入行做Speed Dating初期，我其實聽唔明好多潛台詞，例如曾經有個男會員話：「肥肥地都ok嘅，我唔介意。」
但係幫佢配對過一兩次，返嚟嘅feedback都唔啱，終於係個客忍無可忍直接講：「即係呢，唔係呢種肥呀，我想要豐滿嗰type呀。」當時有個資深同事話我知，好多客唔好意思講得咁白，特別係男會員，佢哋口中所謂「肥肥地都ok」，係指人瘦波大，唔好一廂情願以為佢唔介意肥妹。
站於我嘅立場，呢度唔係夜總會喎師兄，打開門口做正當生意，咪當呢度係中國城啦！女會員邊啲大邊啲細，唔係個個一眼就睇得出，就算我知都唔會咁樣介紹，你當我係爸爸生咩！
我之後搵返啲身型好嘅，例如運動型，比較有線條美嗰種，健康嗰隻性感，我自己見到都心動呀！
點知呢個男會員仲係唔滿意。
「唔係話呢個女會員唔靚呀，佢靚嘅，好陽光添！不過呢，唔夠豐滿囉，我鍾意上圍大，總之最緊要大，個樣衰啲都ok。」
我：「有啲難度喎，我哋唔會幫人用上圍去配對。」
「可能你後生唔知，女仔呢，化妝同唔化妝有時差好遠，鍾楚紅張曼玉咁靚都好啦，總會有睇厭嘅一日，所以都係有胸比較實在，我認我係膚淺㗎，但係邊個男人唔膚淺吖。」
我：「唔係哩，始終唔係個個女仔都鍾意著到好激突，同埋我唔建議你咁樣搵女朋友。」
「仲好講，我之前喺網上識咗個女仔，睇相好似好大，差啲畀佢呃咗，望多幾張相先發現佢係鬼影變幻球，時大時細，明顯係攝嘢啦！其實我都好坦白講晒要求出嚟，而且得一個要求之嘛，個樣衰啲都ok喎，鍾意大波唔係罪吖啱唔啱先？不過你放心，我唔係玩玩下㗎，由細到大都希望娶個大……豐滿嘅老婆，好似利智嗰種。」
我：「利智唔係國家咩？」
「嗰個係智利，你啲後生仔真係唔識嘢，上網search下啦！」
呢位男會員對乳房嗰種執著同埋堅持，並唔足以令我動容，而佢後來亦再無幫襯我哋喇，唔知佢搵到心目中嘅利智未呢？
＝＝＝＝＝
🤔 淨係認波唔認人，係咪睇得AV太多？
《AV女優身價排行榜》
https://hkofficedaily.com/?p=7569