡怪氣，呢個一早已經覺得，佢個黑眼圈好大，你有冇識過啲人有好勁嘅鼻敏感？就係類似嗰種黑眼圈，如果老細唔係肥肥地，我甚至懷疑佢係吸毒。與此同時，老細個樣仲要長期都好唔精神，唔知係好攰定係點。
因為佢間房實在太詭異喇，出咗去之後有啲心寒同埋唔舒服，然後我就問咗個比較玩得埋嘅同事：「老細咁怪嘅？又唔開燈，裡面陰風陣陣。」
同事：「唔好亂講嘢呀，入面有隻鬼仔。」
我：「鬼仔？」
同事：「養鬼仔嗰啲鬼仔呀，唔係外國人嗰啲鬼仔。」
我：「我知，我重複係因為好驚訝啫！你認真定講笑呀？」
同事：「呢度個個都知啦，老細認咗㗎喇，仲講到明平時佢唔喺度嘅時候，邊個都唔可以入佢間房。」
我：「即係隻鬼仔長期擺喺公司㗎？」
同事：「咁我又唔知佢點養法喎，都唔知佢有冇帶返屋企，定係長期留喺office。」
我：「唔係啩！咁恐怖你哋都頂得順嘅？」
同事：「你入去都係冇開燈啫，咁都叫恐怖？你有冇見過老細同鬼仔食飯吖？仲恐怖呀！」
聽同事講，原來老細係有私伙「食物」畀鬼仔，有時就會轉下「口味」，外賣叫兩份，而其實間房得老細一個人，有同事入去嘅時候見到有個盒仔喺外賣前面，成個畫面就好似老細同隻鬼仔撐緊枱腳一樣，所以有啲女同事都係會驚，冇咩事盡量唔入老細房，除非有文件同埋有單一定要老細簽名。
我：「其實你聽唔聽到平時老細間房周不時會傳出怪聲，好似啲碌架床有人跳上跳落嗰啲聲，不過冇理由吖，佢間房都冇碌架床，唔通係嗰張好似神枱嘅木板聲？仲有啲笑聲呀，其實我最初以為老細同人講電話，但聽真啲硬係覺得裡面有兩把聲傳出嚟。」
同事：「可能我哋都慣咗，有啲聲你日聽夜聽就會免疫，聽到都唔多覺，不過office咁多人，冇咩好驚啦，我有次去廁所聽到隔籬嗰格有小朋友講嘢添！行出嚟之後先發覺成個廁所冇人，咁我咪仲驚，冇事嘅，平生不作虧心事。」
寫字樓大廈廁所有小朋友聲喎，咁都唔驚？
唔知係心理作用定係點，當我得悉老細原來真係養鬼仔之後，連續兩三日都覺得個人好唔舒服，手腳好軟，好似平日發燒嘅徵兆，不過又冇發燒冇病，總之就成個人都唔聚財，每次行過老細房或者去廁所都會心跳加速，最衰我係男仔啦，唔通叫人陪我去屙尿咩，咪忍埋忍埋幾次先去屙囉！
我返屋企將呢件事同阿媽講，因為真心想辭工，以為老人家聽到會企喺我呢邊，你知佢哋對鬼神嘢好避忌好敏感㗎啦，我都係想求個心理安慰，希望有人支持下啫！
老母：「老細養鬼仔關你咩事？」
我：「養鬼仔喎！容乜易跟埋我返屋企㗎？」
老母：「有老細唔跟會跟個死窮鬼返我哋間公屋？你唔想做就出聲啦，唔好搵咁多藉口，冇份工做得長。」
我：「唔係藉口呀，你知唔知我老細好怪㗎！個樣又無厘神氣，仲會叫多個飯盒同鬼仔撐枱腳，我有同事去廁所聽到有小朋友聲添呀！」
老母：「你同事男定女呀？」
我：「男呀！男仔都驚呀！」
老母：「男廁聽到女人聲就話驚啫，聽到小朋友聲有咩好驚？不如你驚冇錢好過啦！你之前失業半年有冇畀家用呀？鬼仔都驚？我生咗個仆街仔仲驚啦！」
開始懷疑我唔係呢個老母親生，不過我唔會理佢喇，如果嚟緊返工仲係覺得周身唔聚財，我一定會辭咗工先算，所以我都想借呢段稿問下大家，如果同樣嘅事發生喺你身上，你會唔會想辭職先？