利申先，我唔係Mox嘅職員，因為見到出面鬧得好犀利，話自稱今朝買到MIRROR飛嘅人都係PR，都係想幫Mox洗白，我相反，仲想講Mox呢次認真失策，搞到真正想用佢網上銀行服務嘅人用唔到，而買唔到MIRROR飛嘅fans（應該佔大多數）又質疑佢扮有飛賣，仲有人話要向金管局投訴，Mox今次兩面不是人，攞嚟搞。
不過……我真係符碌買到兩張HKD 880嘅飛（另外HKD 1280嘅飛係一入去已經顯示Sold Out），其實今朝只係想開個App過數畀人，點知個App死Q咗，然後我先知賣緊MIRROR飛搞成咁，嬲嬲地咪去個售票網址試下囉，純粹係人搶我又搶嘅心態，零技巧，因為個網會自動10秒refresh，咁咪由得部電腦自己load完又load囉！
本身係手提電話加埋部腦自生自滅咁load，後來有熟客打我手提，得返部腦，但係11點幾嘅時候，同個客傾傾下突然見到部腦入到，咁唔通唔買呀？
我同個熟客講：「唔講住，好似買到MIRROR飛，揀位揀日子先，轉頭call返你。」
「你竟然入到？不過冇用吖，頭先我都入到揀位個版面，然後瓜晒，reload即彈返出去。」
我：「唔係喎，我買到喎！」
「Mox個app死咗，你都睇唔到card number啦！」點解我覺得個客好似有啲眼紅咁嘅……
我：「不嬲會將啲信用卡同銀行e-banking資料全部整落excel度，因為驚自己唔見卡或者忘記密碼，你少擔心啦！」
「你係MIRROR fans咩？」
我：「唔係呀！」
「讓畀我讓畀我，我加錢幫你買吖！」
我：「喂喂喂，真係call back你，要入資料，費事填錯。」
呢個時候，我側邊嘅同事已經起哄，平時西口西面嘅Receptionist都走埋嚟，問可唔可以雙倍價錢同我收購，死開啦，同你好熟咩，我哋同事嚟咋！想迫我犯法做黃牛黨？我要炒黃牛不如拎出去放啦！肯定唔止放到Double，恰我唔知價咩！
個熟客隔咗陣又打嚟，嗱！佢個offer就有誠意好多喇。
「我group埋嚟緊嘅單一次過落晒，讓兩張飛畀我，有冇得諗？」
我：「好似唔係幾好喎，呢啲算唔算商業罪案呀？一陣畀人話係黑箱作業。」
客：「商咩業罪案呀？隻product係指定向你公司買㗎，我而家只係將今年嘅單提早一炮過落晒啫，同埋再落多啲之嘛！我知你哋啲佣係跳Bar咁計係咪？分開落單同一次過落單應該差好遠啦！」
佢講得冇錯，我哋公司嘅佣金制度的確係跳Bar，舉例個客一次過落50萬嘅單，我份佣係會多過佢拆開5次落10萬，同埋啲Bar嘅百分比係愈跳愈高，所以真係差好遠。
粗略計過，佢如果一炮過落定今年嘅單，我呢嚿佣大約有4萬幾蚊，兩張MIRROR飛換返4萬幾蚊佣喎，佢又唔係免費拎我兩張飛，仲要即刻過返HKD 880 x 2再加手續費啲錢畀我，成件事無本生利，我只係付出咗少少時間成本搶飛咋（仲要個系統自己refresh），而站於個客嘅角度，佢亦冇蝕底吖，將嚟緊嘅單combine埋之嘛，貨錢方面佢冇畀多，純粹係公司計佣嘅方式令我賺多咗。
我：「係咪堅先？」
客：「堅！你即刻開Invoice，我即刻簽名吸印confirm，咁冇問題啦？畀埋你私人account number我，即過埋兩張飛啲錢畀你！」
呢個熟客work咗好多年，佢又唔會呃我嘅，咁筍梗係deal啦，我冇得睇MIRROR唔會死，但諗起嚟緊出4萬幾蚊佣就一定瞓覺都笑醒！
不過估唔到呢單嘢會搞到我同老婆鬧交，本身諗住分享下開到張大單嘅喜悅，點知畀佢鬧到一面屁，仲質問我點會唔知佢係MIRROR fans，又懷疑我同個客有路，痴線㗎咩！雖然個客係女人啫，但明顯我係為咗佣金先轉讓張飛啦！
唔係想晒命話自己買到飛，只係想一齊評下理，咁大個人啦，錢緊要定係娛樂緊要呀？告別演唱會咩？何況仲未公開發售，到時咪搶多次囉，唔得咪試下食炒囉，我老婆係堅嬲，仲要同佢家姐細妹講，搞到我好似做衰人咁，而家我偷食咩？
我覺得老婆好唔成熟，張MIRROR飛值幾錢啫，而家換咗張大單，有成幾萬蚊佣金，買完黃牛仲有剩啦，佢話唔同喎，話我唔尊重佢，就算係放都要商量咗先，又話黃牛唔止犯法，啲飛隨時會係假，根本冇得check，嘥氣啦！講到底咪又係嬲我搶到飛唔同佢睇，我唔覺得自己有錯喎！