公司裁員嘅消息傳咗幾年，由冇疫情傳到有疫情，再由第一波傳到唔知第幾波，從來都係只聞樓梯響，正當個個都聽到冇感覺嘅時候，公司忽然宣布裁員行動正式開始，呢下真係將我哋成班同事殺個措手不及。
真正裁員嘅消息係用WhatsApp發放出嚟，你話幾咁兒戲，同事們各自收到自己department head嘅msg，叮囑第二朝要準時返到office，因為會公佈裁員名單，頂你個肺直接講啦，頒獎典禮咩，使唔使盛裝出席呀？裁員仲要懶係有神秘感。
嗰朝9點返到公司，office罕有地坐滿晒人，後來先知道有啲同事直頭8點鐘已經返咗嚟，我諗應該係太擔心啩，連嗰啲平日例遲嘅同事都準時列席，全部人開住電腦，但冇一個人做緊嘢，正常嘅，邊個仲有心情做嘢吖！
每個部門嘅department head都叫下屬準時返嚟，但裁員結果又唔係9點官宣，老細叫晒啲senior入房開會，一開就係兩個幾三個鐘，我諗佢哋喺房入面討論緊裁員名單啩！可能係草擬緊每條team要交啲咩人出嚟，總之成個office嘅氣氛充斥住不安。
個別一兩個妹妹仔同事比較柔弱，喺漫長嘅等待之下忍唔住喊咗，我唔知佢哋係唔捨得公司，定係諗起有機會被裁就覺得好傍偟，又有幾個男同事好似以前讀書啲奀皮同學咁，全程表現得好興奮，睇嚟完全唔志在份工，有種一鑊熟好過癮嘅感覺。
亦有同事極具效率，粒聲唔出喺個位執CV，同時再瀏覽求職網站，咁又係嘅，如果呢頭有錢賠，嗰頭即刻搵返份新工，相信會係一件爽嘅事。其實我自己都擔心㗎，但都成三十歲人啦，唔通好似嗰兩個妹妹仔同事咁喊咩，唯有等結果囉，何況已經冇嘢可以做啦！
大約12:00，有人等得唔耐煩走咗落樓下煲煙，冇幾耐就有其中一個department head行出嚟，嗌咗另一位同事入房，裁員行動真係正式開始喇，當時公司本來仲有啲keyboard打字聲，但見到有人陸續收大信封之後，突然全office又開始靜晒，感覺極其煎熬。
一個、兩個、三個同事相繼被叫入房，有個出嚟後一聲不響執嘢走，有個就猛咁鬧公司冇良心，拎完保就業等到過晒保證期先郁人，每個同事都有不同嘅性格，所以每個人被裁嘅反應都唔一樣。
大部分人包括我在內，喺lunch前仍然未收到消息，然後三五成群一齊出去食lunch，呢餐飯真係充滿離愁別緒同不安，大家又唔知講咩好，個別同事就喺度自我安慰，覺得裁員名單可能冇自己份。
晏晝返公司繼續等「宣判」，竟然坐到放工都仲未嗌我個名，講真我好唔鍾意咁樣，要劏要殺不如乾脆啲，而家吊住鹽水唔知公司想點，做嘢又唔係，hea坐又唔係，我曾經想跟埋手頭上一個project，但由於要同隔籬team夾嘢，人哋條team已經唔理我，仲話：「傻㗎？仲做！有時間上網搵工啦！」我知，不過齋坐真係好無聊吖嘛！
等了又等，等到夠鐘放工仲有3分2人唔知命運如何，然後我哋呢班人就帶住忐忑嘅心情返屋企，我由擔心變成煎熬，再由煎熬變成好躁，呢個就係我心路歷程嘅變化。
由於當日department head長時間喺老細房，基本上冇機會同佢接觸，所以夜晚返到屋企忍唔住WhatsApp佢，我都係想知裁員有冇自己份啫，點知department head已讀不回，炒就一句，唔炒又係一句，唔好要我估估下啦！
第二日返工，office嘅氣氛仍然一樣，又有另一批同事被炒，仲係未輪到我，有一刻覺得好幸運，有一刻又覺得好不幸，因為就算留低我又點呢？已經冇人想做嘢啦！咁炒淨我又點呢？裁得員就唔會再請新人，到時唔通好似葉問咁一個打十個？
家人都知我公司嗰兩日咩環境，阿媽係咁msg我問點樣點樣，本身心情已經夠晒煩，畀佢問多兩問仲煩，然後呢一日又捱到6點，又係冇嗌我個名，執袋放工再順手覆阿媽msg：「未有消息。」阿媽一連send返3個msg過嚟，包括：「咁就好喇！！！」「叻女！可能老闆覺得你幫到手👍🏻」「咁你以後比心機做喇！我而家落去買條魚，年年有餘！」
其實關年年有餘咩事呢？
我仲記得嗰日係星期五，同事話如果weekend前冇收到大信封，咁即係代表留低嘅機會好大，因為有心炒就唔等到下星期一，公司唔想蝕星期六同埋星期日嘅糧畀你，所以當時嘅風向係「捱得過weekend，唔需要再驚」，我都唔知呢個講法真定假，亦都唔識得點計，同事咁講我就咁聽啦！
已經一隻腳踏出咗office，冇諗過department head會衝出嚟叫住我，佢問我有冇時間傾兩句……頂你咩！有晒心理準備會畀你裁嘅時候唔出聲，等咗兩日以為安全你先嚟雞我，我阿媽仲要啱啱落咗街買魚！
我以為自己會好唔開心，點知見到代通知金加埋假期折現之後，唔知點解又興奮咗一下，因為疫情嗰兩年累積咗大嗱嗱29日假未放，而家成條數等同一次過出幾個月糧畀我，雖然呢啲都係我應得，但諗起而家已經通關，呢筆錢可以畀我去個旅行再慢慢搵工，心理上都叫舒服咗啲。
喺呢間公司做咗5年半，話長唔長，話短唔短，雖然唔鍾意今次裁員行動嘅操作，因為實在搞到一班員工太不安，但我又冇對呢間公司記恨，畢竟呢幾年都算做得開心，嚿錢又賠得足，叫做好嚟好去啦！
唔好意思，呢段投稿可能又平淡又無聊，但我好想記錄低面對裁員嘅心情，以呢種方式離開係有啲遺憾，特別係等派彩嗰兩日，簡直好似等咗一個世紀咁煎熬，不過其實真正發生嘅時候都冇想像中咁難受，反而係家人唔諒解先至最困擾，我阿媽係咁話我冇珍惜份工，一口咬定係我平時賴床搞到遲到，所以老細先會裁我🤦🏻♂️嬲嬲地我買咗機票，下星期就去加拿大探個friend兼玩返一頭半個月，耳根清靜下先，返香港再慢慢搵工啦！(完）
雖然等待嘅過程好煎熬，不過總算賠足錢，下面兩個故事都係同裁員有關，兩位主角亦以不同心態面對：
2021邊個夠我黑 新公司返得3日就執笠
https://hkofficedaily.com/?p=18039
唔使理別人眼光 我自己都做緊保安
https://hkofficedaily.com/?p=18476