好多人都話返新工之後冇人帶冇人理，坐喺公司度日如年好難捱，不過我就有啲唔同，好記得第一日返工係星期四，返兩日就weekend，然後星期一再返工嘅時候有兩個同事確診，office要關閉加消毒，再陸續傳出多幾個同事陽性。
結果我返咗幾日工，佢哋就宣布work from home，其實當office有人確診之後，班同事已經無心工作，有堆人議論紛紛，有啲就直情請假驚中招，其實呢間公司啲人幾友善，奈何真係唔夠時間認識，除咗自己Team之外，我相信冇乜人會記得我存在（自己Team我都懷疑佢哋未必記得）。
咁WFH就WFH啦，唔輪到我揀，私下問過阿姐有咩可以做，佢話唔係冇，但之前搵同事教我都未教得晒，所以現階段冇嘢交畀我跟，結果我就日日stay home等指令，即係齋坐，講個秘密你知吖，我係連公司email都未有，因為負責搞呢樣嘢嘅IT同事確診，聽講佢頭幾日好唔舒服，跟住就去咗隔離，直至而家3月中，我仍然冇email，完全冇咗件事，即係工作往來嘅電郵冇我份。
無名無姓無email，我都有危機感㗎！好在公司慣咗每日例行開會，其實係幾個部門互相交流下，大家睇下有咩需要協調同跟進，但國家並冇任務畀我，所以每日只需要定時定候join個online視像會議就得，純粹齋聽，冇嘢可以做。
2月底我如期有糧出，不過就繼續冇嘢做，為咗令自己唔好咁廢，佢哋每日開視像嘅時候，我都好大動作扮打筆記，其實我只係上足智彩、買下六合彩、碌下Facebook，因為唔知佢哋講緊乜，唔識之餘亦冇我嘅事，呢啲時候真係好講演技，當然啦，我仲會喺適當嘅時候點下頭，畀會議裡面嘅人知道我聽緊。
不過咁，收得份糧我都好尊重公司，朝朝視像著晒恤衫同西裝外套，雖然下半身係孖煙囪，但始終要畀阿姐知我好重視呢份工，而家咩環境呀，失業率咁高，輸人唔輸陣啦，其他同事唔記得我叫咩名唔緊要，至少記得有條友執得咁正開會吖嘛。
「早晨！」「係！」「唔！」「唔唔！」「ByeBye」每朝視像我都係得呢幾句對白，而每次meeting只係30分鐘左右，除咗呢半粒鐘有存在感之外，其餘時間公司都係keep住冇人搵我，咁嘅日子已經超過一個月喇，Netflix啲新劇都畀我煲晒，啱啱睇完套《少年法庭》勁正！
最新消息老細話4月中先重新返office，到時我已經做咗兩個月，出咗兩個月糧，咁樣返工你話夫復何求吖，不過為咗唔好畀人炒，返office後我會好畀心機做嘢，咩著數都拎夠啦，希望到時已經有email，透明到咁真係冇乜安全感，呢份投稿都係我視像開會扮打筆記嘅時候寫。