無心冒犯任何有宗教信仰嘅人，只係想講一個人好定唔好，真係唔應該用宗教信仰去定奪。
我老細係一個基督徒，未有疫情之前幾乎每個星期軟硬兼施叫人返教會，不過同事們都已經係大人啦！我覺得間唔中提下係ok嘅，有興趣自然會返，如果真係唔想返，你日日語帶相關迫我哋都冇用。
有一年聖誕佢仲咁講：「我唔理呀！你哋搵啲人跟我返教會，我應承咗啲弟兄，帶唔到人返去點交代呀？」
咁公司梗有個別擦鞋仔會就範既。
我最唔認同佢叫人返教會嘅手法，老細會捉住同事做錯嘢去講，然後話要「罰」佢哋返教會，如果你覺得呢件係好事，就唔會開口埋口話「罰」啦！例如我鍾意姜濤，會唔會話罰你陪我睇姜濤吖？我覺得enjoy先鍾意㗎嘛，我叫你去睇曹永廉就叫做「罰」啫，啱唔啱先？
同事唔肯返，佢又會畀說話人聽，何必呢？大家根本唔係對基督教反感，而係對老細反感。
撇除宗教問題，講返工作，呢個老細平時嘅疑心亦好重，無論咩事請假都好，佢都會懷疑同事背叛公司出去見工。另外，佢會迫同事買product，話員工唔用公司嘅產品講唔過去，仲有，老細星期六日會喺WhatsApp group叫人做嘢，遲咗覆msg就不斷啄住你，問你點解唔覆，星期六日係私人時間喎！
如果老細唔係將返教會日日掛喺嘴邊的話，你根本唔會察覺到佢係基督徒，最睇唔過眼係佢有拎政府個保就業資助，但一過咗限期就即刻裁咗一堆人，連HR都睇唔過眼同老細攤牌（因為HR做醜人係咁畀同事鬧），點知老細講咗句：「我而家又冇犯法，跟足程序去做，你哋唔好覺得裁員就一定慘啦！呢個係上帝畀佢哋嘅考驗嚟㗎！」
呢個係上帝畀佢哋嘅考驗？？？
其實我老細真係一個人辦，唔係有宗教信仰就一定係好人，好多人冇信仰，但一樣誠實同善良，同埋我覺得呢個老細影衰咗個宗教，可能同事本身唔抗拒，但以後一講起呢個宗教就諗起佢。
投稿讀者：Karen.A