雖然send CV之前未聽過呢間公司嘅名，不過上到去就發現好大好靚，Receptionist成個Maggie Q咁，使乜咁屈就呀，選美都得啦！間office得小貓三四隻，對比返個環境面積確實有啲冷清，斷估唔係呃人啩，招聘廣告話係Event公司，照計同傳銷或者倫敦金大纜都扯唔埋吖。
被Maggie Q……即係receptionist安排入房填表，都未嚟得切填完，已經有個男人走咗入嚟，四眼，蛋撻頭斯斯文文，中身材，著Polo恤，佢仲遞上卡片自我介紹係呢間公司嘅老闆，估唔到會跳過HR，一嚟就直接打大佬，我嘅戒心又再提高。
同一般Interview冇分別，呢位叫做Shane嘅老闆仲幾nice幾健談，佢笑容滿面咁聽我講以前做Event嘅經驗，應該好滿意啦，雖則我唔係業界精英，但都負責過唔少Project㗎！
Shane：「你都好適合我哋公司，係呢Aaron，有冇乜嘢想問返我？」
我：「想了解下呢間公司主要做開邊類型嘅Event？」
Shane：「我哋未做過Event㗎喎。」
我：「……」
招聘廣告冇見你標明公司係新成立或者Startup呢類字眼嘅，未做過Event？咁間公司幾靚都要諗諗啦，我唔想做開荒牛呀，之前份工就係要一腳踢兼且份糧唔成正比例，我唔想由一個坑跳去另一個深坑囉！
Shane：「係呢，你Expected salary填Negotiable，咁你上一份糧係幾多？啲佣係每個月計定係點？」
愈聽愈覺得呢條友運鳩桔，甚至連業內操作都唔識，外行人嚟㗎喎，諗住嗱嗱臨打發完就閃，所以我作到好大：「之前底薪$30,000，佣就平均$30,000至$40,000一個月啦！」
Shane：「即係平均每個月$60,000至$70,000啦，咁啦Aaron，公司真係需要一個有Solid經驗嘅人，$70,000好唔好？現階段就未必有佣喇，之後run順咗再調整啦！」
我：「$70,000？你指底薪？」
Shane：「應該話係梗薪，因為底薪個意思可能仲有其他Bonus同埋佣，但因為公司而家冇客冇Event，畀唔到Commission，所以就梗薪$70,000，當幫幫我囉！至於雙糧就暫時未有，或者一年後睇睇公司業績再打算。」
我鳩噏㗎咋，其實之前份工得兩皮幾嘢底薪，佣？咩嚟㗎？最叻嗰次都係出幾千銀，所以我先會轉工之嘛！你而家變相個個月出雙糧畀我，點算好呢……間公司咁業餘，應該唔會問我拎薪金證明啩，會唔會Reference check呢？
我決定搏一搏，而最終我係搏贏咗，因為呢間公司根本冇HR，所以Interview先會一嚟就見老細，更枉論咩Reference check同薪金證明啦！
冇錯，我係唔想做開荒牛，唔想做Startup，不過$70,000喎，就當返咗兩三個月頂唔順，呢嚿錢都足以支持我quit咗佢再慢慢搵新工啦！
如是者就開開心心返新工，第一件事竟然係幫手請人，因為公司當時得一個Maggie Q，一個Designer，一個IT，仲有一個Marketing，我條BD team係冇人，唔扮矜持喇，我承認係有啲飄飄然，因為唔止人工暴升，仲失驚無神做埋Department head，哈，以前都畀阿頭鬧得多，一於請幾條新仔返嚟畀我屌先！
返咗幾日，除咗出廣告請下人，撩下Receptionist傾計，基本上我都冇咩嘢要忙，不過Maggie Q仲懶，佢點我將兩封信拎入去畀老闆，仲有件順豐係畀Marketing嗰位同事，算啦，見佢幾靚女，我都樂意幫忙嘅。
我：「嘩，呢封律師信嚟㗎喎！」
Maggie Q（唔好意思強行幫個Receptionist改埋名）：「係咩？冇留意喎，好似幾日前寄嚟㗎喇。」
喂，點搞呀你，hea都分輕重吖嘛，律師信可大可小，好多嘢仲有期限，老闆唔可以有事㗎，我搵唔返一份$70,000嘅工點算呢！
入房搵Shane嗰陣窩心提醒有封律師信，順便「關心」下係咪有咩大頭佛，唔好話我知公司畀人告呀！
Shane本身喺度抹緊支Golf棍，聽到律師信三個字之後就停手去拆信：「哦，好小事啫，唔記得交差餉，又識得寄嚟公司嘅，呀，係喎，好似係我自己改地址。」
我：「差餉都唔記得交？應該欠交半年定唔知一年以上先會搞到出律師信㗎喎。」
你唔係周轉唔掂呀？
Shane又拎返起支Golf棍一路抹一路講：「呢層樓之前租過畀人，跟住條友住咗兩年冇租，我都冇過去好耐喇，咁多層樓邊度記得吖！」
我聽緊啲咩？
我：「咁多層樓邊記得，老闆你好多層樓㗎？」
Shane：「我有9層樓，另外有4個舖位，呀，仲有呢個office都係自己物業，總之每個單位又要交呢樣交嗰樣，加加埋埋每個月十幾廿封信，又有嗰啲咩水火險呢，好鬼煩，換轉係你都唔記得啦！」
我：「我唔會呀，如果有9層樓加4個舖位，肯定會記得好清楚，不過你都真係快啲交返差餉啦，我驚有其他罰款，到時好甘㗎！」
Shane：「得啦，冇嘢多，淨係錢最多，哈哈，講笑啫！」
你唔係講笑囉，以為Shane係傻仔先會亂開$70,000人工畀我，但原來對佢嚟講冇所謂㗎，散紙嚟咋！你究竟咩來頭呀？（未完待續）