入咗間公司唔夠3個月，已經頂唔順辭咗職喇！我公司係做一啲護膚品同supplement，不過完全唔出名，講真唔係入嚟做都唔知有呢個品牌存在，頭一個月就發覺唔多對路，首先training好似洗腦課程咁，講到自己嘅product天上有地下無。
再做落直頭發現班同事好癲，有個女仔底薪得$15,000，佢竟然用咗$7,000買公司產品，呢度成半份糧咁滯喎，咁你今個月返工咪其實得一半人工落袋？然後佢仲話好抵，因為有員工折扣，平過喺街買好多。
呢間公司唔係做傳銷，佢啲product其實都會擺去大型連鎖店賣，咁當然唔係嗰種eye level當眼處啦，例如LOG-ON都唔受我哋玩，聽講老細好想擺去人哋啲舖賣，不過傾咗幾年都傾唔掂數，內情就唔知喇。
呢啲銷售策略我就唔理佢啦，只係唔明身邊啲同事點解好似撞邪咁，一個二個都係咁用員工價買公司product用，幾個同輩已經係咁問我點解唔買？咁我咪話自己有用開嘅牌子囉，然後佢哋就係咁質疑我：「出面啲牌子唔好㗎，啲錢用晒嚟做廣告，好多雜質。」
我：「你點知好多雜質？你拎過去化驗。」
同事：「化驗嗰啲呃人㗎，可以畀錢做假。」
我：「咁你有證據知佢做假，點解唔告佢？」
同事：「總之我哋公司嗰啲就最天然，你睇下我用咗之後皮膚好咗幾多！」
好嘢呀佢！呢個同事明明成面都係瘡，佢夠膽死同我講用完之後皮膚好咗好多，唔通我未入嚟做之前佢係爛面嘅？而家已經係救返？不過我冇講到咁mean啦！你買你嘅事，最緊要唔好迫我買，用咩牌子係我嘅自由。
畀壓力我嘅唔止同事，仲有我嘅supervisor，呢條八婆三日唔埋兩日就叫我用staff price買公司啲護膚品同supplement：「買啦，你入嚟咁耐都未買過，你作為員工係要用下公司嘅product㗎，你唔了解多啲點得呀？」
我：「咁如果我做車行咪要買架車？如果我做地產唔通要幫公司買層樓先可以繼續做呀？」
Supervisor：「你都打橫嚟講，車同樓咁貴又點同呀！好似呢支卸妝水咁，你用staff price買都係講緊二百幾。」
一個打橫嚟講嘅人話我打橫嚟講，點夠佢玩呀！
我：「唔啦，我好容易皮膚敏感㗎，我好難得先搵到一隻適合自己嘅牌子。」我用嗰隻賣到街知巷聞，唔係話名氣大就一定好，不過冇名氣亦唔代表好囉唔該！
Supervisor定時定候就會轟炸我，後來有一次佢仲用命令口吻叫我買：「老細會睇你哋有冇用公司product㗎！邊個員工用過staff price買嘢佢都知，你係咁易買啲supplement都要啦，印象分嚟㗎！」
我：「我真係唔需要哩，supplement我食緊一隻大牌子，好貴㗎，上次買咗幾樽有排未食完。」
Supervisor：「Mask你又話用其他牌子，卸妝水你又話第二隻好啲，supplement又話有食開，其實你咁唔信公司啲product點解要入嚟做？我有時真係唔明白你！講親你又駁咀！」
我：「下！兩件事嚟㗎喎！你問我點解要入嚟做？因為要搵食囉！即係好似打政府工嘅人都唔一定信政府啦！搵食同埋信唔信係冇抵觸㗎喎！」
Supervisor：「你自己諗清楚啦！我唔同你拗，係咁易買支唇膏好好睇睇啦，用埋staff price都係百零蚊。」
我：「唔係百零蚊嘅問題呀，我有用開嘅顏色，如果係啱用嘅，一千蚊我都肯買，但我真係唔啱吖嘛！邊有人返一份工要焗買公司嘢㗎！我覺得你而家畀緊壓力我囉！」
Supervisor：「一句到尾你都係唔信公司啲產品啦！」
我：「都話唔係信唔信嘅問題，係需唔需要嘅問題，上次你話車同樓太極端，咁不如我用另一個例子，我有個friend喺脫毛中心做，咁佢一早脫咗毛咪唔使用公司service同product囉，就係咁簡單之嘛！」
個Supervisor對我嘅解釋完全聽唔入耳，後來成班同事仲好似杯葛同排斥我咁，食晏唔叫我，講嘢就圍埋一齊細聲講大聲笑，再唔係就大大聲討論各自用staff price買咗咩公司嘢，係咁話好抵呀！好好用呀！好正呀！
喂！我一定好羨慕你哋啦！聽到有個同事買咗萬幾蚊，一個買咗幾千，最少嗰個都買$3,000，聽到你哋取於斯用於斯，每個月都要將部分人工貢獻落去買公司product，我真係恭喜你哋呀！唔怪得皮膚好咗咁多啦！
最後唔做唔係買佢哋怕，而係覺得同呢班人一齊共事好冇癮，希望我快啲搵到新工啦！