老細生日學偶像應援 租電車貼大頭海報

我老細係一個好鍾意出風頭嘅人,本身性格做任何事都好高調,口口聲聲話想幫公司宣傳,其實佢最想自己出名,而家咪好多鏡粉會租電車印偶像個樣上去嘅,老細睇完之後已經心癢癢,曾經講過希望生日嘅時候都可以咁,諗住佢講笑囉,點知係認真。

事緣老細今日睇咗單新聞,然後拎住部手提電話畀我睇:「喂,阿威都有人應援喎!你睇下,6月8號,啲fans打算喺巴士同電車印晒佢個樣,大大隻字寫住Happy Birthday,咁冇理由我唔得吖,你即刻搵電車公司quote個價返嚟!」

我第一個反應係:「邊個阿威?」

老細:「有冇搞錯呀,荃灣楊屋道街市豬肉檔男神喎,翻版AK喎!」

我:「唔係啩!」

老細:「真㗎,你自己睇下。」

我個角色好難做,又唔可以叫老細冇鏡都屙篤尿照下自己個樣,始終都係佢出糧畀我,唯有婉轉地表示:「會唔會太誇張呀?一陣好多人影相擺上網㗎喎!」

老細:「咁有乜問題呀?又唔係唔見得人,就算唔係偶像呀,嗰啲咩補習天王都係大大張相貼喺巴士車身賣廣告啦!」

我:「你認真想Quote價?」

老細:「係呀,聽講電車可以租埋開party,你問下可唔可以租完架車貼相之餘,再叫啲到會喺電車上面食,應該唔會好貴㗎啫,我哋成班同事當gathering都得㗎!」

喂,好肉酸囉!你又唔係咩明星,做咩要租架電車搞埋呢啲嘢呀?啲客見到就真係唔慌唔威,人哋喺背後笑你自戀,笑我哋公司不知所謂咋,你可以宣傳公司,但唔使貼埋自己個樣上去㗎!

我知道今次走唔甩,硬住頭皮都要quote咗個價返嚟先,其實租個電車都唔係好貴,每小時由千幾蚊至三千幾蚊,視乎車款,不過呢個價錢只係私人用途,老細要嗰種係涉及商業,咁就要打電話或者email再問清楚啲先知道收費同詳情,仲未計你嘅車身要貼海報等等嘅其他雜項,但以我認識嘅老細,就算係上述價錢嘅十倍佢都會做。

我將呢件事同咗幾個同事講,估下大家咩反應:

同事A:「乜搵啲咁嘅嘢搞呀!」

同事B:「佢係咪當自己姜濤?」

同事C:「嘩,啲friend知我喺呢間公司做,仲使見人嘅!」

然後我發現咗呢件事可能走得甩,因為製作海報同租車都要預早book定,而老細嘅生日好快到,下個月16號就係,距今只係一個月多少少,希望電車公司嗰邊可以揸正嚟做,我亦都會特登慢慢覆email,盡量拖到呢單嘢搞唔成。

其實我老細雖然未至於地中海同埋大肚腩,不過都成50歲人,普通阿叔一名,好心佢自己知自己事啦!

差啲唔記得講,早排咪好興一個唔知咩世界100大型男選舉嘅,老細有暗示過想我哋班員工提名佢㗎,好在佢講過兩次之後冇咗件事咋!

error: