為咗一個Sales嘅職位，我數過自己total收咗243份resume，一共叫咗41個人嚟見工，但係通通都畀老細ban晒，由於唔知佢想要乜，所以我建議不如搵headhunt幫手，點知老細面露不悅咁同我講：
「你做HR就係要幫手請人吖嘛，下下搵headhunt，即係又要使多一筆，咁我請你返嚟做咩？」邏輯上佢講得冇錯，但實際上唔work吖嘛，佢都唔知自己想點，係又ban唔係又ban，呢個position底薪頂盡$23,000咋，你估出10萬請人咩！
41個上嚟見工嘅求職者衰咩？大部分都係衰人工，人哋個expected salary根本唔係要得多，呢個老細一見人個expected salary高過last salary就發癲，你冇嘢呀？人哋搵工唔通想原地踏步咩？比舊人工嗌多一千幾百都好平常啫！
偶爾有幾位求職者冇填到last salary，但老細又咁啱嫌對方學歷唔高或者經驗唔夠，我真係好攰喇，如果一個position收200幾份resume，見40幾個求職者都仲未請到，其實會唔會係要求太高呀？咁搞法要請到2046喎！
後來我終於等到一個機會，有個求職者填expected salary $23,000，不過冇填到last salary係幾多，resume亦都冇提，淨係interview嗰陣同我面對面講過。
老細今次覺得個求職者嘅background唔錯，但一如以往嫌人哋人工貴，仲開口叫我壓價：「呢個男仔上一份幾錢人工呀？底薪要$23,000咁多？佢之前份工係半年前喇喎！呢段時間失業呀？你撳佢價啦！失業半年唔會要求咁高㗎喇！」
其實Interview嘅時候，呢個求職者同我講過佢上一份工底薪先得$16,000，最多試過底薪連佣出$25,000，不過得一次咁大把，大部分時間淨係出底薪同埋一至兩千蚊佣金，即係平均$17,000至$18,000一個月，佢知道自己below market price所以先想轉工，亦係呢個原因expected salary填$23,000。
我同老細講：「呢個求職者之前出$25,000，而家佢淨係要求$23,000底薪。」
技術上我冇吹水吖，個求職者真係曾經出過$25,000喎，雖然得一次咁大把……
老細：「之前$25,000，而家淨係要$23,000？我都話㗎啦，失咗業半年，佢自己都一定慌，未撳佢都自己劈兩千，你再撳佢多少少，睇下$22,000得唔得？唔得就$22,500，係咁易撳啲啦！」
真係一個PK，因為覺得著數咗，聽到人降薪就即刻請，先唔計我煲大咗求職者個last salary，總之我老細就係要撳人哋價先安樂。
我並冇按老細吩咐打去撳呢位求職者，相反地，隔咗半日我先同老細講：「個男仔有另一個offer喎，如果唔係$23,000就唔考慮。」
老細聽完就急喇，佢話：「咁$23,000啦，起碼佢都要求少過之前嗰份，嗱嗱聲打去，問下佢星期一返工有冇問題。」你睇下個老細幾衰格。
後來仲有個彩蛋，當我打畀呢位求職者confirm offer嘅時候，我感受到個男仔好激動，可能佢聽我電話嗰陣講咗句：「星期一返工冇問題！」然後佢旁邊突然傳出一把女人聲。
嗰把女人聲比起佢更加興奮同激動，喺電話側邊大叫：「Yeah！你終於搵到工喇，我都話你得㗎啦老公！」
個求職者喺電話度笑得好尷尬，仲同我講唔好意思。我完全感受到佢兩公婆有幾開心，連我都被呢份喜悅感染。
記得呢個男仔返工嘅第一日，因為我要幫佢整staff card所以大家傾咗幾句，個男仔同我講咗幾次多謝，我叫佢畀心機做就得喇，其實好想同佢就人工單嘢夾下口供，不過我知老細係唔會特登走去問佢，所以都係算啦！
曾經將呢件事同另一位朋友分享，佢話我老細好衰格，又話喺我呢間公司做冇前途，其實朋友講嘅嘢我都知，但無論係我又好，係個求職者都好，大家只係搵份工應付眼前嘅生活，冇人叫你同呢間公司過人世，個老細衰格，我更加應該賺佢啲錢，然後靜待下一份好工，咁樣諗咪可以平衡心態囉！（完）
好嘅HR又唔止咁少嘅，以下兩個故事分別係2019同2021年，你仲有冇印象？
求職者有案底 HR：要畀機會人改過
https://hkofficedaily.com/?p=4428
Expected Salary太保守 HR主動提示填多啲
https://hkofficedaily.com/?p=17660
睇咗《辦公室日報》最新嘅YouTube片未先？
