上年我曾經確診，故此要向公司報告同埋請假，換言之所有同事都知道，Office亦進行咗消毒，但呢件事已經係2021年6月嘅事，距今已經接近一年，自己完全好返晒冇出現所謂嘅復陽，估唔到有同事近月確診竟然賴落我身上。
我中招之後隔咗兩個半月先再返office，最密嗰期隔日做快速檢測，證實冇事先繼續返工，當時有幾個同事已經當我怪物咁看待，有人仲戴3個口罩，講到明驚我傳染，你要咁樣做我都冇辦法，朝9晚6喺office選擇戴3個口罩咁焗亦都係佢嘅自由。
農曆新年前有個同事確診，由於佢要隔離，過節見唔到屋企人，佢將怨氣同埋茅頭指向我，喺公司個group咁樣講：「最衰係你啦Dorothy，想同個仔過年都唔得，其實你仲有冇keep住check㗎？係咪長新冠呀？」
冇人代我出聲，咁我亦都親自回應：「我係2021年6月確診，你係2022年1月底確診，你覺得係我傳染畀你？」
「我識嘅人入面得你一個曾經確診，你中咗之後公司淨係消毒過一次咁大把，我有時都擔心係咪啲枱枱凳凳仲有殘留物。」
你冇常識我唔怪你，但係我同佢先後確診都相距半年有多，咁都可以賴我？不過呢種同事唔係得一個，另一位同事2月尾都確診，同樣係將茅頭指向我，4月中復工後不斷喺office單單打打，講埋啲說話好難聽，最記得係呢句：「Dorothy你啲菌都好毒下喎，我哋一個中完又到另外一個，最近我仲成日唔記得嘢，唔知係咪畀你搞到有腦霧，你係咪嗰啲咩超級傳播者？」
我：「想問下如果你未來10年有咩頭暈身㷫，係咪全部都會入我數？」
最乞人憎嗰句終於出現，佢話：「講笑啫，唔係嬲呀？」其實佢唔講呢句我都冇咁嬲。
仲試過想去廁所嘅時候，有個女同事同一時間起身，佢望一望我之後問咗句：「你去toilet呀？」
我：「係呀。」
女同事：「咁冇嘢。」
後來佢等我返到嚟之後先至再去……即係咁，我想問下係咪同一個曾經確診嘅人一齊去toilet，會增加中招機會？前後腳就有足夠時間等啲菌消失？你平時係咪唔出街？肯定同一條街啲人冇確診過？唔會去任何商場廁所？做同事使唔使做到咁呀？
如果中招後唔報出嚟，你怪我好應該，但係坦白講，我都未必係office裡面第一個中招嘅人，個玩法只係唔驗唔知邊個中。
疫情至今，香港嘅累計陽性檢測個案超過120萬宗，大把人中招都唔會報，普遍到好似傷風感冒一樣，根本你行出街隨時有一個確診者或者康復者喺左近，我唔明白點解中過一次就要畀人講足成年，所以最近返工真係覺得好唔開心，亦都有種無形嘅壓力。
確診冇人想，亦冇人會知道真正嘅源頭，麻煩唔好當曾經確診過嘅人好似怪物咁看待啦，咩叫「講笑啫，唔係嬲呀？」為咗呢件事我甚至開始留意緊其他工，可能你會話使唔使咁嚴重，不過我真係唔想再同呢班人一齊共事。
老細為撲MIRROR飛 癱瘓工作都唔理
「佢癲到騷擾啲客」
https://hkofficedaily.com/?p=21444