我有個變態阿姐，其實佢唔係好老㗎啫，30幾應該未夠40，佢平時對同事好harsh，而且情緒飄忽好難捉摸，舉個例，明明畀咗一樣嘢你跟，話係星期五交，佢星期四就會追你，仲要咁講嘢：「你搞掂未㗎？我發覺你真係唔上心㗎喎，唔想做出聲呀，我畀第二個跟。」
首先都未到佢最初嘅指定日期，你如果係星期四想要，咁咪話星期四交囉，人哋要分配時間㗎嘛，使唔使咁講嘢呀？呢啲只係變態阿姐嘅日常，仲有好多例子，試過話同事啲衫寒酸，又試過有同事貼咗張全家福喺枱頭，阿姐行埋嚟睇然後話：「你老公個樣好唔掂喎！」
要數呢個阿姐嘅衰嘢可以講足三日三夜，長話短說，有個男新人入咗嚟做，佢叫Bryan，27歲仔，平時好聽阿姐話，大約做咗一個月之後，某次lunch佢問我哋：「Margaret結咗婚未㗎？」
首先交代下性別，我係女，同事A係女，同事B係男。
同事A：「梗係未啦，唔係點會每晚做到9點唔願走，自己唔走都算，我哋夠鐘收工仲有說話聽，痴線㗎佢，有人話佢星期六都會自己返公司添呀！」
Bryan：「即係工作狂嚟喎！應該連男朋友都冇。」
同事B：「應該冇。」
同事A：「信我啦，我都係女人，有男朋友就唔會搞成咁，你醒醒定定添呀！佢叫你做嘅嘢最好第一時間做。」
Bryan：「點解佢唔同我哋一齊食lunch嘅？」
我：「你應該問我哋點解唔同佢一齊食lunch，有佢嚟我就唔食啦，好麻煩㗎佢！同佢食lunch即係一路食一路傾工作，佢都知我哋唔想同佢食。」
諗住係新人探路，了解下份工係咪好難做，阿姐係咪好難服侍啦，點知我哋幾個同事原來捉錯用神。
大約過多兩個星期，又係同事放lunch，大家傾閒計嘅時候我話：「其實阿姐今日咁著想點？瑜珈褲連gap都現埋，我唔係話反對人著瑜珈褲，不過呢度公司嚟喎！」
同事A：「屌！佢係咁㗎啦，話我哋著衫寒酸，佢自己著衫仲奇怪，好似唔識分場合咁。」
Bryan：「唔係喎，我覺得好正喎，Margaret對腳夠長夠瘦，carry到呀！」
我：「你知唔知你講緊乜L嘢？」
Bryan：「你哋唔覺咩？Margaret身形其實好好，平時見佢著返工衫已經覺得好好睇，估唔到著呢類瑜珈褲都咁正。」
Bryan唔係講笑㗎喎！佢真心覺得阿姐好正，Margaret平時講嘢尖酸刻薄，喺Bryan眼中竟然覺得係好型，佢話自己之前拍過兩次拖，兩個前女友都好嗲，所以覺得吃不消，佢鍾意女人獨立啲同埋strong啲……
獨立同變態係兩回事，Strong同埋仆街都係兩樣嘢，你識唔識分㗎？
我寧願Bryan係出於擦鞋先會讚阿姐，因為咁樣仲可以理解，但佢係由心出發欣賞Margaret，咁就冇得救喇，呢個人壞L咗㗎喇，醫返都嘥藥費。
Bryan：「你估我追Margaret有冇機會吖嗱？」每逢lunch time聽Bryan講阿姐都會覺得好震撼。
我：「曲定直？定玩膠？你真心？」
Bryan：「我真心覺得Margaret好正，可能因為你哋係女仔所以唔覺啦！男仔應該會覺得好正喎！」
同事B：「好有眼光呀你！」
同事A：「你個position之前咪男同事囉，畀阿姐炒咗，好L憎Margaret㗎！又係同你差唔多年紀，咁你話係男女問題，定係人嘅問題？隔籬team嘅男同事同埋個男manager都好憎我哋阿姐，我未聽過呢間公司有人覺得Margaret係好囉唔該！」
我：「不如你試下追Margaret吖！」
Bryan：「我就係想問你哋，知唔知Margaret鍾意啲咩？有咩嗜好？我想試下約佢，你哋估約食lunch先好唔好呢？」
死得，原來呢條Bryan都係變態！
同事A：「佢淨係鍾意返工，咁啦，你約佢食飯先啦！踏出第一步吖嘛！」
我對住同事A講：「點解你推Bryan去死？」
同事A：「有勇士出現喎，點解唔鼓勵佢？快啲出手啦！如果真係追到阿姐，可能喺愛情嘅滋潤下，之後對我哋唔會咁harsh呢！」
Bryan：「但係Margaret都幾惡，我驚會被拒絕。」
同事A繼續發表偉論：「傻仔嚟嘅，邊個女人唔鍾意有人追？Margaret都dry咗好耐㗎喇，我覺得你命中率會好高，你諗下，你咁欣賞佢，就算追唔到呀，對你印象分都會加啦，肯定之後有得升職加薪。」
Bryan：「我唔係想升職加薪呀！我真係鍾意Margaret呢類型㗎！」
我：「你係咪有戀母情意結？」
Bryan：「唔係，不過我鍾意成熟同埋獨立，真係唔想再要啲嗲聲嗲氣嘅女朋友。」
同事B一路冇出聲，我問佢做咩咁沉默？
我：「你係咪都鍾意阿姐？全程唔講嘢嘅？」
同事B：「我唔想參與討論。」
同事A：「Bryan，唔使理佢哋，成班唔L識貨，嗱，你快啲追到阿姐，我哋之後都會有好日子過，最好盡快結婚，然後搞大佢個肚，咁Margaret就要放產假，我哋起碼可以輕鬆幾個月至半年，我畀膽你，去馬！」
CLS公司！CLS同事，不過更加CLS嘅係Bryan，佢真係去馬約Margaret食飯，仲要唔係lunch，係dinner……
Bryan興高采烈咁同我哋講成功約到阿姐星期六晚飯。
我：「Weekend都睬你？咁你應該得米啦！點開口㗎？」
Bryan：「冇呀，我話想多謝佢最初請我，一直想請佢食飯，本身想約佢星期五食lunch，佢話唔得閒要同客con-call，咁我膽粗粗問dinner呢？佢又話weekday一般要OT，係食就食星期六夜晚喎，有啲喜出望外！」
同事A：「仆街仔吖，都話你掂㗎啦！星期六晚就搞大佢個肚，總之你搞到佢放產假知唔知？」
Bryan：「咪玩我啦！」雖然我好憎阿姐，但我都想佢成功，成個人緊張埋一份。
星期六Bryan同咗阿姐出去食飯，我哋當晚同埋星期日都瘋狂WhatsApp佢問過程，不過Bryan冇覆，唔通我哋瘋狂WhatsApp佢嘅同時，Bryan又瘋狂同阿姐……睇嚟有機會攞到產假喎！
星期一，Bryan冇返，阿姐話佢已經辭咗職……乜L嘢呀？精盡人亡呀？
然後阿姐叫咗我同同事A入房，一坐低就狂鬧：「唔該你哋咁大個人講嘢有啲分寸！」
我同同事A都好愕然。
阿姐先指住我嚟屌：「乜嘢戀母情意結？你知唔知我可以告你誹謗！」
嗱！我肯定佢告我誹謗係鋤唔入，但係當時我冇打算駁咀，因為1）我真係有講過；2）我駁咀會死得更慘；3）我嬲緊Bryan，好想DKLM！
阿姐鬧同事A先至勁：「你夠膽喺我面前講多次放產假！」
同事A：「我……冇……」
阿姐：「冇？杖宗尬朽早尖蛛昨宗丈蚪杖鴆未力宗史末鄰朽宗存考」全部係怪獸字因為打唔返咁多句出嚟，總之就鬧到同事A飛天，差啲炒埋我哋咁滯！
畀阿姐鬧完之後，我同同事A都谷住道氣，直接就打去剷Bryan，佢有聽電話，仲猛咁同我哋講對唔住，當晚佢直接向阿姐示愛，阿姐屌L到佢上天花板，再chok到係我哋慫恿佢咁做，Bryan條仆街連啲細節都講埋，包括同事A叫佢搞到阿姐放產假呢句說話。
Bryan我同你講，你唔止係變態中嘅變態，仲要係一個懦夫，自己衰咗就算啦，仲要爆同事啲對話出嚟？死廢柴！好在佢辭職，如果唔係，我同同事A都唔會畀佢有好日子過！
獨善其身嘅係同事B，所以佢講句嘢都權威啲：「嗰次你哋問我仲咩咁靜唔出聲，而家明啦！」
同事A：「你一早知Bryan追阿姐衰硬？」
同事B：「我唔知佢追唔追到，不過你見Bryan咁傻，竟然話鍾意阿姐著瑜珈褲，當時我已經知呢條友冇L得救，我最初係預佢追到，因為阿姐咁dry，應該好易得手。」
我：「所以你驚佢哋之後真係變成情侶，費事講咁多，好醒喎你！」
同事B：「最估唔到係Bryan失手都拖埋大家落水，我都計錯數，但總算避過一劫。」
好波呀同事B，行事好小心，唔似得我同同事A咁樣，本身阿姐副嘴臉已經夠難睇，經此一役之後對我同埋同事A更差，多謝你呀Bryan！